Read Traducción Kadosh Israelita Mesiánica იობი 18 Bible Online

იობი 18 - Traducción Kadosh Israelita Mesiánica bible

იობი 18

¹მიუგო ბილდად შუხელმა და თქვა:

²"როდემდე ინადირებ სიტყვებზე? დაფიქრდი და მერე ვილაპარაკოთ:

³პირუტყვებად და უგუნურებად რად ვითვლებით შენს თვალში?

⁴შენივე რისხვამ უნდა დაგღრნას? შენ გამო უნდა გაუდაბურდეს მიწა ან კლდე დაიძრას თავისი ადგილიდან?

⁵უსათუოდ ჩაქრება ბოროტეულთა ნათელი, აღარ აელვარდება ალი მისი ცეცხლისა.

⁶მის კარავში ნათელი ჩამობნელდება და მისი ლამპარიც ჩაქრება.

⁷შევიწროვდება ფეხსადგამი მისი ძლიერებისა და საკუთარი ზრახვები დაამხობს,

⁸რადგან ფეხებით ბადეშია გახლართული და მახეშია გაბმული.

⁹მარყუჟი ქუსლზე გამოედება, ხაფანგი შეიპყრობს მას.

¹⁰დამალულია მიწაზე მისი მარყუჟი, და ხაფანგია დაგებული მის ბილიკზე.

¹¹ყოველმხრივ შიში და ძრწოლა აკრავს და ფეხდაფეხ მისდევენ ისინი.

¹²შიმშილი დააუძლურებს და მის გვერდით დაღუპვაა გამზადებული.

¹³ავადმყოფობა შეუჭამს კანს, სიკვდილის პირმშო _ კიდურებს.

¹⁴ამოიძირკვება მისი საიმედო კარვიდან და საშინელებათა მეფეს მიჰგვრიან მას.

¹⁵მის კარავში ისაა დავანებული, ვინც მისიანი არ არის; გოგირდი გადაეყრება მის საცხოვრებელს.

¹⁶მიწისქვეშ ფესვები გაუხმება და მაღლა ტოტები დაუჭკნება.

¹⁷გაქრება მისი სახსენებელი ქვეყნად და აღარავინ ახსენებს მის სახელს კარიბჭესთან.

¹⁸ნათლიდან ბნელში განიდევნება და მიწისპირიდან აღიგვება.

¹⁹თესლი და შთამომავალი არ ეყოლება თავის ხალხში, არავინ დაურჩება თავის სამკვიდრებელში.

²⁰გაოგნდებიან მისი ბედის გამო დასავლეთში და ძრწოლა შეიპყრობს აღმოსავლეთს.

²¹დიახ, ასეთია ბოროტეულთა სამკვიდრებელი და ასეთია მათი ადგილი ვინც ღმერთს არა სცნობს!