Read Traducción Kadosh Israelita Mesiánica იობი 3 Bible Online

იობი 3 - Traducción Kadosh Israelita Mesiánica bible

იობი 3

¹მერე გახსნა იობმა პირი და დასწყევლა თავისი გაჩენის დღე.

²ალაპარაკდა იობი და თქვა:

³"ის დღე დაიქცეს, როცა დავიბადე და ის ღამე, როცა ითქვა: ‘კაცი ჩაისახა!’

⁴წყვდიადად იქცეს ის დღე, აღარ მოხედოს მას ღმერთმა თავისი სიმაღლიდან და აღარც ნათელი გააბრწყინოს მასზე!

⁵ბნელში დაინთქას და სიკვდილის აჩრდილმა მოიცვას იგი, ღრუბელმა დაფაროს და შეაძრწუნოს იგი დღის სიშავემ!

⁶წყვდიადმა შეიპყროს ის ღამე, ნუღარ აღირიცხოს წლის დღეებში და თვეთა რიცხვში ნუღარ შევა!

⁷აჰა, გაბერწდეს ის ღამე და ნუღარ იქნება მასში სიხარულის შეძახილი.

⁸სწყევლონ იგი დღის მაწყევრებმა, რომლებიც მზად არიან ლევიათანი გააღვიძონ!

⁹დაბნელდნენ მისი გარიჟრაჟის ვარსკვლავნი, ნათელს ელოდოს და არ მოვიდეს, ნუ იხილავს გაცისკროვნებას.

¹⁰რადგან დედაჩემის საშოშივე არ დამიხშო კარი და არ დაფარა ტანჯვა ჩემი თვალისაგან.

¹¹რატომ არ მოვკვდი დაბადებისას, რად არ მოვისპე მუცლიდან გამოსვლისას?

¹²რად მიმიღეს ბებიაქალის მუხლებმა და ძუძუს რისთვის ვწოვდი?

¹³რადგან ვიწვებოდი და მშვიდად ვიქნებოდი, ვიძინებდი და მოვისვენებდი,

¹⁴მეფეებთან და ქვეყნის მრჩევლებთან, თავისთვის სამარხთა აღმშენებლებთან

¹⁵ან მთავრებთან, რომელთაც ოქრო ჰქონდათ და ვერცხლით ივსებდნენ სახლებს.

¹⁶არ ვიარსებებდი ნაადრევად მოწყვეტილი გადამალული ჩვილებივით, რომელთაც არ უხილავთ ნათელი.

¹⁷შფოთვას წყვეტენ იქ ბოროტები და განისვენებენ ძალაგამოლეულნი.

¹⁸მშვიდად არიან ტუსაღნი, აღარ ესმით ზედამხედველთა ხმა.

¹⁹მცირეც იქაა და დიდიც, მონაც თავისუფალია თავისი ბატონისგან.

²⁰რატომ ეძლევა სინათლე წამებულს და სიცოცხლე სულგამწარებულს,

²¹სიკვდილს რომ მოელის, ის კი არ მოდის! და დაფარული საუნჯესავით ეძიებს მას?

²²სიხარულის ყიჟინას რომ დასცემს, როცა საფლავს იპოვის?

²³რისთვის მიეცა სიცოცხლე კაცს, რომლისგანაც დაფარულია გზა და რომელიც ალყაში ჰყავს ღმერთს მოქცეული?

²⁴რადგან ოხვრა მაქვს საზრდოდ და წყალივით იღვრება ჩემი ქვითინი.

²⁵რადგან, რისიც მეშინოდა, ის დამატყდა და რაც მაძრწუნებდა, ის არ ამცდა.

²⁶არ მაქვს სიმშვიდე, აღარც სიწყნარე, აღარც მოსვენება. უბედურება მეწია”.