Read Traducción Kadosh Israelita Mesiánica იობი 34 Bible Online

იობი 34 - Traducción Kadosh Israelita Mesiánica bible

იობი 34

¹განაგრძო ელიჰუმ და თქვა:

²"ისმინეთ, ბრძენნო, ჩემი სიტყვები! ყური მომაპყარით, მცოდნენო.

³რადგან ყური გამოსცდის სიტყვებს, სასა კი საჭმელს უგებს გემოს;

⁴ავირჩიოთ სამართალი და ჩვენს შორის ვიცოდეთ, რა არის კარგი.

⁵რადგან თქვა იობმა: მართალი ვარ და ღმერთმა წამართვაო სამართალი;

⁶გამტყუნდა ჩემი სამართალი! უკურნებელია ჩემი იარა, თუმცა უდანაშაულო ვარო.

⁷ვინ არის იობის მსგავსი კაცი, დაცინვას რომ სვამდეს წყალივით?

⁸უმართლობის ჩამდენთაკენ რომ მიემართება და ბოროტეულის გზებით რომ დაიარება?

⁹რადგან თქვა: არაფრად არგიაო კაცს, რომ ღმერთს აამოს.

¹⁰ამიტომ ისმინეთ ჩემი, გამგებო კაცებო! შორს არის ღმერთი ბოროტებისგან და ყოვლადძლიერი უმართლობისგან!

¹¹რადგან თავისი საქმისამებრ მიუზღავს ადამიანს, და მისი გზისამებრ მიაგებს კაცს.

¹²ჭეშმარიტად, არ ჩაიდენს ბოროტებას ღმერთი და არ გაამრუდებს სამართალს ყოვლადძლიერი!

¹³ვინ ჩააბარა მას დედამიწა? ვინ მიანდო მას მთელი სამყარო?

¹⁴თუ თავისკენ მიაბრუნა თავისი გული და უკანვე წაიღო თავისი სული და სუნთქვა,

¹⁵ერთიანად გაწყდება ყოველი ხორციელი და მიწის მტვერს დაუბრუნდება ადამიანიც.

¹⁶თუ გაგება გაქვს, მოისმინე ეს, ყურად იღე ჩემი სიტყვები!

¹⁷ნუთუ სამართლის მოძულე იგანმგებლებს? ნუთუ მსჯავრს დასდებ ძალმოსილ მართალს?

¹⁸ვინ ეუბნება მეფეს: არარაობავ! და დიდგვაროვანს - უკეთურო!

¹⁹ვინ არ ელაქუცება მთავრებს და მდიდარს ღარიბზე მეტად არ თვლის, რადგან ყველანი მისი ხელით არიან შექმნილნი.

²⁰წამში დაიხოცებიან ისინი; შუაღამეს იძვრის ხალხი და იღუპება; წაიყვანენ და მოაშორებენ ძლიერს კაცის ხელის გარეშე,

²¹რადგან კაცის გზებზეა მისი თვალები და ის ხედავს მის ყოველ ნაბიჯს.

²²არც წყვდიადია და არც შავეთის ჯურღმული, რომ იქ დაიმალონ დანაშაულის მოქმედნი;

²³რადგან არავის უწესებს ვადას იგი, რომ მივიდეს ღმერთთან სამსჯავროზე;

²⁴გამოკვლევის გარეშე ამსხვრევს ძლიერთ და მათ ნაცვლად სხვებს აყენებს,

²⁵რადგან იცის მათი ნამოქმედარი, ღამით დაამხობს მათ და შეიმუსრებიან;

²⁶დაჰკრავს მათ, ბოროტეულთა მსგავსად, ყველას დასანახად,

²⁷იმიტომ, რომ ზურგი აქციეს მას და არ შეიმეცნეს მისი გზები;

²⁸მივიდა მასთან ღატაკთა ღაღადი და ესმის მას ჩაგრულთა მუდარა;

²⁹როცა დუმს იგი, ვინ არის მისი მსჯავრმდებელი? როცა სახეს მალავს, ვინ არის მისი მხილველი? ხალხი იქნება ეს თუ ერთი კაცი.

³⁰რომ არ იმეფოს უღვთო კაცმა ხალხის საცდუნებლად.

³¹თუ უთქვამს ვინმეს ღმერთისთვის: ვიტვირთე სასჯელი, აღარ შევცოდავ;

³²შენ მასწავლე, რასაც ვერ ვხედავ; თუ დანაშაული ჩავიდინე, აღარ ჩავიდენ.

³³განა შენი განსჯისამებრ უნდა მიაგებდეს იგი, როცა მის სიმართლეს უარყოფ? შენ უნდა აირჩიო და არა მე, ილაპარაკე, რაც იცი.

³⁴გამგები ადამიანი მეტყვის, და ბრძენი ადამიანი, მე რომ მისმენს:

³⁵იობი უაზროდ ლაპარაკობს, მის სიტყვებში სიბრძნე არ არისო.

³⁶ნეტავი ბოლომდე გამოიცდებოდეს იობი, ბოროტეულთა მსგავსად რომ პასუხობს,

³⁷რადგან თავის ცოდვას ამბოხს უმატებს, ხელს ხელზე ურტყამს და ღვთის საწინააღმდეგო სიტყვებს ამრავლებს ჩვენ შორის!”