Read Traducción Kadosh Israelita Mesiánica იობი 29 Bible Online

იობი 29 - Traducción Kadosh Israelita Mesiánica bible

იობი 29

¹განაგრძო იობმა თავისი სათქმელი და თქვა:

²"ნეტავ ისევ ისე ვიყო, უწინდელ თვეებში რომ ვიყავი, როცა ღმერთი მფარველობდა.

³როცა თავს ზემოთ მისი ლამპარი მინათებდა და მისი სინათლით დავდიოდი ბნელში;

⁴ჩემი ცხოვრების საუკეთესო დროს, როცა ღვთის მეგობრობა იცავდა ჩემს კარავს.

⁵როცა ჯერ კიდევ ყოვლადძლიერი იყო ჩემთან და გარს ჩემი შვილები მეხვივნენ;

⁶როცა რძეში ვიბანდი ფეხებს და კლდიდან მოედინებოდა ჩემთვის ზეთის ნაკადები!

⁷ქალაქის კარიბჭესთან გავიდოდი და მოედანზე ვიმზადებდი სავარძელს;

⁸დამინახავდნენ ყმაწვილები და განზე დგებოდნენ, წამოიმართებოდნენ მოხუცები და ფეხზე იდგნენ;

⁹მთავარნი თავს იკავებდნენ საუბრისგან და პირზე ხელს იფარებდნენ;

¹⁰დიდებულებს ხმა უწყდებოდათ და სასაზე ეკვროდათ ენა.

¹¹ყური მისმენდა და მაკურთხებდა, თვალი მხედავდა და მემოწმებოდა;

¹²რადგან მიხსნია ღატაკი - შველას რომ ითხოვდა და ობოლი - შემწე რომ არ ჰყავდა;

¹³მომაკვდავი კაცი მაკურთხებდა და ქვრივის გულს ვახარებდი;

¹⁴სიმართლით ვიმოსებოდი, მართლმსაჯულება მქონდა მოსასხამად და სამართალი იყო ჩემი თავსაბურველი.

¹⁵ბრმისთვის თვალები ვიყავი და კოჭლისთვის - ფეხები;

¹⁶გლახაკთ მამობას ვუწევდი და ჩემთვის უცხოთა დავას ვიკვლევდი;

¹⁷ბოროტი კაცისთვის ყბები დამილეწავს და კბილებიდან გამომიგლეჯია მიტაცებული;

¹⁸ვფიქრობდი: ჩემს ბუდეში მოვკვდები და ქვიშასავით გამიმრავლდება-მეთქი დღეები.

¹⁹ჩემი ფესვები წყლამდეა გაშლილი და ცვარი ათევს ღამეს ჩემს რტოებზე.

²⁰დიდება ჩემი არ ჭკნება და მტკიცეა მშვილდი ჩემს ხელში;

²¹კაცები მისმენდნენ და მელოდებოდნენ, დუმდნენ ჩემს რჩევაზე;

²²ჩემი სიტყვის შემდეგ ხმას აღარ იღებდნენ, ღრუბელივით ისრუტავდნენ ჩემს ნათქვამს;

²³წვიმასავით მელოდნენ და როგორც ნაგვიანევ წვიმას, პირს მიშვერდნენ.

²⁴გავუცინებდი და არ ეჯერათ, ჩემი სახის ნათელს არ აკნინებდნენ;

²⁵გზებს ვურჩევდი მათ და ვთავკაცობდი, ვმკვიდრობდი, როგორც მეფე მხედრობაში, როგორც მგლოვიარეთა ნუგეშისმცემელი!