Read Traducción Kadosh Israelita Mesiánica იობი 39 Bible Online

იობი 39 - Traducción Kadosh Israelita Mesiánica bible

იობი 39

¹„თუ უწყი ჟამი ჯიხვთა შობადობისა? ფურირემთა მშობიარობა თუ გინახავს?

²თუ აღგირიცხავს მათი მაკეობის თვეები ან თუ უწყი ჟამი მათი მოგებისა?

³ჩაიმუხლებენ, შობენ თავის ნაშიერთ, გათავისუფლდებიან შობის ტკივილებისგან.

⁴მომაგრდებიან მათი ნაშიერნი, ველზე იზრდებიან, წავლენ და აღარ დაბრუნდებიან მათთან.

⁵ვინ გაუშვა კანჯარი ლაღად? ველურ ვირს საბელები ვინ აუხსნა,

⁶რომელსაც სახლად უდაბნო მივეცი და სამკვიდრებლად - მლაშობი?

⁷ქალაქის ხმაურს არაფრად აგდებს და გამრეკის შეძახილებს არ უსმენს.

⁸მთებში დაეხეტება თავისი საზრდოსთვის და დაეძებს ყოველგვარ სიმწვანეს.

⁹თუ ინებებს გარეული ხარი შენს მსახურებას ან თუ გაათევს ღამეს შენს ბაგაზე?

¹⁰თუ შეძლებ მის უღელში შებმას, თუ დაგიფარცხავს მინდორს შენს უკან?

¹¹თუ დაენდობი მის ძლიერებას და შენს საშრომელს თუ მიანდობ?

¹²ნუთუ დაიჯერებ, რომ მარცვლეულს დაგიბრუნებს და კალოზე დაგიხვავებს?

¹³მხიარულად აფრთხიალებს ფრთებს სირაქლემა, თუმცა არა აქვს ყარყატივით ნაკრტენი და ბუმბული.

¹⁴თავის კვერცხებს ქვიშაში ტოვებს და მიწაში ათბობს მათ,

¹⁵ავიწყდება, რომ ფეხი გასრესს ან ველის მხეცი გათელავს მათ.

¹⁶უმოწყალოდ ექცევა თავის ბარტყებს, თითქოს მისები არ იყვნენ; ამაოა მისი შრომა და არ ადარდებს,

¹⁷რადგან ღმერთმა დაავიწყა მას სიბრძნე და გონიერება არ მიუცია მისთვის,

¹⁸თუმცა, როგორც კი გასაქცევად შეიმართება, აბუჩად იგდებს ცხენსა და მხედარს.

¹⁹შენ მიეცი ცხენს ძლიერება, და ფაფარით შენ შეუმოსე კისერი?

²⁰შენ ახტუნებ მას კალიასავით? შემაძრწუნებელია მისი დიდებული ჭიხვინი!

²¹ჩლიქით თხრის ველზე მიწას, ხარობს თავის ძლიერებაში, გადის და მახვილს ეგებება.

²²შიშს დასცინის, არ ეშინია და მახვილისგან პირს არ აბრუნებს.

²³მკერდზე კაპარჭი უწკრიალებს, ელვარებს შუბი და მახვილი.

²⁴მძვინვარე ხმაურით ყლაპავს მიწას და არ ყოვნდება საყვირის ხმაზე.

²⁵ყოველი საყვირის დაყვირებაზე, იტყვის: აჰა! შორიდან იყნოსავს ბრძოლას, სარდალთა გრგვინვასა და ომის ყიჟინას.

²⁶განა შენი გონიერებით ნავარდობს ქორი და შლის ფრთებს სამხრეთისკენ?

²⁷განა შენი ბრძანებით მაღლდება არწივი და იკეთებს ბუდეს სიმაღლეზე?

²⁸კლდეზე ბინადრობს და იქ ათევს ღამეს, კლდის ქიმზე და მიუდგომელ ადგილზე.

²⁹იქიდან ეძებს თავის საზრდოს; შორიდანვე ხედავენ მისი თვალები.

³⁰სისხლს სვამენ მისი მართვენი და სადაც ლეშია, ისიც იქ არის”.