Read Traducción Kadosh Israelita Mesiánica იობი 22 Bible Online

იობი 22 - Traducción Kadosh Israelita Mesiánica bible

იობი 22

¹მიუგო ელიფაზ თემანელმა და თქვა:

²"რა სარგებელი აქვს ღმერთს კაცისგან? ან რას არგებს მას, სიბრძნის მქონე?

³ნუთუ აამებს ყოვლადძლიერს შენი სიმართლე? ან რას სარგებლობს შენი გზების უბიწოებით?

⁴განა შენი ღვთისმოშიშების გამო შეგაგონებს, ანდა წამოვა შენთან ერთად სასამართლოში?

⁵განა დიდი არ არის შენი ბოროტება და შენი ბრალი - უსაზღვრო?

⁶რადგან არაფრის გამო ართმევდი გირაოს შენს ძმებს და სამოსელს ხდიდი ნახევრად შიშვლებს;

⁷წყურვილით ტანჯულს წყალს არ ასმევდი და მშიერს პურს არ აწვდიდი;

⁸ძლიერი კაცის არის ეს ქვეყანა და წარჩინებული მკვიდრობს აქ.

⁹ქვრივებს ხელცარიელს ისტუმრებდი და ობლების მკლავებს მუსრავდი;

¹⁰ამიტომ არის შენ გარშემო მახეები და გაძრწუნებს უეცარი შიში;

¹¹ნათელი ბნელად გადაგექცა და დიდმა წყლებმა დაგფარეს ძილში!

¹²განა ცათა მწვერვალზე არ იმყოფება ღმერთი? შეხედე ვარსკვლავთა თავანს, რა მაღალია!

¹³შენ კი ამბობ: რა იცისო ღმერთმა, სქელი ღრუბლიდან რა უნდა განსაჯოსო?!

¹⁴სქელი ღრუბელი უდევს საფარად, ვერაფერს ხედავს, ისე დადის ცის კაბადონზე.

¹⁵ნუთუ იმ ძველ ბილიკს ადგახარ, ბოროტეულნი რომ დადიოდნენ,

¹⁶რომლებიც ნაადრევად წარიტაცნენ და რომელთა საძირკველიც წარხოცა მდინარემ?

¹⁷ღმერთს უთხრეს: გაგვშორდი, რას გვარგებსო ყოვლადძლიერი?!

¹⁸მან კი სიკეთით აუვსო სახლები, თუმცაღა შორსაა ჩემგან ურჯულოთა რჩევა.

¹⁹დაინახეს ეს მართლებმა და გაეცინათ, უწიკვლოები კი დასცინოდნენ მათ:

²⁰იტყვიან: "აჰა, განადგურდა ჩვენი მტერი და ცეცხლმა შთანთქა მათი ნატამალი”.

²¹ემსახურე მას და სიმშვიდეში დარჩი, ამით მოვა შენთან სიკეთე.

²²მიიღე რჯული მისი პირიდან და გულში ჩაიდე სიტყვები მისი;

²³თუ დაუბრუნდები ყოვლადძლიერს, კვლავ აშენდები, მოაშორე უმართლობა შენს კარავს;

²⁴შენი ოქრო მტვერში გააბნიე, ოფირის ოქრო - ხევის ლოდებში;

²⁵მაშინ ყოვლადძლიერი იქნება შენთვის ოქრო და რჩეული ვერცხლი,

²⁶რადგან მაშინ დატკბები ყოვლადძლიერში და ღმერთს მიაპყრობ სახეს.

²⁷შეევედრები მას და მოგისმენს იგი და შეუსრულებ შენს დაპირებებს.

²⁸რასაც გადაწყვეტ - აგისრულდება, სინათლე გაბრწყინდება შენს გზაზე.

²⁹რადგან ამდაბლებს ამაყად მოლაპარაკეს, თვალდახრილს კი იხსნის!

³⁰იმათაც იხსნის, ვინც არაა უბიწო, აჰა, შენი ხელების სიწმიდით იხსნის მათ!”