Read Traducción Kadosh Israelita Mesiánica იობი 36 Bible Online

იობი 36 - Traducción Kadosh Israelita Mesiánica bible

იობი 36

¹განაგრძო ელიჰუმ და თქვა:

²„ცოტა მაცალე და გაიგებ, რომ ჯერ კიდევ არის ღვთის სასარგებლოდ სათქმელი სიტყვები.

³შორიდან წამოვიღებ ჩემს აზრს და სიმართლეს მივაგებ შემოქმედს,

⁴რადგან ნამდვილად არ არის სიცრუე ჩემს სიტყვებში; რადგან ცოდნაში უნაკლო შენს წინაშეა.

⁵აჰა, ძლიერია ღმერთი და არავინ სძულს; ის სიბრძნის ძალითაა ძლიერი.

⁶დიდხანს არ აცოცხლებს ბოროტეულს და სამართალს მიაგებს ჩაგრულთ;

⁷თვალს არ მოაშორებს მართლებს, აღამაღლებს მათ და მეფეთა ტახტზე დასვამს სამარადისოდ.

⁸და თუ ვინმეს ბორკილები ადევს ან ტანჯვის საბელით არის შეკრული,

⁹გამოუცხადებს მათ თავიანთ ნამოქმედარს და დანაშაულს, რადგან გაამაყდნენ ისინი;

¹⁰ყურებს გაუხსნის შეგონებისთვის და უბრძანებს, რომ განუდგნენ ბოროტებას.

¹¹თუ გაუგონებენ და ემსახურებიან, კურთხევაში დაასრულებენ დღეებს და წლებს - ნეტარებაში.

¹²და თუ არ გაუგონებენ - მახვილით დაეცემიან და უმეცრებაში დაიხოცებიან.

¹³უღმერთო გული რისხვით აღიძვრება, შველას არ ითხოვს, როდესაც ბორკავს მას.

¹⁴ახალგაზრდობაშივე კვდებიან და მათი სიცოცხლე თავდება საკერპოს მეძავებში.

¹⁵ის იხსნის ტანჯულს მისივე ტანჯვით და თრგუნვისას ყურს უხსნის მათ.

¹⁶შენც გამოგიყვანდა სივიწროვიდან სიფართოვეში, გაშლილ ადგილზე, სადაც არ არის წუხილი და შენი სუფრაც გაივსებოდა მსუყე საჭმელებით.

¹⁷მაგრამ უკეთური განკითხვით ავსებულხარ, განსჯა ჩაგჭიდებია შენ და მართლმსაჯულება.

¹⁸გაფრთხილდი, ბრაზმა მასხარად არ გაქციოს და დიდმა გამოსასყიდმა არ გადაგახვევინოს.

¹⁹გიშველის ყვირილი გასაჭირში, ოქრო ან მთელი შენი ძალისხმევა?

²⁰ნუ ინატრებ იმ ღამეს, როცა ხალხები აიყრებიან თავიანთი ადგილებიდან;

²¹გაფრთხილდი, რომ არ მიუბრუნდე ავკაცობას, რადგან ამით სატანჯველს ირჩევ.

²²აჰა, ღმერთი თავისი ძლიერებითაა ამაღლებული, ვინ არის მისი მსგავსი მასწავლებელი?

²³ვის დაუწესებია მისთვის გზები? ვის უთქვამს: დანაშაული ჩაიდინეო?

²⁴გახსოვდეს, რომ შენ უნდა ადიდო მისი საქმე, რომელსაც ხალხი უგალობს.

²⁵ყველა ადამიანს უნახავს მისი საქმე და შორიდანვე ამჩნევს მას კაცი.

²⁶აჰა, ამაღლებულია ღმერთი და ვერ შევიცნობთ მას, ვინ გამოიკვლევს მის წელთა რიცხვს.

²⁷შეკრებს წყლის წვეთებს და წვიმად და ნისლად ასხურებს მათ,

²⁸ღვრიან მათ ღრუბლები და უხვად ესხურება ადამიანს.

²⁹თუ ხვდება ვინმე ღრუბლების გაშლას, ქუხილს - მისი კარვიდან?

³⁰აჰა, გაშლის მასზე თავის ელვას და დაფარავს ზღვის სიღრმეებს,

³¹რადგან ამით განსჯის ხალხებს და უხვად იძლევა საზრდოს.

³²ხელისგულებს ელვით ივსებს და უბრძანებს, ვინ განგმიროს.

³³ქუხილი გვაუწყებს მასზე და ჯოგი - გრიგალის ამოვარდნას.