Traducción Kadosh Israelita Mesiánica bible online

ფსალმუნები 118

¹ნეტარ არს, ვისი გზაც უბიწოა და ვინც უფლის რჯულით დადის.

²ნეტარ არიან მისი მცნებების შემნახველნი, მთელი გულით რომ ეძებენ მას.

³უმართლობას არ სჩადიან, მისი გზით დადიან;

⁴შენ გვიბრძანე, რომ მტკიცედ დაგვეცვა შენი ბრძანებები.

⁵ნეტამც წარმემართებოდეს გზები შენი წესების დასაცავად.

⁶მაშინ აღარ შემრცხვებოდა, ყოველ შენს მცნებას რომ შევხედავდი.

⁷წრფელი გულით განგადიდებ, როცა შენი სიმართლით განკითხვას ვისწავლი.

⁸დავიცავ შენს დადგენილებებს, სულ ნუ მიმატოვებ.

⁹როგორ შეინახოს ყმაწვილმა სიწმიდე თავისი გზისა? დაიცვას იგი შენი სიტყვისამებრ.

¹⁰მთელი გულით გეძიებ შენ, ნუ გადამახვევინებ შენი მცნებებიდან.

¹¹გულში დავიუნჯე შენი სიტყვები, რათა არ შევცოდო.

¹²კურთხეულ ხარ, უფალო! მასწავლე შენი წესები.

¹³ჩემი ბაგეებით ვაცხადებ შენი პირის ყველა სამართალს.

¹⁴შენი მოწმობების გზაზე ვხარობ, ვითარცა დიდ სიმდიდრეზე.

¹⁵ვიფიქრებ შენს დადგენილებებზე და დავუკვირდები შენს გზებს.

¹⁶შენი წესებით გავიხარებ და შენს სიტყვას არ დავივიწყებ.

¹⁷კეთილი უყავ შენს მსახურს, რათა ვიცოცხლო და დავიცვა შენი სიტყვა.

¹⁸ამიხილე თვალები, რომ დავინახო შენი რჯულის საოცრებები.

¹⁹მწირი ვარ ამ ქვეყნად, ნუ დამიმალავ შენს მცნებებს.

²⁰სული დამექანცა, ყოველჟამს შენი სამართლის წადილით.

²¹შერისხე ამპარტავანნი, წყეულნი, რომელთაც გადაუხვიეს შენი მცნებებიდან.

²²სირცხვილი და შეურაცხყოფა ამაცილე, რადგან ვიცავდი შენს მოწმობებს.

²³სხედან მთავრები და ჩემს წინააღმდეგ თათბირობენ, შენი მსახური კი შენს წესებზე ფიქრობს.

²⁴შენი მცნებები სიხარულია ჩემთვის - ჩემი მრჩეველნი არიან ისინი.

²⁵მტვერს მიეკრა სული ჩემი; მაცოცხლე შენი სიტყვისამებრ.

²⁶გაუწყე ჩემი გზები და პასუხიც გამეცი; მასწავლე შენი წესები.

²⁷შენს დადგენილებების გზას მიმახვედრე, რომ ვიფიქრო შენს საოცარ საქმეებზე.

²⁸მწუხარებით გაილია ჩემი სული; შენი სიტყვით გამამაგრე.

²⁹სიცრუის გზა განმაშორე და შენი რჯულისამებრ შემიწყალე.

³⁰ერთგულების გზა ავირჩიე, შენი სამართალნი წინ დავიყენე.

³¹შენს მოწმობებს მივეწებე; უფალო, ნუ შემარცხვენ.

³²შენი მცნებების გზაზე ვირბენ, რადგან გულს მიფართოვებ.

³³უფალო, მასწავლე შენი წესების გზა და ბოლომდე დავიცავ მას.

³⁴მომეცი გონიერება, რათა დავიცვა შენი რჯული და მთელი გულით შევინახო იგი.

³⁵დამაყენე შენი მცნებების კვალზე, რადგან მათში ვპოულობ სიხარულს.

³⁶შენი მოწმობებისკენ მიმართე ჩემი გული და არა ანგარებისკენ.

³⁷მომიბრუნე თვალი, რომ ამაოებას არ ვუყურო; შენი გზით მაცოცხლე.

³⁸განუმტკიცე შენი ნათქვამი შენს მსახურს, რადგან შენი მოშიშია იგი.

³⁹ამაცილე შერცხვენა, რომლისაც მეშინია, რადგან კარგია შენი სამართალი.

⁴⁰აჰა, მწადია შენი ბრძანებანი; შენი სიმართლით მაცოცხლე.

⁴¹მოვიდეს ჩემზე შენი წყალობა, უფალო, და ხსნა შენმიერი, შენი სიტყვისამებრ,

⁴²მაშინ პასუხს გავცემ ჩემს მლანძღველს, რადგან შენი სიტყვის იმედი მაქვს.

⁴³სულ ნუ წაართმევ ჩემს ბაგეებს ჭეშმარიტების სიტყვას, რადგან შენს სამართალს მოველი.

⁴⁴მუდამ დავიცავ შენს რჯულს, მარადიულად, უკუნისამდე.

⁴⁵ფართო ადგილზე ვივლი, რადგან შენს ბრძანებებს ვიცავდი.

⁴⁶მეფეთა წინ დავამოწმებ შენზე და არ შემრცხვება.

⁴⁷გავიხარებ შენი მცნებებით, რომლებიც მიყვარს;

⁴⁸ხელებს აღვაპყრობ შენი მცნებებისკენ, რომლებიც მიყვარს და შენს დადგენილებებზე ვიფიქრებ.

⁴⁹გაუხსენე შენს მსახურს სიტყვა, რომლითაც დამაიმედე.

⁵⁰ის არის ჩემი ნუგეში გასაჭირში, რადგან შენმა ნათქვამმა გამომაცოცხლა.

⁵¹დიდად დამცინოდნენ ამპარტავანნი, მაგრამ შენი რჯულიდან არ გადამიხვევია.

⁵²ვიხსენებ შენს სამართალს, რომელიც ოდითგანვეა უფალო, და თავს ვინუგეშებ.

⁵³მგზნებარე რისხვამ შემიპყრო ცოდვილთა გამო, რომლებმაც მიატოვეს შენი რჯული.

⁵⁴სიმღერებად მექცა შენი წესები, ჩემი ხიზნობის სახლში.

⁵⁵ღამღამობით ვიხსენებდი შენს სახელს უფალო და ვიცავ შენს რჯულს.

⁵⁶ასეთია ჩემი ხვედრი: შენს ბრძანებებს ვიცავ.

⁵⁷ვთქვი: უფალია ჩემი ხვედრი; დავიცავ მის სიტყვებს.

⁵⁸გევედრები მთელი გულით; შემიწყალე შენი სიტყვისამებრ.

⁵⁹ვუკვირდებოდი ჩემს გზებს და შენი მცნებისკენ ვიბრუნებდი ფეხს.

⁶⁰ვჩქარობდი და არ ვაყოვნებდი შენი მცნებების დაცვას.

⁶¹საბელნი ბოროტეულთა გარს შემომერტყა, არ დავივიწყე შენი რჯული.

⁶²შუაღამისას ავდგები, რომ მადლობა გითხრა, შენი სამართლიანი განკითხვების გამო.

⁶³თანაზიარი ვარ ყველასი, ვინც შენი მოშიშია და იცავს შენს მცნებებს.

⁶⁴შენი წყალობით, უფალო, სავსეა ქვეყნიერება; მასწავლე შენი წესდებანი.

⁶⁵კეთილად ექცეოდი შენს მსახურს უფალო, შენი სიტყვისამებრ.

⁶⁶კეთილი განსჯა და გაგება მასწავლე, რადგან მჯერა შენი მცნებებისა.

⁶⁷ვცდებოდი, ვიდრე დავისაჯე; ახლა კი შენს სიტყვას ვიცავ.

⁶⁸კეთილი ხარ და კეთილმოქმედი; მასწავლე შენი წესები.

⁶⁹ტყუილს თხზავენ ჩემზე ამპარტავანნი, მთელი გულით დავიცავ შენს ბრძანებებს.

⁷⁰უგრძნობი გახდა მათი გული, მე კი შენი რჯულით ვხარობ.

⁷¹კარგია ჩემთვის, რომ ვეტანჯე, რათა ვისწავლო შენი წესები.

⁷²უმჯობესია ჩემთვის რჯული შენი ბაგისა, ვიდრე ათასი ოქრო და ვერცხლი.

⁷³შენმა ხელებმა შემქმნა და გამომსახა; გამჭრიახობა მომეცი, რომ ვისწავლო შენი მცნებანი.

⁷⁴შემხედავენ შენი მოშიშნი და გაიხარებენ, რადგან შენს სიტყვაზე ვარ მონდობილი.

⁷⁵ვიცი უფალო, რომ სამართლიანია შენი განკითხვა, სამართლიანად დავისაჯე.

⁷⁶ნეტავი შენი წყალობით მანუგეშებდე, როგორც აღუთქვი შენს მსახურს.

⁷⁷წყალობა მიყავი, რათა ვიცოცხლო, რადგან მიყვარს შენი რჯული.

⁷⁸შერცხვნენ ამპარტავნები, რადგან ტყუილად მჩაგრავდნენ, მე კი შენს ბრძანებებს ჩავუკვირდები.

⁷⁹დაბრუნდნენ ჩემთან შენი მოშიშნი - შენი მოწმობების მცოდნენი.

⁸⁰უბიწო იყოს შენ წინაშე გული ჩემი, რათა არ შევრცხვე.

⁸¹სული ჩემი გაილია შენმიერი ხსნის მოლოდინში, მაგრამ მაინც შენს სიტყვას ვენდობი.

⁸²თვალები დამეღალა შენი სიტყვის მოლოდინში, ვამბობ: როდის მანუგეშებ მე?

⁸³კვამლში დაკიდებულ ტიკს დავემსგავსე, მაგრამ მაინც არ დავივიწყე შენი წესები.

⁸⁴რამდენია დღენი შენი მსახურისა? როდის აღასრულებ სამართალს ჩემს მდევნელებზე?

⁸⁵ორმოებს მითხრიდნენ ქედმაღალნი, ისინი არ მიჰყვებიან შენს რჯულს.

⁸⁶ყველა შენი მცნება ჭეშმარიტია; უმიზეზოდ მდევნიან, მიშველე.

⁸⁷ლამის მომსპონ ამ ქვეყანაზე. მაინც არ მივატოვე შენი ბრძანებანი.

⁸⁸შენი წყალობით გამაცოცხლე, რათა დავიცვა შენი პირის მოწმობანი.

⁸⁹უფალო, უკუნისამდეა განმტკიცებული შენი სიტყვა ზეცაში.

⁹⁰თაობიდან თაობამდეა შენი ერთგულება; დააფუძნე ქვეყანა და დგას.

⁹¹შენი ბრძანებით დგანან დღესაც, რადგან შენი მსახურები არიან.

⁹²შენი რჯული რომ არ მყვარებოდა, ჩემს ტანჯვაში დავიღუპებოდი.

⁹³უკუნისამდე არ დავივიწყებ შენს ბრძანებებს, რადგან მათით მაცოცხლებდი.

⁹⁴შენი ვარ - მიხსენი, რადგან შენს ბრძანებებს ვეძიებდი.

⁹⁵მიდარაჯდებიან ბოროტნი, რომ დამღუპონ; მე კი შენს მცნებებს ღრმად ვუკვირდები.

⁹⁶ყოველგვარი სრულყოფილების დასასრული მინახავს; შენი მცნებანი კი ვრცელია, უსაზღვრო.

⁹⁷როგორ მიყვარს შენი რჯული, მასზე ვფიქრობ მთელი დღე.

⁹⁸ჩემს მტრებზე მეტად დამაბრძენეს შენმა მცნებებმა, რადგან მარადის ჩემ წინაა ისინი.

⁹⁹ყველა ჩემს მასწავლებელზე გონიერი გავხდი, რადგან შენს მოწმობებზე ვფიქრობ.

¹⁰⁰მოხუცებზე მეტად საზრიანი ვარ, რადგან შენს წესებს ვინახავ.

¹⁰¹ყოველგვარ ბოროტ გზას მოვარიდე ფეხი, რათა დავიცვა შენი სიტყვა.

¹⁰²შენი სამართლისგან არ გადამიხვევია, რადგან თვითონ შენ მასწავლიდი.

¹⁰³რარიგ ტკბილია ჩემი სასისთვის შენი სიტყვები, თაფლზე ტკბილია ჩემი პირისთვის.

¹⁰⁴შენი წესებიდან ვღებულობ გონიერებას, ამიტომ მოვიძულე სიცრუის ყოველი გზა.

¹⁰⁵ლამპარია ჩემს ფერხთათვის შენი სიტყვა და სინათლე - ჩემი ბილიკისთვის.

¹⁰⁶დავიფიცე, რომ აღვასრულებდი შენს სამართალს და შევასრულებ კიდეც.

¹⁰⁷მეტისმეტად დავიტანჯე; ღმერთო, მაცოცხლე შენი სიტყვისამებრ.

¹⁰⁸მიიღე ნებაყოფილობითი შესაწირი ჩემი პირისა - გთხოვ, უფალო და მასწავლე შენი სამართალი.

¹⁰⁹განუწყვეტლივ ჩემს ხელისგულზეა ჩემი სიცოცხლე და მაინც არ ვივიწყებ შენს რჯულს.

¹¹⁰მახე დამიგეს ბოროტებმა, მაგრამ არ გადამიხვევია შენი წესებიდან.

¹¹¹საუკუნოდ დავიმკვიდრე შენი მოწმობანი, რადგან ჩემი გულის სიხარულია ისინი.

¹¹²ჩემი გული შენი წესების შესასრულებლად მივმართე უკუნითი უკუნისამდე.

¹¹³ორგული კაცი შევიძულე და შენი რჯული შევიყვარე.

¹¹⁴ჩემი თავშესაფარი და ფარი ხარ, შენს სიტყვაზე ვარ მინდობილი.

¹¹⁵განმშორდით ბოროტმოქმედნო, რათა დავიცვა ჩემი ღმერთის მცნებანი.

¹¹⁶შემეწიე შენი სიტყვისამებრ, რათა ვიცოცხლო და არ შევრცხვე ჩემს იმედში.

¹¹⁷შემეწიე და გადავრჩები, მუდამ შენს წესდებებს ჩავუკვირდები.

¹¹⁸უკუგდებული გყავს ყველა, ვინც შენს წესებს განუდგა, რადგან ყალბია მათი ხრიკები.

¹¹⁹ნარჩენებივით მოიშორე ქვეყნის ყოველი ბოროტი, ამიტომ შევიყვარე შენი მცნებები.

¹²⁰შენი შიშით თრთის ჩემი სხეული და მეშინია შენი განკითხვისა.

¹²¹სამართალი და სიმართლე ვქმენი. ჩემს მჩაგვრელებს ნუ შემატოვებ.

¹²²სასიკეთოდ გამოესარჩლე შენს მსახურს, რომ არ დამჩაგრონ ქედმაღლებმა.

¹²³თვალები მომექანცა შენი ხსნისა და შენი სიმართლის სიტყვის მოლოდინში.

¹²⁴წყალობით მოეკიდე შენს მსახურს და შენი წესები მასწავლე.

¹²⁵შენი მსახური ვარ, მომეცი გონიერება, რომ შევიცნო შენი მოწმობები.

¹²⁶ჟამია, რომ იმოქმედო, უფალო, რადგან დაარღვიეს შენი რჯული.

¹²⁷ამიტომ მიყვარს შენი მცნებები ოქროსა და ბაჯაღლოზე მეტად.

¹²⁸ამიტომაც სწორად მივიჩნიე ყოველი შენი ბრძანება, ხოლო ყოველი ცრუ გზა მოვიძულე.

¹²⁹საოცარია შენი მოწმობები; ამიტომ ინახავს მათ ჩემი სული.

¹³⁰სინათლეს იძლევა შენი სიტყვის გამოცხადება, გონიერებას მატებს გულუბრალოებს.

¹³¹პირი გავხსენი და ამოვიოხრე, რადგან შენი მცნებები მომენატრა.

¹³²მომხედე და შემიწყალე, როგორც შეეფერება შენი სახელის მოყვარულთ.

¹³³შენი ნათქვამით განმიმტკიცე ნაბიჯები, ნუ გააბატონებ ჩემზე ნურა უსამართლოს.

¹³⁴ადამიანის ჩაგვრისგან გამომისყიდე, რათა შევძლო შენი წესების დაცვა.

¹³⁵შენი სახე გამოუბრწყინე შენს მსახურს და მასწავლე შენი წესდებანი.

¹³⁶ცრემლის ნაკადები მომდის თვალებიდან, რადგან არ იცავენ შენს რჯულს.

¹³⁷მართალი ხარ უფალო და სწორია შენი სამართალი.

¹³⁸შენ დაადგინე შენი მცნებები სიმართლეში და სრულ ჭეშმარიტებაში.

¹³⁹შემჭამა მოშურნეობამ, რადგან დაივიწყეს შენი სიტყვები ჩემმა მტრებმა.

¹⁴⁰ფრიად ხალასია შენი სიტყვა და უყვარს იგი შენს მსახურს.

¹⁴¹მცირე ვარ და მოძულებული, მაგრამ შენს წესდებებს არ ვივიწყებ.

¹⁴²სიმართლე შენი მარადიული სიმართლეა და რჯული შენი ჭეშმარიტია.

¹⁴³გასაჭირი და სიძნელე დამატყდა თავს, მაგრამ შენი მცნებები სიხარულია ჩემთვის.

¹⁴⁴მართალია შენი მოწმობანი საუკუნოდ; მომეცი გაგება, რომ ვიცოცხლო.

¹⁴⁵მთელი გულით მოგიხმობ; მიპასუხე, უფალო! შენს წესებს დავიცავ.

¹⁴⁶მოგიხმობ, მიხსენი და შენს მოწმობებს დავიცავ.

¹⁴⁷განთიადამდე ვდგები და შემოგღაღადებ, შენს სიტყვაზე ვარ დაიმედებული.

¹⁴⁸ჩემი თვალები ღამის გუშაგობას ასწრებს, რათა ჩავუკვირდე შენს სიტყვას.

¹⁴⁹ისმინე ჩემი ხმა შენი წყალობისამებრ; შენი სამართლით მაცოცხლე, ღმერთო.

¹⁵⁰მომიახლოვდნენ ავისმზრახველნი; შორს დგანან ისინი შენი რჯულისგან.

¹⁵¹მაგრამ შენ ახლოს ხარ უფალო და ყოველი მცნება შენი ჭეშმარიტებაა.

¹⁵²ძველთაგანვე ვიცი შენს მოწმობებზე, რომ სამარადჟამოდ დააფუძნე ისინი.

¹⁵³იხილე ჩემი ტანჯვა და მიხსენი, რადგან არ დავივიწყე შენი რჯული,

¹⁵⁴გამომესარჩლე და გამომისყიდე, შენი სიტყვისამებრ მაცოცხლე.

¹⁵⁵ბოროტთაგან შორსაა ხსნა, რადგან შენს კანონებს არ ეძიებენ.

¹⁵⁶უხვია შენი წყალობა უფალო, შენი სამართლისამებრ მაცოცხლე.

¹⁵⁷ბევრია ჩემი მდევარი და მოდავე; მაგრამ შენი მოწმობებისთვის არ გადამიხვევია.

¹⁵⁸ვიხილე განდგომილნი და შევიძულე, რადგან შენს ნათქვამს არ იცავენ.

¹⁵⁹ნახე, როგორ შევიყვარე შენი წესები; ღმერთო, მაცოცხლე შენი წყალობისამებრ.

¹⁶⁰ჭეშმარიტია შენი სიტყვა დასაბამიდან და მარადიულია შენი სამართლიანი სამართალი.

¹⁶¹უმიზეზოდ მდევნიან მთავარნი, მაგრამ შენი სიტყვების შიში აქვს ჩემს გულს.

¹⁶²ისე მახარებს შენი სიტყვა, როგორც დიდი ნადავლის პოვნა.

¹⁶³მძულს და მძაგს სიცრუე, შენი რჯული კი მიყვარს.

¹⁶⁴დღეში შვიდჯერ გაქებ შენი სამართლიანი განკითხვისთვის.

¹⁶⁵დიდია მშვიდობა შენი რჯულის მოყვარულთათვის და არ არსებობს მათთვის დაბრკოლება.

¹⁶⁶შენმიერი ხსნის იმედი მაქვს, უფალო, და შენს ბრძანებებს ვასრულებ.

¹⁶⁷შენს მოწმობებს იცავს სული ჩემი და ძლიერ მიყვარს ისინი.

¹⁶⁸შენს წესებსა და მოწმობებს ვიცავ, რადგან შენ წინაშეა ყველა ჩემი გზა.

¹⁶⁹ღმერთო, მოაღწიოს შენამდე ჩემმა ღაღადმა; მომეცი გონიერება შენი სიტყვისამებრ.

¹⁷⁰მოვიდეს ჩემი ვედრება შენ წინაშე; მიხსენი შენი სიტყვისამებრ.

¹⁷¹გაქონ ჩემმა ბაგეებმა, რადგან შენ მასწავლე წესები შენი.

¹⁷²შენს სიტყვაზე იგალობებს ენა ჩემი, რადგან შენი ყველა მცნება სიმართლეა.

¹⁷³შენი ხელი შემეწიოს, რადგან შენი ბრძანებანი ავირჩიე.

¹⁷⁴შენმიერ ხსნას ვნატრობ ღმერთო, შენი რჯული საამურია ჩემთვის.

¹⁷⁵იცოცხლოს ჩემმა სულმა და გადიდოს; შემეწიოს შენი სამართალი.

¹⁷⁶დაკარგული ცხვარივით ამებნა გზა; მოძებნე შენი მსახური, რადგან შენი მცნებები არ დავივიწყე.

Read Traducción Kadosh Israelita Mesiánica ფსალმუნები 118 Bible Online

ფსალმუნები 118 - Traducción Kadosh Israelita Mesiánica bible

ფსალმუნები 118