Read Traducción Kadosh Israelita Mesiánica ფსალმუნები 101 Bible Online

ფსალმუნები 101 - Traducción Kadosh Israelita Mesiánica bible

ფსალმუნები 101

¹უფალო, ისმინე ჩემი ლოცვა და ჩემი ღაღადი მოვიდეს შენთან.

²ნუ დამიფარავ შენს სახეს ჩემი გაჭირვების ჟამს, მომაპყარ ყური, ოდეს მოგიხმობ და მალე მიპასუხე.

³რადგან კვამლივით გაქრნენ ჩემი დღეები და ძვლები ჩემი გახურდა, როგორც კოცონზე.

⁴ბალახივით დაჭკნა და გახმა ჩემი გული, ისე რომ ჭამაც დამავიწყდა.

⁵ჩემი კვნესის ხმისგან ხორცს მიჰკვრია ჩემი ძვლები.

⁶უდაბნოს ვარხვს დავემსგავსე და გავხდი ვითარცა ბუ ნანგრევებში.

⁷ძილი გამიტყდა და ვზივარ, ვითარცა ეული ჩიტი სახურავზე.

⁸ყოველდღე მლანძღავენ ჩემი მტრები, აბუჩად მიგდებენ და სწყევლიან ჩემს სახელს.

⁹რადგან პურივით ვჭამე ნაცარი და ცრემლით შევაზავე ჩემი სასმელი;

¹⁰შენი რისხვისა და გულისწყრომის გამო, რადგან ამიყვანე და დამანარცხე.

¹¹ჩემი დღეები გადახრილი ჩრდილივითაა და მეც ვხმები ბალახივით.

¹²შენ კი უფალო, საუკუნოდ რჩები და შენი სახსენებელი თაობიდან თაობამდე იქნება.

¹³შენ აღსდგები და შეიწყალებ სიონს, რადგან ჟამია მისი შეწყალებისა; დადგა დანიშნული დრო.

¹⁴ვინაიდან უყვართ შენს მსახურთ მისი ქვები და მისი მტვერიც კი ენანებათ.

¹⁵შეეშინდებათ ერებს უფლის სახელისა და ქვეყნიერების ყველა მეფეს - შენი დიდებისა.

¹⁶რადგან აღაშენებს უფალი სიონს და იქ გამოცხადდება თავისი დიდებით.

¹⁷მოხედავს მიტოვებულთა ლოცვას და არ უკუაგდებს მათ ვედრებას.

¹⁸დაიწერება ეს მომავალი თაობისთვის და ხალხი, რომელიც გაჩნდება, შეაქებს უფალს.

¹⁹რადგან გადმოიხედა უფალმა თავისი წმიდა სიმაღლიდან, ზეციდან გადმოხედა დედამიწას.

²⁰რომ მოისმინოს პატიმრის კვნესა და გაათავისუფლოს სიკვდილმისჯილნი.

²¹რათა აუწყონ სიონზე უფლის სახელი და ქება მისი - იერუსალიმში,

²²როცა ერთად შეგროვდებიან ხალხები და სამეფონი უფლის სამსახურებლად.

²³გზაში გამომაცალა ძალა და დღენი ჩემნი შეამცირა.

²⁴ვუთხარი: ღმერთო ჩემო! ნუ წამიყვან სიცოცხლის შუაგზიდან; თაობიდან თაობამდეა შენი წლები;

²⁵ძველთაგან დააფუძნე დედამიწა და შენთა ხელთა ქმნილებაა ზეცა.

²⁶ისინი დაიღუპებიან, შენ კი იქნები; ყველანი ტანსაცმელივით გაცვდებიან; სამოსელივით გამოიცვლი მათ და შეიცვლებიან.

²⁷შენ კი იგივე ხარ და შენი წლები არ დასრულდება.

²⁸შენი მსახურების შვილები დაფუძნდებიან და შენ წინაშე განმტკიცდებიან მათი შთამომავალნი.