Read Traducción Kadosh Israelita Mesiánica იობი 24 Bible Online

იობი 24 - Traducción Kadosh Israelita Mesiánica bible

იობი 24

¹"რატომ არ დაადგინა ვადები ყოვლადძლიერმა? და რად ვერ ხედავენ მისი შემცნობელნი მის დღეებს?

²საზღვრებს ანაცვლებენ ბოროტეულნი, ნახირს იტაცებენ და მწყემსავენ;

³ობოლთა სახედრებს ერეკებიან და ქვრივის ხარი გირაოში მიჰყავთ;

⁴გაჭირვებულს ხელს კრავენ გზიდან; ერთიანად მიიმალნენ ქვეყნის ღარიბნი.

⁵აჰა, უდაბნოს ველური სახედრებივით გადიან თავის საქმეზე, საზრდოს საძებრად; ტრამალი აძლევს მათ პურს მათი შვილებისთვის.

⁶სხვის ყანაში იმკიან და ბოროტეულთა ვენახებს კრეფენ;

⁷შიშვლად ათევენ, უსამოსელოდ, წასაფარებელი არა აქვთ სიცივეში;

⁸მთების თქეშში ილუმპებიან და შესაფარებლად კლდეს ეკვრიან.

⁹ძუძუდან მოსწყვეტენ ობოლს და მიჰყავთ ღარიბისგან გირაოდ.

¹⁰შიშვლები დაწანწალებენ უსამოსლოდ და მშივრები დაატარებენ ძნებს.

¹¹ზეთს ხდიან მათ სამყოფელში და ყურძენს წურავენ საწნახლებში, თავად კი წყურვილით იტანჯებიან;

¹²კვნესის ხალხი ქალაქში და შველას ითხოვენ დაჭრილთა სულები, ღმერთი კი ყურს არ უგდებს მათ ვედრებას;

¹³სინათლის წინააღმდეგ ამბოხებულთაგან არიან ესენი, არ აღიარებენ მის გზებს და არ რჩებიან მის ბილიკებზე.

¹⁴განთიადზე დგება მკვლელი, კლავს ღარიბსა და გლახაკს, ღამით კი ქურდობს.

¹⁵მრუშის თვალი კი ამბობს ბინდის მოლოდინში: "ვერავინ დამინახავს და საფარველს იფარებს სახეზე”.

¹⁶სახლებს ძირს უთხრიან ბნელში, დღისით კი თავისთვის იკეტებიან, არ იციან ნათელი;

¹⁷წყვდიადი მათთვის დილაა, რადგან შეეთვისნენ ბნელეთის საშინელებებს;

¹⁸ქაფივით არიან წყლის ზედაპირზე; დაწყევლილია მათი წილი ქვეყანაზე და ვეღარ დაუბრუნდებიან თავიანთი ვენახების გზას.

¹⁹გვალვა და სიცხე შთანთქავს თოვლის წყალს, შავეთი კი - ცოდვილებს;

²⁰დაივიწყებს მათ დედის საშო, დატკბება მათით მატლი და ჭია, აღარავის გაახსენდება, ხესავით გატყდება ბოროტი;

²¹ბერწსა და უშვილოს რომ თრგუნავს, და კეთილად არ ექცევა ქვრივს;

²²ძლიერებსაც ძლევს თავისი ძლიერებით, წამოდგებიან, მაგრამ სიცოცხლის იმედი აღარ ექნებათ.

²³სიმშვიდეს აძლევს მათ, თუმცა თვალს არ აშორებს მათ გზებს;

²⁴ცოტა ხნით აღზევდებიან და, აჰა, აღარ არიან; ეცემიან და კვდებიან ყველას მსგავსად, და თავთავებივით მოიჭრებიან.

²⁵ასე არ არის? ვინ გამამტყუნებს, ვინ გამიარაფრებს სიტყვას?”