Read Traducción Kadosh Israelita Mesiánica იობი 28 Bible Online

იობი 28 - Traducción Kadosh Israelita Mesiánica bible

იობი 28

¹"ჭეშმარიტად, ვერცხლს თავისი საბადო აქვს და ოქროს - ადგილი, სადაც მას ასუფთავებენ.

²რკინას მიწიდან იღებენ, სპილენძს კი მადნიდან ადნობენ.

³ზღვარი დაუდო კაცმა სიბნელეს და ქვეყნის კიდემდე ეძებს წიაღისეულს წყვდიადსა და სიბნელის სიღრმეებში.

⁴მაღაროს თხრიან მიწის სიღრმეში, უკაცრიელ ადგილებში. კაცთაგან შორს არიან გამოკიდებულნი და ქანაობენ.

⁵ცეცხლივით არის აბრუნებული ქვეშეთი მიწისა, საიდანაც აღმოცენდება პური,

⁶მისი ქვები საფირონის საბადოა და ოქროს მტვერია მასში.

⁷მისი ბილიკი არ იცის მტაცებელმა ფრინველმა, შევარდენს თვალი არ მოუკრავს მისთვის;

⁸ამაყ მხეცებს ფეხი არ დაუდგამთ იქ, ლომს არ გაუვლია მასზე.

⁹სალი კლდისკენ გაიშვირა ხელი, ძირფესვიანად აყირავებს მთებს;

¹⁰არხები გაჰყავს კლდეებში და ყოველივე ძვირფასს ხედავს მისი თვალი;

¹¹მდინარეთა ნიაღვრებს აკავებს, და სინათლეზე გამოაქვს დაფარული.

¹²მაგრამ სად იპოვება სიბრძნე? სად არის ცოდნის ადგილი?

¹³მისი ფასი არ იცის კაცმა და ცოცხალთა ქვეყანაში არ იპოვება.

¹⁴უფსკრული ამბობს: ის ჩემში არ არის; ზღვაც ამბობს: ჩემთან არ არის!

¹⁵არ გაიცვლება იგი ოქროში და ვერ აიწონება ვერცხლი მის ფასად;

¹⁶არ შეფასდება ოფირის ოქროდ, არც ძვირფასი ონიქსით და არც საფირონით;

¹⁷ვერ გაუსწორდება მას ოქრო და ბროლი, ვერც ბაჯაღლოს ჭურჭელში გაიცვლება იგი!

¹⁸მარჯანი და ბროლი არაფერია მასთან, მარგალიტზე ძვირფასია სიბრძნე!

¹⁹ვერ გაუსწორდება მას ეთიოპიის ტოპაზი, სუფთა ოქროთი არ შეფასდება.

²⁰საიდან მოდის სიბრძნე და სად მკვიდრობს გონიერება?

²¹დაფარულია იგი ყოველი ცოცხალის თვალთაგან და თვალთაგან ცის ფრინველებისა;

²²ქვესკნელი და სიკვდილი ამბობენ: სმენია მისი ამბავი ჩვენს ყურებს.

²³ღმერთმა იცის მისი გზა და მან უწყის მისი ადგილი,

²⁴რადგან ის გაჰყურებს დედამიწის კიდეებს და ხედავს მთელ ცისქვეშეთს.

²⁵როდესაც ქარს წონას უწესებდა და წყალი არწყა საწყაულით;

²⁶წვიმას საზომი დაუდგინა და ჭექა-ქუხილს გზა-სავალი!

²⁷მაშინ იხილა სიბრძნე და გამოაცხადა; დააფუძნა და გამოიკვლია;

²⁸უთხრა ადამიანს: აჰა, უფლის შიშია სიბრძნე და ბოროტისგან განდგომა - გონიერება!”