Read Traducción Kadosh Israelita Mesiánica ფსალმუნები 139 Bible Online

ფსალმუნები 139 - Traducción Kadosh Israelita Mesiánica bible

ფსალმუნები 139

¹ბოროტი ადამიანისგან მიხსენი უფალო, მოძალადე კაცისგან დამიფარე.

²რადგან გულში ბოროტებას იზრახავენ, ყოველდღე საომრად ემზადებიან.

³გველივით მოილესეს ენები, ასპიტის შხამია მათ ბაგეებზე.

⁴ბოროტთა ხელიდან დამიცავი უფალო, დამიფარე მოძალადე კაცისგან, რომელთაც ჩემი ნაბიჯების დაბრკოლება განიზრახეს.

⁵მახე და საბელი გამიმზადეს ამპარტავნებმა, ბადე დამიფინეს გზაზე, ხაფანგი დამიგეს.

⁶ვუთხარი უფალს: ჩემი ღმერთი ხარ შენ; ისმინე, უფალო, ხმა ჩემი ვედრებისა.

⁷უფალო ღმერთო, ჩემი გადარჩენის ძალავ! შენ გადამეფარე თავზე ფარად ბრძოლის დღეს.

⁸ბოროტის გულისწადილს ნუ აასრულებ, უფალო, მის ზრახვებს გზას ნუ მისცემ, თორემ აღზევდება.

⁹დაფაროს ჩემს გარემომცველთა თავი მათ ბაგეთა ბოროტებამ.

¹⁰გავარვარებული ნაკვერჩხლები დაეცეთ, ცეცხლში ჩაცვივდნენ, ღრმა ორმოში, რომ ვეღარ წამოდგნენ.

¹¹ნუ დამკვიდრდება ჭორიკანა კაცი ქვეყანაზე, ბოროტებამ მოინადიროს მოძალადე კაცი ძირს დასაცემად.

¹²ვიცი, რომ უფალი მოისმენს ჩაგრულის საჩივარს და ღარიბს სამართალს გაუჩენს.

¹³დიახ, მადლობას მიაგებენ მართალნი შენს სახელს და შენი სახის წინაშე დამკვიდრდებიან გულწრფელნი.