Read Traducción Kadosh Israelita Mesiánica იობი 33 Bible Online

იობი 33 - Traducción Kadosh Israelita Mesiánica bible

იობი 33

¹"აბა, მოისმინე, იობ, ჩემი სიტყვები და ყურად იღე ყოველი ჩემი გამონათქვამი.

²აჰა, გავხსენი ბაგე და ალაპარაკდა ჩემი ენა ჩემს პირში;

³გულწრფელად ვილაპარაკებ სიტყვებს და ნათლად გამოთქვამენ ცოდნას ჩემი ბაგენი;

⁴ღმერთის სულმა შემქმნა და ყოვლისშემძლის სუნთქვა მასულდგმულებს.

⁵თუ ძალგიძს - მიპასუხე, მოემზადე და წინ დამიდექი;

⁶აჰა, მეც შენსავით ვარ ღმერთის წინაშე, მეც თიხისგან ვარ გამოძერწილი.

⁷აჰა, ჩემი შიში შენ არ შეგაშინებს და ჩემი ხელი შენ არ დაგამძიმებს;

⁸აკი ეუბნებოდი ჩემს ყურს და შენი სიტყვების ხმა გავიგონე:

⁹სუფთა ვარო და უცოდველი, უმწიკვლო და უდანაშაულო;

¹⁰მაგრამ მინახაო საბაბი და თავის მტრად შემრაცხა;

¹¹ბორკილები დამადოო ფეხებზე და ყოველ ჩემს ნაბიჯს აკვირდება!

¹²აი, ამაში არა ხარ მართალი. გიპასუხებ - რადგან ადამიანზე დიდია ღმერთი.

¹³რატომ ეპაექრები? თავის არც ერთ ნამოქმედარზე არ ჩაგაბარებს ანგარიშს.

¹⁴ვინაიდან ერთხელ იტყვის ღმერთი და ორჯერ, მაგრამ ვერავინ ამჩნევს.

¹⁵სიზმარში, ღამის ხილვაში, როცა სარეცელზე თვლემს კაცი და ძილქუში ეცემა.

¹⁶მაშინ უხსნის ადამიანებს ყურებს და თავის შეგონებებს ბეჭდავს მათში,

¹⁷რომ ბოროტი საქმისგან მოაბრუნოს იგი და ამპარტავნებისგან იხსნას კაცი,

¹⁸რათა იხსნას იგი შავეთისგან და მისი სიცოცხლე - მახვილით დაღუპვისგან;

¹⁹ტკივილით შეაგონებს თავის სარეცელზე და არ უამდება ძვლები,

²⁰ისე რომ პური შესძაგდება მის სიცოცხლეს და მის სულს - სანატრელი საჭმელი.

²¹დადნება მისი ხორცი, აღარ გამოჩნდება და გამოჩნდებიან მისი ძვლები, რომლებიც არ ჩანდნენ.

²²საფლავს მიუახლოვდება იგი და მისი სიცოცხლე - სიცოცხლის მომსწრაფველებს;

²³მაგრამ, თუ აღმოჩნდება ათასში ერთი ანგელოზი, მისი მეოხი, რომ შეახსენოს კაცს, რა არის სიმართლე,

²⁴შეიწყალებს მას და იტყვის: "იხსენი იგი საფლავისგან: მისთვის ნაპოვნი მაქვს გამოსასყიდი!”

²⁵ყმაწვილკაცივით განუახლდება ხორცი და სიჭაბუკის წლებს დაუბრუნდება;

²⁶შესთხოვს ღმერთს, ღმერთი კი შეიწყალებს მას, სიხარულით შეხედავს მის სახეს და სიმართლეს აღუდგენს კაცს.

²⁷შეხედავს ადამიანებს და იტყვის: შევცოდე და სწორი გავაუკუღმართე, მაგრამ საზღაური არ მომაგო.

²⁸ორმოში ჩასვლისგან გამომისყიდა და სინათლეს იხილავს სიცოცხლე ჩემი.

²⁹აჰა, ამ ყოველივეს ხანდახან სამგზის უკეთებს ღმერთი ადამიანს.

³⁰რომ გამოაბრუნოს მისი სული ორმოდან და სიცოცხლის სინათლით განათლდეს იგი.

³¹ყური დამიგდე, იობ, მომისმინე, დადუმდი და მე ვილაპარაკებ.

³²თუ რამ სათქმელი გაქვს, მიპასუხე, რადგან შენი გამართლება მწადია.

³³და თუ არა - მე მომისმინე, დადუმდი და გასწავლი სიბრძნეს”.