Read Traducción Kadosh Israelita Mesiánica იობი 19 Bible Online

იობი 19 - Traducción Kadosh Israelita Mesiánica bible

იობი 19

¹მიუგო იობმა და თქვა:

²"როდემდე უნდა მიტანჯავდეთ სულს და მგვემდეთ სიტყვებით?

³უკვე ათჯერ შეურაცხმყავით, არ თაკილობთ ჩემს შევიწროებას;

⁴თუ მართლა შევცდი, ჩემთანვე დარჩება ჩემი შეცდომა.

⁵თუ მე მამეტებთ თავებს და ჩემივე სირცხვილს მაყვედრით,

⁶იცოდეთ, რომ ღმერთმა დამცა და გამხვია თავის ბადეში.

⁷აჰა, ვღაღადებ: ძალადობაა! და არავინ მპასუხობს, შველას ვითხოვ და არაა სამართალი.

⁸კედელი აღმართა ჩემს გზაზე და აღარ ძალმიძს გავლა, წყვდიადში ჩაძირა ჩემი ბილიკები;

⁹დიდება შემომაძარცვა და თავიდან გვირგვინი მომხადა;

¹⁰ყოველი მხრიდან მამსხვრევს და უკვე მივდივარ; ხესავით ძირკვავს ჩემს იმედს.

¹¹თავისი რისხვა აღანთო ჩემზე და საკუთარ მტრად შემრაცხა;

¹²ერთად მოდიან მისი ურდონი, გზა გამოიკაფეს ჩემკენ და ჩემი კარვის ირგვლივ დაბანაკდნენ.

¹³განმაშორა ჩემი ძმები და გამიუცხოვდნენ ახლობლები.

¹⁴უგულებელმყვეს ჩემმა ნათესავებმა და დამივიწყეს შინაურებმა;

¹⁵უცხოდ შემრაცხეს ჩემს სახლში შემოკედლებულებმა და მხევლებმა, უცხოტომელივით ვარ მათ თვალში.

¹⁶მსახურს ვუხმობ და არ მპასუხობს, ვევედრები მას ჩემი პირით.

¹⁷ჩემი სუნთქვაც შესძაგდა ჩემს ცოლს და სიმყრალე ჩემი - ჩემს ძმებს.

¹⁸ბავშვებმაც მომიძულეს, წამოვდგები და დამცინიან;

¹⁹გულითადმა მეგობრებმაც შემიზიზღეს, ვინც მიყვარდა, მტრად მომეკიდა;

²⁰საკუთარ ტყავსა და ხორცს მიეკრა ჩემი ძვლები, ღრძილებიღა შემრჩა კბილებზე.

²¹შემიბრალეთ, შემიბრალეთ, მეგობრებო, რადგან ღმერთის ხელი შემეხო!

²²ღმერთივით რად მდევნით და არ ძღებით ჩემი ხორცით?

²³ნეტავ იწერებოდეს ჩემი სიტყვები და წიგნში იბეჭდებოდეს;

²⁴რკინის საჭრისით და ტყვიით ამოიკვეთოს კლდეში სამარადისოდ!

²⁵მე კი ვიცი, რომ ცოცხალია ჩემი გამომსყიდველი და საბოლოოდ აღდგება დედამიწაზე;

²⁶კანიც რომ შემომეცლება, მაინც ჩემივე ხორცში ვიხილავ ღმერთს!

²⁷რადგან თვითონ ვიხილავ მას, ჩემი თვალები იხილავენ და არა სხვისანი. გული ჩემი გაილია ჩემში!

²⁸და თუ იტყვით, როგორ ვდევნოთ იგი, რადგან საქმის ფესვი ნაპოვნიაო მასში,

²⁹გეშინოდეთ მახვილისა, რადგან რისხვას მოაქვს მახვილის სასჯელი და იცოდეთ, რომ არის განკითხვა!”