Read Traducción Kadosh Israelita Mesiánica იობი 41 Bible Online

იობი 41 - Traducción Kadosh Israelita Mesiánica bible

იობი 41

¹"თუ ამოათრევ ლევიათანს ანკესით და საბლით თუ დაუბამ ენას?

²ცხვირში თუ გაუყრი რგოლს და კაუჭით თუ გაუხვრეტ ყბას?

³თუ დაგიწყებს ძლიერ ვედრებას და მოწიწებით თუ დაგელაპარაკება?

⁴თუ დაგიდებს აღთქმას, რომ სამუდამო მსახურად დაგიდგება?

⁵თუ გაგართობს ჩიტივით და დააბამ მას შენი ქალიშვილებისთვის?

⁶თუ ივაჭრებენ მისით მეთევზენი და დაანაწილებენ ვაჭართა შორის?

⁷თუ დაუფარავ კანს ისრებით და მეთევზის კაპარჭებით - თავს?

⁸დაადე მას ხელი და დაგამახსოვრდება მასთან შერკინება, აღარასოდეს გააკეთებ ამას!

⁹აჰა, ფუჭია შენი მოლოდინი; მისი ერთი გამოხედვაც კი ძირს დაგცემს.

¹⁰მის შეწუხებას ვერავინ ბედავს, ჩემს წინ ვინღა დადგება?!

¹¹ვის რა მოუცია, რომ ავუნაზღაურო? ჩემია მთელი ცისქვეშეთი.

¹²არ დავდუმდები მის კიდურებზე, მის ძლევამოსილებაზე და მშვენიერ აღნაგობაზე.

¹³ვის გაუხდია მისთვის ჯავშანი? მის ორმაგ ყბებში ვინ შეაღწევს?

¹⁴მისი სახის კარს ვინ გააღებს? მის კბილთა ირგვლივ შიშის ზარია!

¹⁵მისი ფარფლები ფარების წყებაა, მჭიდრო ბეჭდით შეკრული.

¹⁶ერთი მეორეს ერწყმის და ჰაერი ვერ ატანს მათ შორის:

¹⁷ერთმანეთს მიეკვრნენ, ჩაეჭიდნენ და არ განიყოფიან.

¹⁸მის დაცემინებაზე ნათელი ელვარებს და მისი თვალები ცისკრის წამწამებივითაა.

¹⁹მისი ხახიდან ცეცხლის ჩირაღდნები გამოდიან და ნაპერწკლები იფრქვევა.

²⁰კვამლი გამოსდის ნესტოებიდან, როგორც მდუღარე ქვაბიდან და ცეცხლმოკიდებული ლერწმიდან.

²¹მისი სუნთქვა ნაკვერჩხლებს აღვივებს და ხახიდან ალი გამოდის.

²²მის ქედზე ძალაა დავანებული და მის წინაშე როკავს შიში.

²³მტკიცედ შეერწყა ერთმანეთს მისი ხორცის ფენები, მკვრივად აფენია, არ შეირყევა.

²⁴ქვასავით მაგარია მისი გული, მკვრივია ქვედა დოლაბივით.

²⁵როგორც კი წამოიმართება - ძლიერნი კრთებიან და ეცლებიან თავზარდაცემულნი.

²⁶მისწვდება მას მახვილი და ვერას აკლებს - ვერც შუბი, ვერც ლახვარი და ისარი.

²⁷რკინას ჩალად მიიჩნევს და სპილენძს - დამპალ ხედ.

²⁸ვერ უკუაქცევს მას ისარი, ჩალასავითაა მისთვის შურდულის ქვები.

²⁹ბზედ მიაჩნია რკინა და შუბის ზუზუნზე ეცინება.

³⁰მუცელზე წამახული კეცის ნატეხები აქვს, კევრივით არის გაწოლილი ჭანჭყობში.

³¹ქვაბივით ადუღებს უფსკრულს და ზღვას ნელსაცხებლის ჭურჭლად აქცევს.

³²ბილიკს ასხივებს თავის უკან, კაცი იფიქრებს, უფსკრულნი გაჭაღარავდნენო.

³³არავინაა მიწაზე მისი მსგავსი, უშიშრად არის შექმნილი.

³⁴უმზერს ყველაფერს, რაც მაღლაა, მეფობს სიამაყის ყველა ნაშიერზე”.