Read Traducción Kadosh Israelita Mesiánica ფსალმუნები 105 Bible Online

ფსალმუნები 105 - Traducción Kadosh Israelita Mesiánica bible

ფსალმუნები 105

¹აქეთ უფალი, რადგან კეთილია, რადგან მარადიულია წყალობა მისი.

²ვინ ილაპარაკებს უფლის ძლიერ საქმეებზე ან გამოაცხადებს სრულად მის ქებას?

³ნეტარ არიან სამართლის დამცველნი და სიმართლის მოქმედნი ყოველ ჟამს.

⁴გამიხსენე უფალო, შენი ხალხისადმი კეთილგანწყობისას, შემეწიე, როცა მათ დაიხსნი.

⁵რათა ვიხილო შენი რჩეულების კეთილდღეობა, გავიხარო შენი ერის სიხარულით და ვიკვეხნო შენს სამკვიდროსთან ერთად.

⁶შევცოდეთ ჩვენი მამებივით, მრუდედ და ბოროტად მოვიქეცით.

⁷ვერ შეიცნეს ჩვენმა მამებმა შენი სასწაულები ეგვიპტეში, არ გაიხსენეს მრავალი წყალობა შენი და ზღვასთან აგიჯანყდნენ, წითელ ზღვასთან.

⁸მაგრამ თავისი სახელის გამო იხსნა მან, რათა შეეცნოთ მისი ძლიერება.

⁹შერისხა წითელი ზღვა და დაშრა, ისე გაატარა მის სიღრმეებში, როგორც უდაბნოში.

¹⁰მოძულის ხელიდან იხსნა და მტრის ხელიდან გამოისყიდა.

¹¹წყალმა დაფარა მათი მტრები, ერთი მათგანიც არ გადარჩენილა.

¹²მაშინ ირწმუნეს მისი სიტყვები და იმღერეს მისი ქება.

¹³მალევე დაივიწყეს მისი საქმეები, არ დაელოდნენ მის რჩევას.

¹⁴გულისთქმას აჰყვნენ უდაბნოში და უკაცრიელ ადგილას გამოსცადეს ღმერთი.

¹⁵შეუსრულა თხოვნა, მაგრამ მომსვრელი სენი მოუვლინა.

¹⁶როცა შური აღეძრათ მოსეს მიმართ ბანაკში, უფლის წმიდანის აჰარონის მიმართ,

¹⁷გაიპო მიწა და ჩაყლაპა დათანი და დაფარა აბირამის კრებული.

¹⁸ცეცხლი მოედო მათ კრებულს, ალმა შთანთქა ბოროტეულნი.

¹⁹ხბო გაიკეთეს ხორებთან და თაყვანი სცეს კერპს.

²⁰თავიანთი დიდება ბალახის მძოველი ხარის გამოსახულებაში გაცვალეს.

²¹დაივიწყეს ღმერთი, მათი მხსნელი, რომელმაც დიადი საქმეები მოიმოქმედა ეგვიპტეში.

²²საოცრებანი მოიმოქმედა ქამის ქვეყანაში, შიშის მომგვრელი საქმეები წითელ ზღვასთან.

²³ამიტომ თქვა, რომ გაანადგურებდა მათ, მოსე, მისი რჩეული, რომ არ ჩამდგარიყო ნაპრალში მის წინაშე, რათა გაებრუნებინა მისი გამანადგურებელი რისხვა.

²⁴უგულებელჰყვეს სანუკვარი ქვეყანა, არ ირწმუნეს მისი ნათქვამი.

²⁵დრტვინავდნენ თავიანთ კარვებში, არ უსმენდნენ უფლის ხმას.

²⁶მაშინ აღმართა ხელი, რომ უდაბნოში დაეხოცა ისინი;

²⁷და ხალხებში გაეფანტა მათი შთამომავლობა და ქვეყნებში განებნია ისინი.

²⁸ბაყალ-ფეღორს შეეკვრნენ და მკვდართა შესაწირი ჭამეს.

²⁹განარისხეს თავიანთი მოქმედებით და მომსვრელი სენი დაატყდათ თავს.

³⁰წამოდგა ფინხასი, ჩაერია და შეჩერდა მომსვრელი სენი.

³¹სიმართლედ ჩაეთვალა მას ეს თაობიდან თაობამდე, სამარადჟამოდ.

³²განარისხეს მერიბას წყლებთან და დაისაჯა მოსე მათ გამო,

³³რადგან სული გაუმწარეს და ნაჩქარევად ილაპარაკა თავისი ბაგეებით.

³⁴არ მოსპეს ხალხები, როგორც უფალს ჰქონდა ნაბრძანები.

³⁵აითქვიფნენ სხვა ხალხებში და შეისწავლეს მათი საქმეები.

³⁶ემსახურებოდნენ მათ კერპებს, რომლებიც მახედ იქცნენ მათთვის.

³⁷ეშმაკებს სწირავდნენ თავიანთ ძეებსა და ასულებს.

³⁸უდანაშაულო სისხლი დაღვარეს, სისხლი თავიანთი ძეებისა და ასულებისა, რომელიც ქანაანის კერპებს შესწირეს და წაიბილწა სისხლით ქვეყანა.

³⁹გაუწმიდურდნენ თავიანთი საქმეებით და იმრუშეს თავიანთი მოქმედებით.

⁴⁰მაშინ აღინთო უფლის რისხვა თავის ხალხზე და შესძაგდა მას თავისი სამკვიდრო.

⁴¹ხელში ჩაუგდო ისინი წარმართებს და გაბატონდნენ მათზე მათი მოძულენი.

⁴²ავიწროებდნენ მათ მტრები და დამორჩილდნენ მათ ხელქვეით.

⁴³მრავალგზის იხსნა ისინი, მაგრამ ეურჩებოდნენ საკუთარი ზრახვებით და მცირდებოდნენ თავიანთი დანაშაულის გამო.

⁴⁴და მაინც მოხედა მათ გაჭირვებას, როცა მოისმინა მათი ღაღადი.

⁴⁵გაიხსენა თავისი აღთქმა და ანუგეშა თავისი მრავალმოწყალებით.

⁴⁶თანაგრძნობას აღვივებდა მათი დამატყვევებლების თვალში.

⁴⁷გვიხსენი უფალო, ღმერთო ჩვენო და შემოგვკრიბე ხალხთაგან, რათა მადლობა მივაგოთ შენს წმიდა სახელს და ვიქადოთ შენი დიდებით.

⁴⁸კურთხეულია უფალი, ღმერთი ისრაელისა, ამიერიდან და უკუნისამდე! და თქვას მთელმა ხალხმა: ამინ! ალელუია!