Read Traducción Kadosh Israelita Mesiánica იობი 37 Bible Online

იობი 37 - Traducción Kadosh Israelita Mesiánica bible

იობი 37

¹„ესეც აძრწუნებს ჩემს გულს, ლამის ამომივარდეს საგულედან.

²გულისყურით მოისმინეთ მისი ხმის გრგვინვა და გუგუნი, მისი პირიდან რომ გამოდის.

³მთელ ცის ქვეშეთში აგზავნის მას და ელვა მისი დედამიწის კიდეებს სწვდება;

⁴ელვას თან მოსდევს მისი ხმის გრგვინვა; ქუხს თავისი დიადი ხმით და არა წყვეტს ელვას, როცა მისი ხმა ისმის.

⁵გრგვინავს ღმერთი თავის საკვირველ ხმაზე, იქმს დიად საქმეებს, ვერ ჩავწვდებით მისი სიდიადის ძალას.

⁶რადგან ეუბნება თოვლს: დაეფინეო მიწას”, ამასვე უბრძანებს წვიმასა და ძლიერ თავსხმას.

⁷აჩერებს ყველა ადამიანის ხელს, რომ ყველა ადამიანმა იცოდეს მისი ნამოქმედარი.

⁸თავშესაფარში გარბიან მხეცები და თავიანთ ბუნაგებში ინაბებიან.

⁹სამხრეთიდან ქარიშხალი მოდის, ჩრდილოეთიდან - ყინვა.

¹⁰ღვთის სუნთქვა ბადებს ყინულს და მყარდება სიმრავლე წყლისა.

¹¹ტენით ავსებს სქელ ღრუბლებს და მისი ელვით ნათდებიან ისინი.

¹²მისი ნება-სურვილით მოძრაობენ ღრუბლები, მის ბრძანებას ასრულებენ მთელი დედამიწის ზურგზე.

¹³ხან არგნით, თავისივე ხალხის საკეთილდღეოდ, ხანაც წყალობისთვის.

¹⁴ყური მომაპყარ იობ, აღსდექ და ჩაუკვირდი ღვთის სასწაულებს.

¹⁵თუ იცი, როგორ დააფუძნა ისინი, როგორ აცისკროვნებს ღმერთი თავის ღრუბლებს ელვის სინათლით?

¹⁶თუ იცი ღრუბელთა განფენილობა, საოცრებანი ცოდნაში უნაკლოსი?

¹⁷რატომ ხურდება შენი სამოსელი, როცა სამხრეთის ქარში მყუდროვდება ქვეყანა?

¹⁸თუ შეძლებ მასთან ერთად ცათა გადაჭიმვას, ჩამოსხმული სარკესავით მტკიცე რომ არის?

¹⁹გვასწავლე, რა ვუთხრათ მას, ვერაფერი მოგვიფიქრებია სიბნელის გამო.

²⁰მოხსენდება მას, რომ ლაპარაკი მსურს? ვინმე გაბედავს და მოინდომებს მისგან შთანთქმას?

²¹ახლა არ ჩანს ღრუბლებში მბრწყინავი მნათობი, მაგრამ ჩაუქროლებს ქარი და გაასუფთავებს.

²²ჩრდილოეთიდან ბრწყინავს ოქროს ციალი; შიშის მომგვრელია ღვთაებრივი შარავანდედი.

²³ვერ მივაგენით ყოვლადძლიერს, ძალაშია ამაღლებული, სიმართლესა და მრავალმოწყალებაში - არავის ჩაგრავს.

²⁴ამიტომ ეშინიათ მისი ადამიანებს; არაფრად აგდებს მათ, ვისაც თავი ბრძენი ჰგონია”.