Read Traducción Kadosh Israelita Mesiánica იობი 4 Bible Online

იობი 4 - Traducción Kadosh Israelita Mesiánica bible

იობი 4

¹მიუგო ელიფაზ თემანელმა და თქვა:

²"სიტყვის თქმა რომ ვცადო, ხომ არ გაბეზრდები? მაგრამ ვის ძალუძს დადუმება?

³აჰა, ბევრს არიგებდი ჭკუას და დაუძლურებულ ხელებს უმაგრებდი;

⁴წაბორძიკებულს ფეხზე აყენებდა შენი სიტყვა და ჩაკეცილ მუხლებს ამაგრებდი.

⁵ახლა შენც მოგადგა და მოუთმენელი გახდი, შეგეხო და შეძრწუნდი,

⁶შენი მოშიშება ხომ შენი სიმტკიცეა, და შენი გზების უბიწოება - შენი იმედი.

⁷გაიხსენე, უდანაშაულო თუ დაღუპულა ვინმე ან მართალნი თუ მოკვეთილან?

⁸როგორც მინახავს, ურჯულოების მხვნელნი და შფოთის მთესველნი მასვე იმკიან.

⁹ღმერთის სუნთქვაზე იღუპებიან და მისი რისხვის ქროლვით შთაინთქმებიან.

¹⁰მათი ხმა ლომის ღრიალივით არის, მაგრამ შეემუსრებათ მათ კბილები.

¹¹ლომი უნადავლოდ იღუპება და ძუ ლომის ბოკვერნი იფანტებიან.

¹²საიდუმლოდ მომეცა სიტყვა და ყურში ჩურჩული ჩამესმა.

¹³ღამის ხილვებით ჩაფიქრებულს, როცა ძილქუში ეცემათ ადამიანებს.

¹⁴შიშმა შემიპყრო, ძრწოლა დამეცა და ყველა ძვალი ამიცახცახდა.

¹⁵სულმა ჩამიქროლა ჩემი სახის წინ და ყალყზე დამიდგა თმები ტანზე.

¹⁶შედგა, მაგრამ ვერ გავარჩიე სახე, ხატება - ჩემ თვალწინ; იყო დუმილი და მერე ხმა გავიგონე:

¹⁷ღმერთზე მართალია მოკვდავი? უმწიკვლოა თავისი შემოქმედის წინაშე?

¹⁸აჰა, თავის მსახურებსაც კი არ ენდობა და თავის ანგელოზებშიც პოულობს ნაკლს,

¹⁹მით უმეტეს თიხის სახლებში მცხოვრებნი, მტვერზე რომ უდგათ საფუძველი და ჩრჩილზე უწინ რომ იჭყლიტებიან,

²⁰დილიდან საღამომდე იმუსრებიან და შეუმჩნევლად იღუპებიან.

²¹აჰა, ამოძვრა მათი კარვის საბელი და სიბრძნის გარეშე კვდებიან.