Read Traducción Kadosh Israelita Mesiánica ფსალმუნები 138 Bible Online

ფსალმუნები 138 - Traducción Kadosh Israelita Mesiánica bible

ფსალმუნები 138

¹უფალო, შენ გამომიკვლიე და მიცნობ.

²იცი, როდის ვჯდები და ვდგები; შორიდანვე ხვდები ჩემს ფიქრებს.

³დავდივარ თუ ვისვენებ ჩემს გვერდით ხარ; გამოკვლეული გაქვს ყველა გზა ჩემი.

⁴ჯერ ენაზეც არ მომდგომია სიტყვა, აჰა, უკვე სრულად იცის უფალმა.

⁵გარსშემომერტყი ზურგიდან და წინიდან და ხელი დამადე.

⁶გაოცებული ვარ, როგორ შემიცანი ასე; ჩემს გონებას აღემატება.

⁷სად წავუვალ შენს სულს და შენს სახეს სად გავექცევი?

⁸ზეცაში ავიდე - იქ ხარ, ქვესკნელში ჩავიდე - იქაც ხარ!

⁹ფრთებიც რომ გამოვისხა განთიადისა, დავსახლდე ზღვის კიდეზე -

¹⁰იქაც შენი ხელი წამიძღვება და შენი მარჯვენა დამიჭერს.

¹¹თუ ვიტყვი: ნამდვილად ბნელი დამფარავს და ღამე სინათლედ გადამექცევა.

¹²წყვდიადიც კი არ იქნებოდა შენთვის ბნელი; ღამე დღესავით გაანათებდა, რადგან სიბნელეც სინათლეა შენთვის!

¹³შენ გამოსახე ჩემი თირკმელები, დედაჩემის მუცელში გამომძერწე.

¹⁴გაქებ, რადგან შიშით აღსავსე და მშვენიერი გამომსახე; საკვირველია შენი საქმენი და კარგად იცის ეს ჩემმა სულმა.

¹⁵არ დაფარულა შენგან ჩემი ძვლები, როცა ჩავისახე იდუმალებაში და შევნივთდი მუცლის სიღრმეებში.

¹⁶ჩემი ჩანასახი იხილეს შენმა თვალებმა და შენს წიგნში იყო ჩაწერილი ჩემი მომავალი დღეები, როცა ჯერ კიდევ არ იყო არც ერთი მათგანი.

¹⁷რაოდენ ძვირფასია ჩემთვის შენი ზრახვანი, ღმერთო, და რაოდენ დიდია მათი რიცხვი.

¹⁸დავთვალო - ქვიშაზე უმრავლესია. ვიძინებ ამ ფიქრებში, ვიღვიძებ და, ისევ შენთან ვარ.

¹⁹ნეტამც მოსრავდე, ღმერთო, ბოროტს! გამშორდით სისხლისმსმელნო!

²⁰მზაკვრულად ლაპარაკობენ შენზე - ფუჭად ახსენებენ შენს სახელს შენი მტრები!

²¹უფალო, ნუთუ არ მოვიძულო შენი მოძულენი და არ ვედავო შენს მოწინააღმდეგეთ?!

²²სრული სიძულვილით მოვიძულე ისინი; შენი მტრები ჩემს მტრებად მივიჩნიე.

²³გამომიკვლიე უფალო და შეიცანი ჩემი გული; შემამოწმე და გაიგე ჩემი აზრები.

²⁴ნახე, ზიანის მომტან გზაზე ხომ არ ვდგავარ და მარადიულ გზაზე წამიძეხი.