Read Traducción Kadosh Israelita Mesiánica იობი 23 Bible Online

იობი 23 - Traducción Kadosh Israelita Mesiánica bible

იობი 23

¹მიუგო მას იობმა:

²"დღესაც კი ურჩობაა ჩემი დრტვინვა, მისი ხელი მძიმედ მაწევს ჩემი კვნესის მიუხედავად.

³ო, ნეტავ ვიცოდე, სად ვიპოვო იგი და მის სამყოფლამდე მივიდოდი,

⁴წინ დავუდებდი ჩემს სარჩელს და ჩემი პირით გავიმართლებდი თავს.

⁵მოვისმენდი მის სიტყვებს და გავიგებდი, რასაც მეტყოდა.

⁶ნუთუ მთელი თავისი ძლიერებით იპაექრებდა ჩემთან? არა, უსათუოდ ყურს დამიგდებდა!

⁷იქ შეუძლია წრფელს გამართლება, სამუდამოდ დავიხსნიდი თავს ჩემი მსაჯულისგან;

⁸აჰა, წინ მივდივარ და არ არის იგი, უკან და - ვერ ვპოვებ მას;

⁹ჩემს მარცხნივ თუ იქმს რასმე - ვერ ვამჩნევ, მარჯვნივაა შეფარული და ვერ ვხედავ მას.

¹⁰თუმცა იცის მან ჩემი გზები, რომლითაც დავდივარ და როცა გამომცდის, ოქროსავით ხალასი გამოვალ.

¹¹მტკიცედ მისდევს ჩემი ტერფი მის ნაფეხურებს, მის გზას ვიცავდი და გვერდზე არ გადამიხვევია;

¹²მის ბაგეთა მცნება არ მიმიტოვებია და საკუთარ საზრდოზე მეტად ვიცავდი მისი პირის სიტყვებს;

¹³თუ გადაწყვიტა, ვინ შეაცვლევინებს აზრს? რასაც მოისურვებს მისი სული, იმას გააკეთებს;

¹⁴რადგან ის აღასრულებს ჩემთვის დაწესებულს და მრავალი ასეთი განზრახვა აქვს მას.

¹⁵ამიტომ ვკრთი მისი სახის წინაშე, ჩავუკვირდები და მეშინია მისი.

¹⁶ღმერთმა დამიძაბუნა გული და ყოვლადძლიერმა შემაძრწუნა;

¹⁷მაგრამ სიბნელემ ვერ დამადუმა და ვერც წყვდიადმა დამიფარა სახე.