Read Traducción Kadosh Israelita Mesiánica იობი 38 Bible Online

იობი 38 - Traducción Kadosh Israelita Mesiánica bible

იობი 38

¹მიუგო უფალმა იობს გრიგალიდან და უთხრა:

²„ვინ არის ეს, ჩემს ჩანაფიქრს რომ აბნელებს უმეცარი სიტყვებით?

³წელზე სარტყელი შემოირტყი, როგორც კაცს შეჰფერის; შეგეკითხები და მიპასუხე:

⁴სად იყავი, დედამიწას რომ ვაფუძნებდი? მითხარი, თუ გაქვს გაგება.

⁵ვინ დაადგინა მისი საზომი, თუ იცი? ან ვინ გადაჭიმა მასზე ლარი?

⁶რაზე დგას მისი საძირკვლები, ან ვინ დადო მისი ქვაკუთხედი?

⁷როცა ერთობლივად გალობდნენ ცისკრის ვარსკვლავები და ყიჟინებდა ღვთის ყველა შვილი?

⁸ვინ ჩაკეტა ზღვა კარიბჭეებით, როცა ამოხეთქა, როგორც საშოდან?

⁹როცა ნისლი სამოსელად მივეცი და სქელი ღრუბელი - სახვევებად,

¹⁰როცა დავუდგინე ჩემი წესები, დავუყენე ურდული და ბჭენი?

¹¹ვუთხარი: აქამდე მოხვალ, მეტად არა; აქ უნდა შედგნენ შენი ამაყი ზვირთები-მეთქი.

¹²შენს დღეში თუ გიბრძანებია განთიადისთვის და გიჩვენებია მისი ადგილი ცისკრისთვის,

¹³რომ მოეცვა დედამიწის კიდეები და ბოროტეულნი ჩამოეფერთხა მისგან,

¹⁴შეეცვალა იგი, როგორც თიხა ტვიფარის ქვეშ და ისინი დგანან, როგორც სამოსელი.

¹⁵რათა წართმეოდათ ნათელი ბოროტეულთ და შემუსვროდათ შემართული მკლავი.

¹⁶თუ ჩასულხარ ზღვის სიღრმეებში და უფსკრულის ფსკერზე თუ გივლია?

¹⁷თუ გახსნილან შენთვის სიკვდილის ბჭენი და ბნელეთის ბჭენი თუ გინახავს?

¹⁸თუ განგიჭვრიტავს დედამიწის სიგრძე-სიგანე? მითხარი, თუ იცი ეს ყველაფერი.

¹⁹სად არის გზა, სინათლის სამკვიდრებლისკენ და სად არის ადგილი წყვდიადისა?

²⁰ნამდვილად მიგიღწევია მის საზღვრებამდე და იცი მისი სახლის ბილიკები?!

²¹გეცოდინება ეს, რადგან უკვე დაბადებული იყავი და მრავალია რიცხვი შენი დღეების!

²²თუ შესულხარ თოვლის სანახებში და სეტყვის სანახები თუ გინახავს?

²³შეჭირვების ჟამისთვის რომ შემოვინახე, ბრძოლისა და ომის დღისთვის.

²⁴რა გზით ნაწილდება ნათელი და როგორ ვრცელდება მიწაზე აღმოსავლეთის ქარი?

²⁵ვინ გაიყვანა არხი ნიაღვრისთვის და გზა - ელვისა და ქუხილისთვის?

²⁶რომ აწვიმოს უკაცრიელ მიწაზე, უდაბნოში, სადაც არ არის ადამიანი,

²⁷რომ დაარწყულოს უდაბური ხრიოკი და ჯეჯილი აღმოაცენოს?

²⁸თუ ჰყავს წვიმას მამა ან ვინ დაბადა ცვარის წვეთები?

²⁹ვისი საშოდან გამოვიდა ყინული და ციური ჭირხლი ვინ დაბადა?

³⁰წყალი ქვასავით მაგრდება და მყარდება უფსკრულის ზედაპირი.

³¹თუ შეკრავ თანავარსკვლავედის საბელებს ან თუ გახსნი საბელებს ორიონისას?

³²თუ ამოიყვან თანავარსკვლავედს თავის დროზე და თუ წარუძღვები დიდ დათვს თავის ბელებთან ერთად?

³³თუ იცი ცათა დადგენილებანი და თუ დაადგენ მის წესს მიწაზე?

³⁴თუ მიაწვდენ ხმას ღრუბლებს, რათა დაგფაროს წყლის სიუხვემ?

³⁵ელვებს თუ წარავლენ, რომ წავიდნენ და თქვან, აჰა, აქა ვართო?

³⁶ვინ ჩადო სიბრძნე გულის სიღრმეში და ვინ მისცა გონებას გაგება?

³⁷ვინ დათვლის ღრუბლებს სიბრძნით ან ვინ წამოაქცევს ცათა წყლის ჭურჭელს,

³⁸როცა მტვერი გამაგრდება და გოროხები ერთმანეთს მიეწებება?

³⁹შენ უნადირებ მსხვერპლს ძუ ლომს და უკლავ შიმშილს ლომის ბოკვრებს,

⁴⁰როცა განირთხმებიან ბუნაგებში ან თავიანთ საფარში ისვენებენ?

⁴¹საკვებს ვინ უმზადებს ყორანს, როცა ღმერთს შესჩხავიან მისი ბახალები და უსაზრდოოდ წანწალებენ?