Read Traducción Kadosh Israelita Mesiánica ფსალმუნები 106 Bible Online

ფსალმუნები 106 - Traducción Kadosh Israelita Mesiánica bible

ფსალმუნები 106

¹მადლობდეთ უფალს, რადგან კეთილია, რადგან უკუნისამდეა წყალობა მისი.

²იტყვიან უფლის მიერ გამოსყიდულნი, რომლებიც გამოისყიდა მტრის ხელთაგან.

³ქვეყნებიდან შემოკრიბა ისინი - აღმოსავლეთიდან და დასავლეთიდან, ჩრდილოეთიდან და სამხრეთიდან.

⁴გზა აებნათ უკაცრიელ უდაბნოში, ვერ პოულობდნენ ქალაქს, სადაც უნდა დამკვიდრებულიყვნენ.

⁵მშიერ-მწყურვალნი იყვნენ, დაუძლურდა მათი სული.

⁶მაშინ შეჰღაღადეს უფალს თავიანთ უბედურების ჟამს და გაჭირვებიდან იხსნა ისინი.

⁷დააყენა სწორ გზაზე, რომ მისულიყვნენ ქალაქში, სადაც უნდა დამკვიდრებულიყვნენ.

⁸დაე, მადლობდნენ უფალს წყალობისთვის, საოცრებათათვის ადამის ძეთა მიმართ.

⁹რადგან მწყურვალი სული გააძღო და მშიერი სული სიკეთით აავსო.

¹⁰ბნელში ისხდნენ და სიკვდილის წყვდიადში, ტანჯვისა და ბორკილების ტყვეობაში,

¹¹რადგან ეურჩებოდნენ ღვთის სიტყვებს და უზენაესის რჩევას უგულებელყოფდნენ.

¹²ჯაფით მოდრიკა მათი გული, ეცემოდნენ და შემწე არ ჰყავდათ.

¹³შეჰღაღადეს უფალს თავიანთი უბედურების ჟამს და გაჭირვებიდან იხსნა ისინი.

¹⁴გამოიყვანა ბნელიდან და წყვდიადიდან; ბორკილები მათი დაწყვიტა.

¹⁵დაე, მადლობდნენ უფალს წყალობისთვის, საოცრებათათვის ადამის ძეთა მიმართ.

¹⁶რადგან დაამსხვრია სპილენძის კარიბჭენი და დაფშვნა რკინის ურდულნი.

¹⁷ბრიყვები თავიანთი უკანონო გზებისა და ცოდვებისთვის იტანჯებოდნენ.

¹⁸ყოველგვარი საჭმელი შეიზიზღა მათმა სულმა და სიკვდილის კარიბჭეს მიუახლოვდნენ.

¹⁹შეჰღაღადეს უფალს თავიანთი უბედურების ჟამს და გაჭირვებიდან იხსნა ისინი.

²⁰მოუვლინა თავისი სიტყვა, განკურნა ისინი და საფლავისგან გამოიხსნა.

²¹დაე, მადლობდნენ უფალს წყალობისთვის, საოცრებათათვის ადამის ძეთა მიმართ.

²²შესწირონ სამადლობელი მსხვერპლები და სიხარულით ილაპარაკონ მის საქმეებზე.

²³ზღვაში ხომალდებით მოგზაურებმა, დიდ წყლებზე საქმის მკეთებლებმა,

²⁴რომელთაც ნახეს უფლის საქმენი და მისი საოცრებანი ღრმა წყლებში.

²⁵თქვა მან და ამოვარდა ქარიშხალი და ზეაღიმართნენ ზვირთები.

²⁶ცამდე ავიდნენ და უფსკრულებამდე ჩავიდნენ გემები, მეზღვაურთა სული უბედურების გამო გაილია.

²⁷წრიალებენ და ირყევიან, ვითარცა მთვრალნი და მთელი მათი სიბრძნე დაინთქა.

²⁸შეჰღაღადეს უფალს თავიანთი უბედურების ჟამს და გაჭირვებიდან იხსნა ისინი.

²⁹დააწყნარა ზღვის ღელვა და დაადუმა მისი ტალღები.

³⁰გამხიარულდნენ, რადგან დაწყნარდნენ და წარუძღვა მათ მყუდრო სავანისკენ.

³¹დაე, აქონ უფლის წყალობა და მისი საოცრებანი ადამის ძეთა მიმართ;

³²დაე, აღამაღლონ ხალხის კრებულში და ხოტბა შეასხან უხუცესთა შორის.

³³მდინარეებს უდაბნოდ გადააქცევს, წყაროს წყლებს - დააშრობს.

³⁴ნაყოფიერ მიწას - დაამლაშებს, მისი მკვიდრების უკეთურობის გამო.

³⁵უდაბნოს წყალუხვ ტბად გადააქცევს და გამოფიტულ მიწას - წყაროს წყლად.

³⁶იქ ასახლებს მშივრებს, რათა ქალაქი დააფუძნონ საცხოვრებლად,

³⁷დათესავენ მინდვრებს, გააშენებენ ვენახს და უხვ ნაყოფს მოიწევენ.

³⁸აკურთხებს მათ, გამრავლდებიან ფრიად და არ შეამცირებს მათ პირუტყვს.

³⁹მაგრამ ისევ დაცოტავდებიან და მოიდრიკებიან ჩაგვრის, უბედურებისა და წუხილის გამო.

⁴⁰სირცხვილს დაატეხს მთავრებს და უგზო-უკვლოდ ახეტიალებს.

⁴¹ღარიბს კი გამოიყვანს სიღატაკიდან და ცხვრის ფარასავით მოაშენებს მის შთამომავალს.

⁴²დაინახავენ ამას წრფელნი და გაიხარებენ, ყოველი უმართლო კი პირს მოკუმავს.

⁴³ვინც ბრძენია, ჩაუკვირდეს ამ ყოველივეს და გაიგებს უფლის წყალობას.