Read Traducción Kadosh Israelita Mesiánica იობი 27 Bible Online

იობი 27 - Traducción Kadosh Israelita Mesiánica bible

იობი 27

¹კვლავ განაგრძო იობმა თავისი სათქმელი:

²"ცოცხალია ღმერთი, რომელმაც მართლმსაჯულება წამართვა და ყოვლადძლიერი, რომელმაც სული გამიმწარა,

³ვიდრე ვსუნთქავ და ღმერთის სუნთქვაა ჩემს ნესტოებში,

⁴არ წარმოთქვამენ ჩემი ბაგენი უსამართლობას და არ იტყვის სიცრუეს ჩემი ენა!

⁵შორს იყოს ჩემგან, რომ გაგამართლოთ, სიკვდილამდე არ განვიშორებ ჩემს უმწიკვლობას!

⁶ჩემს სიმართლეს ვეჭიდები და არ მოვეშვები, დღემდე არ გავუმტყუნებივარ ჩემს გულს;

⁷იყოს ჩემი მტერი დამნაშავესავით და ჩემი მოწინააღმდეგე - უმართლოსავით!

⁸რადგან რა არის უღმერთოს იმედი, როცა მოჰკვეთს, როცა სულს ამოართმევს მას ღმერთი?

⁹განა შეისმენს ღმერთი მის ღაღადს, როცა გასაჭირი წამოადგება თავზე?

¹⁰განა გაიხარებს იგი ყოვლადძლიერში და ღმერთს მოუხმობს ყოველ ჟამს?

¹¹მე თქვენ გასწავლით ღვთის ძალის შესახებ და ყოვლადძლიერის გზებს არ დავმალავ.

¹²აჰა, ყველას გაქვთ ნანახი და რაღად გინდათ ამაო ლაპარაკი?

¹³ეს არის უღმერთოთა ხვედრი ღმერთისგან და მოძალადეთა მემკვიდრეობა, რომელსაც მიიღებენ ყოვლადძლიერისგან!

¹⁴თუნდაც გამრავლდნენ მისი ძენი, მახვილისთვის იქნებიან და ვერ გაძღება პურით მისი შთამომავლობა;

¹⁵გადარჩენილნი ჭირით დასამარდებიან და მათი ქვრივები ვერ იგლოვებენ;

¹⁶თუნდაც მტვერივით დაიხვავოს ვერცხლი, და ტალახივით გაიმრავლოს სამოსელი,

¹⁷ის მოამზადებს და მართალი ჩაიცვამს, ვერცხლს კი უდანაშაულო დაანაწილებს;

¹⁸ჩრჩილივით იშენებს სახლს და ქოხს იკეთებს, დარაჯივით;

¹⁹წვება მდიდარი და არაფერი აქვს შესაძენი, თვალს გაახელს და აღარაფერია მისი ქონებიდან.

²⁰ნიაღვარივით მიეწევა საშინელებანი; ღამით მოიპარავს მას ქარიშხალი;

²¹წარიტაცებს აღმოსავლეთის ქარი და წავა; გააქროლებს მისი ადგილიდან.

²²მოისვრის მას და არ შეიბრალებს; ამაოდ ეცდება, გაექცეს მის ხელს;

²³ტაშს შემოკრავენ მასზე და სტვენას დაუწყებენ მისი ადგილიდან.