Read Traducción Kadosh Israelita Mesiánica იობი 20 Bible Online

იობი 20 - Traducción Kadosh Israelita Mesiánica bible

იობი 20

¹მიუგო ცოფარ ნაყამათელმა და თქვა:

²"ჩემი ფიქრები მაიძულებენ პასუხს და ამის გამო ვჩქარობ,

³ჩემს შეურაცხყოფას ვისმენ და ჩემი გონიერების სული მათქმევინებს პასუხს:

⁴განა არ იცი, რომ ძველთაგან, მიწაზე ადამიანის დაფუძნებიდან ასეა:

⁵ხანმოკლეა ლხენა ბოროტეულთა, და წამიერი - უღვთოთა სიხარული?

⁶თუნდაც ცას მისწვდეს მისი დიდება და თავით ღრუბლებს შეეხოს,

⁷თავისი განავალივით გაქრება სამუდამოდ; და იკითხავენ მისი მნახველნი: სადაა იგი?

⁸სიზმარივით გაფრინდება, ვერავინ იპოვის და ღამის ხილვასავით განქარდება;

⁹თვალი, მისი მნახველი, ვეღარ იხილავს მას; ვეღარც მისი ადგილი იხილავს მას ოდესმე.

¹⁰მისი შვილები ღატაკებს სთხოვენ მოწყალებას და თავისი ხელით დაუბრუნებენ მის დოვლათს;

¹¹მისი ძვლები სავსეა სიჭაბუკით და მასთან ერთად მიიქცევიან მტვრად.

¹²თუმცა ბოროტება ეტკბილება პირში და ენის ქვეშ მალავს მას.

¹³თუმცა ენანება გადმოსაგდებად და პირში იჩერებს;

¹⁴მაინც ასპიტთა გესლად ექცევა საჭმელი მუცელში, მის შიგნეულში;

¹⁵ჩაყლაპა ნადავლი და ისევ ამოარწყევს: ღმერთი გამოუდევნის მას მუცლიდან.

¹⁶ასპიტთა გესლს წოვს იგი, უნასის ენა მოჰკლავს მას;

¹⁷ვერ იხილავს ნაკადულებსა და მდინარეებს, თაფლისა და ერბოს ნიაღვრებს;

¹⁸დააბრუნებს მონაგებს და ვერ ჩაყლაპავს; ნავაჭრის შესაბამისად ექნება სიმდიდრე, მაგრამ ვერ ნახავს კმაყოფილებას,

¹⁹რადგან ჩაგრავდა, დაივიწყა ღარიბ-ღატაკნი, დაეპატრონა სახლს, რომელიც არ აუშენებია.

²⁰ვინაიდან ვერ გაძღა მისი მუცელი და არაფერს ინდობდა თავის სიხარბეში.

²¹არაფერი მორჩენია შეუჭმელი, ამიტომაც ვერ გაძლებს მისი კეთილდღეობა.

²²ვიწროდ იქნება სრულ სიუხვეში, და ყველა ჩაგრულის ხელი მისწვდება.

²³მუცლის ამოვსებისას, ცეცხლს გამოუგზავნის ღმერთი თავის რისხვაში და ჭამისას აწვიმებს მასზე.

²⁴რკინის იარაღს გაექცევა და სპილენძის მშვილდი განგმირავს;

²⁵ამოიძრობს ისარს ზურგიდან, მაგრამ ელვა გამოვა მისი ნაღველიდან და თავზარი დაეცემა!

²⁶მისთვის ინახება საგანძურად მთელი სიბნელე; დაუნთებელი ცეცხლი შთანთქავს და სიავე მოიცავს გადარჩენილს მის კარავში!

²⁷ამხელს ზეცა მის დანაშაულს და მის წინააღმდეგ აღდგება მიწა.

²⁸მისი სახლის დოვლათი გადაივლის და სახლის სიკეთე წაილეკება უფლის რისხვის დღეს.

²⁹ეს არის ბოროტი კაცის ხვედრი ღვთისგან და ღმერთის მიერ მისთვის მიცემული მემკვიდრეობა!”