Read Traducción Kadosh Israelita Mesiánica ფსალმუნები 143 Bible Online

ფსალმუნები 143 - Traducción Kadosh Israelita Mesiánica bible

ფსალმუნები 143

¹კურთხეულ იყოს უფალი, ჩემი კლდე, რომელიც ბრძოლას ასწავლის ჩემს ხელებს და ომს - ჩემს თითებს.

²მწყალობელო ჩემო და სიმაგრევ ჩემო, თავშესაფარი და მხსნელი ხარ ჩემი, ფარი და იმედი, რომელიც ხალხებს მიმორჩილებს.

³უფალო, რა არის კაცი, რომ იცნობ მას, ძე ადამისა, ყურადღებას რომ აქცევ?

⁴ადამიანი ამოსუნთქვასავითაა, ჩრდილივით წარმავალია მისი დღეები.

⁵უფალო, მოდრიკე ცანი შენი და ჩამოდი, შეეხე მთებს, რომ აკვამლდნენ.

⁶ელვით გაანათე და გაფანტე ისინი, გამოუშვი შენი ისრები და თავზარი დაეცი მათ.

⁷მაღლიდან გამოიწოდე შენი ხელი; მიხსენი და გადამარჩინე დიდი წყლებისგან, უცხო ხელთაგან,

⁸რომელთა ბაგენი სიცრუეს ლაპარაკობენ და რომელთა მარჯვენა სიცრუის მარჯვენაა.

⁹ახალ სიმღერას გიმღერებ, ღმერთო! ათსიმიან ჩანგზე გიგალობებ,

¹⁰მეფეთა მხსნელო, რომელიც იხსნის დავითს - თავის მსახურს ბოროტი მახვილისგან.

¹¹მიხსენი და გადამარჩინე უცხოთა ხელიდან, რომელთა ბაგენი სიცრუეს ლაპარაკობენ და რომელთა მარჯვენა სიცრუის მარჯვენაა.

¹²დაე, ნერგებივით იზრდებოდნენ ჩვენი ძენი სიყმაწვილიდანვე; და იყვნენ ჩვენი ასულნი, ვითარცა სასახლის მშვენივრად თლილი სვეტები.

¹³ნაირნაირი მოსავლით იყოს სავსე ჩვენი ბეღლები. ჩვენი ცხვრები კი ათასობით და ათი ათასობით მრავლდებოდნენ ჩვენს საძოვრებზე.

¹⁴დატვირთული იყოს ჩვენი საქონელი, არ იყოს არც ზარალი, არც დანაკლისი და არც გოდება ჩვენს ქუჩებში.

¹⁵ნეტარია ხალხი, რომელსაც ასე მისდის საქმე. ნეტარია ხალხი, ვისი ღმერთიც უფალია!