Read Traducción Kadosh Israelita Mesiánica იობი 8 Bible Online

იობი 8 - Traducción Kadosh Israelita Mesiánica bible

იობი 8

¹მიუგო ბილდად შუხელმა და თქვა:

²"როდემდე ილაპარაკებ ასე? მძვინვარე ქარია შენი პირის სიტყვები!

³ნუთუ აუკუღმართებს ღმერთი სამართალს და სიმართლეს - ყოვლადძლიერი?!

⁴თუ შენმა ძეებმა შესცოდეს, მან მათსავე ურჯულოებას გადასცა ისინი.

⁵შენ რომ ღმერთი გეძებნა და ყოვლადძლიერს შევედრებოდი,

⁶სუფთა და ალალმართალი რომ ყოფილიყავი, უსათუოდ იფხიზლებდა შენთვის და შენი სიმართლის სამყოფელს აღგიდგენდა.

⁷და თუ შენი დასაწყისი უმნიშვნელო იყო, შენი დასასრული ძლიერ გამრავლდებოდა.

⁸აბა, ჰკითხე გარდასულ თაობას და ყურად იღე მამების სიბრძნე;

⁹რადგან გუშინდელნი ვართ და არაფერი ვიცით, რადგან ჩრდილია ჩვენი დღეები დედამიწაზე.

¹⁰განა არ გასწავლიან, არ გეტყვიან და გულიდან არ ამოიღებენ სიტყვებს?

¹¹თუ იზრდება ჭილი უჭაობოდ? ან ლერწამი - უწყლოდ?

¹²ჯერ კიდევ მწვანეა იგი და მოუჭრელი, და ყველა ბალახზე ადრე ჭკნება.

¹³ასევეა ყველას ბილიკი, ვინც ივიწყებს ღმერთს და გაქრება უღვთოთა იმედი,

¹⁴რადგან წარიკვეთება მისი გაბედულება, მისი იმედი ობობას ქსელივითაა.

¹⁵თავის სახლზეა დანდობილი და ვერ უძლებს, ეჭიდება და ვერ იჭერს.

¹⁶მზის გულზე ყვავის იგი და ყლორტები ბაღნარზე აქვს გადმოშლილი.

¹⁷ქვების გროვაში ჩახლართულა მისი ფესვები, ქვის ლოდებში დაუდევს ბინა.

¹⁸თუ აღმოფხვრიან თავისი ადგილიდან, უარყოფს მას: არასოდეს მინახიხარო!

¹⁹აჰა, ეს არის მისი გზის სიხარული! მიწიდან კი სხვა აღმოცენდება.

²⁰ღმერთი არ უკუაგდებს უმწიკვლოს და ბოროტმოქმედს არ შეეწევა.

²¹ისევ აგივსებს პირს სიცილით და ბაგეებს სიხარულის ყიჟინით.

²²შენი მოძულენი სირცხვილით შეიმოსებიან და ურჯულოთა კარავი აღარ იქნება!”