Read Traducción Kadosh Israelita Mesiánica იობი 30 Bible Online

იობი 30 - Traducción Kadosh Israelita Mesiánica bible

იობი 30

¹"ახლა კი დამცინიან ჩემზე უმცროსნი, რომელთა მამებს ჩემი ფარის ძაღლებშიც არ გავრევდი.

²რაღაში მჭირდება მათი ხელების ძალა? დაილია მათი ძლიერება;

³ნაკლოვანებითა და შიმშილით დაუძლურებულნი გარბიან გვალვიან უდაბნოში, დაცარიელებულსა და გახრიოკებულ ტრამალებში;

⁴მწარე ბალახს წიწკნიან ჯაგებთან და კურდღლისცოცხას ფესვებია მათი პური.

⁵კაცთაგან აძევებენ და, როგორც ქურდს, ისე მიჰკივიან;

⁶უდაბურ ხეობებში და მიწის ნაპრალებში ცხოვრობენ,

⁷ბუჩქებს შორის ყროყინებენ და ჯაგნარში შეყუჟულან;

⁸განდევნილი იყვნენ ქვეყნიდან უგუნურთა და უსახელოთა ძეები!

⁹ახლა მათი საშაირო და სალაპარაკო გავხდი;

¹⁰ვეზიზღები, გამირბიან და სახეში ფურთხებასაც არ ერიდებიან;

¹¹რადგან მან ახსნა საბელი და დამტანჯა, პირწინ დამიგდეს აღვირი;

¹²მარჯვნივ მათი ნაშიერნი აღმიდგნენ, ფეხები ამიბლანდეს და ჩემკენ მომართეს თავიანთი წარწყდომის გზები;

¹³გზასავალი დამინგრიეს, ჩემი უბედურებით სარგებლობენ, არავინ აკავებს მათ.

¹⁴ფართო ხვრელიდან გამოექანნენ ჩემკენ, გრიალით დამეცნენ,

¹⁵საშინელებანი დამატყდა თავს, ქარივით გადაიქროლა ჩემმა დიდებამ და ღრუბელივით გადავიდა ჩემი კეთილდღეობა.

¹⁶ახლა კი იღვრება ჩემში სული ჩემი და ტანჯვის დღეები მეჭიდებიან.

¹⁷ღამით ძვლები მტეხს და ტკივილი მღრღნის, არ მიამდება;

¹⁸დიდი ტანჯვით ვიხდი სამოსელს, კვართის საყელოსავით მიჭერს მოსასხამი;

¹⁹ლაფში მისროლა და დავემსგავსე მტვერსა და ნაცარს.

²⁰შემოგღაღადებ და პასუხს არ მცემ; ვდგავარ და არაფრად მაგდებ.

²¹სასტიკი გახდი ჩემ მიმართ; მდევნი შენი ხელის ძლიერებით.

²²ამწიე და ქარზე ამამხედრე, დამაქროლებ და მაცამტვერებ;

²³ვიცი, რომ სასიკვდილოდ მიგყავარ, ყოველი ცოცხალის შესაკრებელ სახლში.

²⁴ნანგრევებში მყოფს ხელს არავინ უწვდის, როცა საშველად მოუხმობენ თავიანთი უბედურების დროს.

²⁵განა არ მიტირია უბედურისთვის? არ დამიმწუხრებია სული ღარიბ-ღატაკისთვის?

²⁶როცა სიკეთის იმედი მქონდა ბოროტი მოვიდა; ნათელს ველოდი და ბნელი მეწია.

²⁷შიგნეული მიდუღს და არ ცხრება: ტანჯვის დღეები დამიდგა;

²⁸მგლოვიარე დავდივარ უმზეოდ; კრებულში ვდგავარ და საშველად შემოგღაღადებ;

²⁹ტურებს გავუხდი ძმად და სირაქლემას დავუმეგობრდი.

³⁰კანი გამიშავდა და სიცხისგან ძვლები მივარვარებს.

³¹გოდებად იქცა ჩემი ქნარი და მოტირალთა ხმად - ჩემი სალამური.