Read Traducción Kadosh Israelita Mesiánica იობი 21 Bible Online

იობი 21 - Traducción Kadosh Israelita Mesiánica bible

იობი 21

¹უპასუხა იობმა და თქვა:

²"ყურადღებით მოისმინეთ ჩემი სიტყვა და ეს იქნება თქვენი ნუგეშისცემა ჩემთვის.

³დამაცადეთ ლაპარაკი და სათქმელს რომ გეტყვით, მერე დამცინეთ!

⁴განა ადამიანს ვედავები? რად არ უნდა ვიყო სულმოკლე?

⁵შემომხედეთ და განცვიფრდით, პირზე აიფარეთ ხელი;

⁶გახსენებაც კი მაშინებს და ძრწოლა იპყრობს ჩემს ხორცს.

⁷რატომ ცოცხლობენ ბოროტეულნი, სიბერეს აღწევენ და ძლიერდებიან?

⁸უმზერენ თავისი შთამომავლობის დამკვიდრებას და თვალწინ ჰყავთ საკუთარი ნაშიერი;

⁹დაცულია მათი სახლები, შიშის გარეშეა და კვერთხი ღვთისა არაა მათზე;

¹⁰მისი ხარი ამაკებს და არ ააცდენს, მისი ფური მაკდება და მკვდარს არ იგებს.

¹¹ცხვარივით გაუშვებენ თავიანთ ბალღებს და კუნტრუშებენ მათი პატარები;

¹²დაფდაფზე და ქნარზე მღერიან და სალამურის ხმაზე მხიარულობენ;

¹³განცხრომაში ატარებენ თავიანთ დღეებს და მშვიდად ჩადიან საფლავში;

¹⁴ეტყვიან ღმერთს: გაგვშორდი, არ გვწადია შენი გზების შეცნობა!

¹⁵ვინაა ყოვლადძლიერი, რომ ვემსახუროთ? რა სარგებელია, რომ ვეძიოთ?

¹⁶აჰა, მათ ხელთ არაა მათი კეთილდღეობა; შორს არის ჩემგან ბოროტთა რჩევა!

¹⁷რამდენჯერ ჩამქრალა ბოროტეულთა ლამპარი და რამდენჯერ დასტეხიათ თავს უბედურება? რამდენჯერ უწილადა განადგურება თავისი რისხვით?

¹⁸ჩალასავით არიან ქარის წინაშე და გრიგალის მიერ მოტაცებული ბზესავით?

¹⁹თქვენ ამბობთ: ღმერთი ადამიანის სასჯელს მის შვილებს უნახავს. _ დაე თავად მათ მიაგოს ღმერთმა, რომ შეიგნონ.

²⁰საკუთარი თვალით იხილოს უბედურება და დალიოს ყოვლადძლიერის გულისწყრომის თასი!

²¹რადგან რაღაზე ენაღვლება თავისი სახლეული სიკვდილის შემდეგ, როცა მისი თვეების რიცხვი შეწყდება?

²²განა ღმერთს სიბრძნე ესწავლება, როცა ის თვითონ დიდებულთ განიკითხავს?

²³ზოგი ძალით აღსავსე კვდება, სრულიად მშვიდი და კმაყოფილი.

²⁴მისი წიაღი რძითაა სავსე და მისი ძვლები სინედლით.

²⁵ზოგი კი სულგამწარებული კვდება, ისე, რომ სიკეთე არ უგემია;

²⁶ერთად ჩაწვებიან მტვერში და ჭია შეესევა მათ.

²⁷აჰა, ვიცი მე თქვენი ფიქრები და ბოროტი ზრახვანი ჩემს წინააღმდეგ,

²⁸რადგან ამბობთ, სად არისო მთავრის სახლი და სავანე, რომელშიც მკვიდრობს ურჯულო?

²⁹ნუთუ არ გიკითხავთ გზირთათვის ან არ გსმენიათ მათი მონაყოლი,

³⁰რომ უბედურების დღეს დაზოგილია ბოროტეული, გარიდებულია რისხვის დღეს?

³¹ვინ ამხელს მას პირში მისი გზის ურჯულოების გამო? ვინ მიუზღავს ნამოქმედარისთვის?

³²გააცილებენ თავისი საფლავისაკენ და სამარხს გუშაგს დაუყენებენ;

³³ტკბილად მიიღებენ ველის გორახები, მრავალი გააცილებს მას და წინაც მრავალი წარუძღვება!

³⁴როგორღა მანუგეშებთ ამაოებით? სიცრუედ რჩება თქვენი პასუხები!”