Read Traducción Kadosh Israelita Mesiánica ფსალმუნები 108 Bible Online

ფსალმუნები 108 - Traducción Kadosh Israelita Mesiánica bible

ფსალმუნები 108

¹ღმერთო ჩემი დიდებისა, ნუ დადუმდები.

²რადგან პირი ბოროტისა და პირი მზაკვრისა გაიხსნა ჩემს წინააღმდეგ. ცბიერი ენით მელაპარაკებიან.

³გარს შემომერტყნენ სიძულვილის სიტყვებით და უმიზეზოდ მეომებიან.

⁴ჩემი სიყვარულის წილ ბრალს მდებენ, მე კი ვლოცულობ.

⁵კეთილის წილ ბოროტი მომაგეს და ჩემი სიყვარულის წილ - სიძულვილი.

⁶ბოროტი კაცი დაუყენე ზედამხედველად და ცილისმწამებელი დაუდგეს მარჯვნივ.

⁷გამტყუვნდეს განკითხვისას და მისი ლოცვა ცოდვად შეირაცხოს.

⁸იყოს დღეები მისი მცირე და მის ადგილს სხვა დაეპატრონოს.

⁹მისი შვილები ობლად დარჩნენ და მისი ცოლი - ქვრივად.

¹⁰იხეტიალონ მისმა შვილებმა, და იმათხოვრონ; ითხოვდნენ პურს თავიანთი ნანგრევებიდან.

¹¹მოვალემ მიითვისოს ყოველივე, რაც მას გააჩნია და უცხოებმა დაიტაცონ მისი ნაჯაფი.

¹²ნუ ეყოლება სიკეთის მქმნელი და ნურავინ შეიწყალებს მის ობლებს.

¹³მოისპოს მისი შთამომავალობა და მომდევნო თაობაშივე წაიშალოს მისი სახელი.

¹⁴გაუხსენდეს მისი მამების ბრალი უფლის წინაშე და დედამისის ცოდვა ნუ წაიშლება.

¹⁵მუდმივად ღვთის თვალწინ იყოს მათი ცოდვები, რათა მოსპოს მათი სახსენებელი ამ ქვეყნიდან.

¹⁶რადგან არ გახსენებია წყალობის ქმნა, სდევნიდა მოსაკლავად ჩაგრულს, ღატაკსა და გულშემუსვრილს.

¹⁷უყვარდა წყევლა, ამიტომ მასვე მიუვიდა ის; არ ისურვა კურთხევა, ამიტომ განშორდა მას.

¹⁸სამოსელივით შეიმოსა წყევლა, წყალივით შევიდა მის შინაგანში და ზეთივით - მის ძვლებში.

¹⁹სამოსელივით ეცვას და სარტყელივით მუდმივად ჰქონდეს შემორტყმული.

²⁰ასეთია უფლის მისაგებელი ჩემს მოძულეთა და ჩემზე ავის მოლაპარაკეთა მიმართ,

²¹შენ კი უფალო, ღმერთო ჩემო, წყალობით მომექეცი შენი სახელის გამო, გადამარჩინე, ვინაიდან კარგია შენი სიკეთე;

²²რადგან ღარიბ-ღატაკი ვარ და განგმირული მაქვს გული.

²³გადახრილი ჩრდილივით ვქრები, კალიასავით ვარ ჩამობერტყილი.

²⁴მარხვისგან მუხლები დამიუძლურდა, ზეზეურად ჩამოვხმი.

²⁵მათი სალანძღავი გავხდი, ჩემს დანახვაზე თავს იქნევდნენ.

²⁶შემეწიე უფალო, ღმერთო ჩემო, მიხსენი შენი წყალობისამებრ.

²⁷დაე, გაიგონ, რომ შენი ხელია ეს, რომ შენ მოიმოქმედე ეს, უფალო.

²⁸ისინი მწყევლიან, შენ კი მაკურთხე; აღდგებიან და შერცხვებიან, შენი მსახური კი გაიხარებს.

²⁹გაწბილებით შეიმოსონ ჩემი მოძულენი და მოსასხამივით წამოისხან თავისი სირცხვილი.

³⁰ხმამაღლა შევაქებ უფალს ჩემი პირით და მრავალთა შორის ვადიდებ მას.

³¹რადგან მარჯვნივ დაუდგება ღატაკს, რათა იხსნას მისი სული განმკითხველთაგან.