Read Traducción Kadosh Israelita Mesiánica იობი 40 Bible Online

იობი 40 - Traducción Kadosh Israelita Mesiánica bible

იობი 40

¹მიუგო უფალმა იობს და უთხრა:

²„ნუთუ შეედავება შარიანი ყოვლადძლიერს? გამცეს პასუხი ღმერთის მამხილებელმა!”

³უპასუხა იობმა უფალს და უთხრა:

⁴„აჰა, არარაობა ვარ; რა გიპასუხო? პირზე ხელს ვიფარებ.

⁵ერთხელ ვთქვი და პასუხად აღარაფერს ვიტყვი, მეორეჯერაც და აღარაფერს დავუმატებ”.

⁶მიუგო უფალმა იობს გრიგალიდან და უთხრა:

⁷„წელზე სარტყელი შემოირტყი, როგორც კაცს შეჰფერის; შეგეკითხები და მიპასუხე:

⁸ნუთუ გააუქმებ ჩემს სამართალს, მე მამტყუნებ, რომ თავად გამართლდე?

⁹ან იქნებ ღვთის სადარი მკლავი გაქვს და მისი ხმით გრგვინვა შეგიძლია?

¹⁰აბა, მოიკაზმე დიდებითა და სიდიადით, ბრწყინვალება და შარავანდედი შეიმოსე.

¹¹აბა, გადმოაფრქვიე შენი რისხვის მძვინვარება, დახედე ამაყებს და დაამდაბლე.

¹²დახედე ქედმაღალს და მოდრიკე, ადგილზევე გათელე ბოროტეულნი.

¹³ერთიანად ჩამარხე მტვერში და დაფარულში დაატყვევე მათი სახე.

¹⁴მაშინ მეც ვაღიარებ, რომ საკუთარი მარჯვენა გიხსნის.

¹⁵აჰა, ბეჰემოთი, შენსავით ჩემი შექმნილია იგი, ხარივით ჭამს ბალახს.

¹⁶აჰა, მისი ძალა მის წელშია და მისი ღონე - მუცლის კუნთებში.

¹⁷კედარივით ხრის კუდს; გადაგრეხილი აქვს ბარძაყის ძარღვები.

¹⁸მისი ძვლები სპილენძის მილებია; სახსრები - რკინის წნელები.

¹⁹ის პირველია ღვთის ქმნილებათაგან, მხოლოდ მისი შემოქმედი თუ მიუახლოებს თავის მახვილს.

²⁰რადგან ასაზრდოებენ მას მთები, სადაც ხარობს ყოველი ცხოველი ველისა.

²¹ლოტოსის ქვეშ წვება, ლერწმისა და ჭაობის საფარში.

²²ლოტოსი იფარავს და ჩრდილს აძლევს მას, ღელის ტირიფებით არის გარემოცული.

²³თუ აბობოქრდა მდინარე - არ დაფრთხება, მშვიდადაა, იორდანეც რომ მიასკდეს პირზე.

²⁴სანამ თვალღიაა განა შეიპყრობს ვინმე ან კაუჭით ვინ გაუხვრეტს ცხვირს?