Read Traducción Kadosh Israelita Mesiánica ფსალმუნები 104 Bible Online

ფსალმუნები 104 - Traducción Kadosh Israelita Mesiánica bible

ფსალმუნები 104

¹მადლობდეთ უფალს, მოუხმეთ მის სახელს, აუწყეთ ერებს მისი საქმეები.

²უმღერეთ მას, ხოტბა შეასხით, ილაპარაკეთ მის ყველა სასწაულზე.

³იამაყეთ მისი წმიდა სახელით, გამხიარულდეს უფლის მაძიებელთა გული.

⁴ეძიეთ უფალი და მისი ძლიერება, გამუდმებით ეძიეთ მისი სახე,

⁵გაიხსენეთ მისი საქმეები, ნიშნები, რომლებიც მოიმოქმედა და მისი ბაგის განკითხვანი.

⁶შთამომავალნო აბრაჰამისა, მისი მსახურისა, ძენო იაკობისა, მისნო რჩეულნო.

⁷ის არის უფალი, ჩვენი ღმერთი, მთელ ქვეყნიერებაზეა მისი სამართალი.

⁸საუკუნოდ ახსოვს თავისი აღთქმა, სიტყვა, ნაბრძანები ათასი თაობისთვის.

⁹რომელიც შეკრა აბრაჰამთან; და თავისი ფიცი - ისაკთან.

¹⁰დაუდგინა იგი წესად იაკობს და სამუდამო აღთქმად - ისრაელს.

¹¹უთხრა: "შენ მოგცემ ქანაანის ქვეყანას, როგორც წილს შენი მემკვიდრეობისას”.

¹²როცა თითებზე ჩამოსათვლელნი იყვნენ ისინი, ცოტანი იყვნენ და ხიზნობდნენ იქ,

¹³ერთი ქვეყნიდან მეორეში გადადიოდნენ, ერთი სამეფოდან - სხვა ხალხში.

¹⁴არავის ანებებდა მათ დაჩაგვრას და მათ გამო აფრთხილებდა მეფეებს:

¹⁵"არ შეეხოთ ჩემს ცხებულებს და ჩემს წინასწარმეტყველებს არ უბოროტოთ”.

¹⁶შიმშილს მოუხმო დედამიწაზე და ყოველი სახსარი პურისა შემუსრა.

¹⁷გაგზავნა მათ წინ კაცი; მონად გაიყიდა იოსები.

¹⁸გატანჯეს ბორკილებით მისი ფეხები, რკინა მისწვდა მის სულს.

¹⁹ვიდრე ასრულდებოდა მისი ნათქვამი, უფლის სიტყვამ გამობრძმედა იგი.

²⁰გაგზავნა მეფემ და გამოიხსნა, ხალხთა განმგებელმა გაათავისუფლა იგი.

²¹დააყენა თავისი სახლის ბატონად და მთელი თავისი მონაგარის განმგებლად.

²²რათა თავისი სურვილისამებრ მოქცეოდა მის თავადებს და განებრძნო მისი მოხუცებულნი.

²³მაშინ მოვიდა ისრაელი ეგვიპტეში და ქამის ქვეყანაში გადასახლდა იაკობი.

²⁴ფრიად გაამრავლა ღმერთმა თავისი ხალხი და მეტად გააძლიერა მათ მტრებზე.

²⁵მოაქცია მათი გული უფლის ხალხის შესაძულებლად, მისი მსახურებისთვის მზაკვრობის განსაზრახად.

²⁶გაგზავნა მოსე, თავისი მსახური და აჰარონი, რომელიც ამოირჩია.

²⁷მათ აჩვენეს ხალხს მისი ნიშნები და სასწაულები ქამის ქვეყანაში.

²⁸მიავლინა წყვდიადი და დააბნელა, არ შეწინააღმდეგებიან მის სიტყვას.

²⁹სისხლად გადააქცია მათი წყლები და გაუწყვიტა თევზი.

³⁰ბაყაყებით აავსო მათი ქვეყანა, მეფეთა შიდა ოთახებიც კი.

³¹თქვა და მოვიდა ბუზანკალი, კოღომ აავსო მთელი მათი მხარე.

³²წვიმის მაგიერ სეტყვა გამოუგზავნა, ალმოდებული ცეცხლი - მათ ქვეყანას.

³³მოსრა მათი ვაზი და ლეღვი; დალეწა ხეები მათ საზღვრებში.

³⁴თქვა და მოვიდა კალია, მუხლუხო აურაცხელი.

³⁵გადაჭამეს მთელი ბალახი მათ ქვეყანაში და მთელი ნაყოფი - მათი მინდვრისა.

³⁶მოსრა ყოველი პირმშო მათ ქვეყანაში, პირველნაყოფი მთელი მათი ძლიერებისა.

³⁷ოქრო-ვერცხლით გამოიყვანა ისინი და არავინ იყო უძლური მათ ტომებში.

³⁸უხაროდა ეგვიპტეს მათი გამოსვლა, რადგან მათმა შიშმა შეიპყრო ის.

³⁹გადააფარა ღრუბელი მათ საფრად და ცეცხლი - ღამის გასანათებლად.

⁴⁰ითხოვეს და მწყერი გაუგზავნა, ზეციური პურით გააძღო ისინი.

⁴¹გაჰკვეთა კლდე და წყალი გადმოდინდა, ნაკადულად მოედინებოდა უდაბნოში.

⁴²რადგან გაიხსენა თავისი წმიდა სიტყვა, თავისი მსახურის, აბრაჰამის მიმართ.

⁴³სიხარულით გამოიყვანა თავისი ხალხი, ზარ-ზეიმით - თავისი რჩეულნი.

⁴⁴მისცა მათ წარმართთა ქვეყნები და ნაჯაფი ერებისა დაიმკვიდრეს მათ.

⁴⁵რათა შეესრულებინათ მისი წესები და დაეცვათ მისი კანონები. ალელუია!