Read Traducción Kadosh Israelita Mesiánica ფსალმუნები 144 Bible Online

ფსალმუნები 144 - Traducción Kadosh Israelita Mesiánica bible

ფსალმუნები 144

¹აღგამაღლებ ღმერთო, მეფევ ჩემო და უკუნითი უკუნისამდე ვაკურთხებ შენს სახელს.

²ყოველდღე გაკურთხებ შენ და უკუნითი უკუნისამდე შევაქებ შენს სახელს.

³დიდია უფალი და საქებარია ფრიად, ჩაუწვდომელია მისი სიდიადე.

⁴თაობა თაობას შეუქებს შენს საქმეებს და შენს სიძლიერეს აუწყებენ.

⁵შენი მშვენების სიდიადესა და ბრწყინვალებაზე, შენს საოცარ საქმეებზე ვილაპარაკებ.

⁶ისინი შენი საშიში საქმეების სიძლიერეზე ილაპარაკებენ, მე კი შენს სიდიადეს ვაუწყებ.

⁷გაიხსენებენ შენს მრავალმოწყალებას და სიხარულით შესძახებენ შენი სიმართლის გამო.

⁸მპატიებელი და შემბრალეა უფალი, სულგრძელი და დიდად მოწყალე.

⁹ყველას მიმართ კეთილია უფალი და მისი წყალობა მის ყველა ქმნილებაზეა.

¹⁰უფალო, შენ განგადიდებს ყოველი შენი ქმნილება და გაკურთხებენ შენი წმიდანები.

¹¹შენი სამეფოს დიდებასა და შენს სიძლიერეზე ილაპარაკებენ.

¹²რათა ამცნონ ადამის ძეთ შენი ძლევამოსილი საქმეები და შენი მეფობის ბრწყინვალე სიდიადე.

¹³შენი სამეფო მარადიული სამეფოა და შენი მმართველობა თაობიდან თაობებში ვრცელდება.

¹⁴ყველა დაცემულის შემწეა უფალი და წამომყენებელი ყველა წელში მოხრილისა.

¹⁵ყველას თვალი შენ შემოგცქერის, შენ აძლევ მათ საზრდოს თავის დროზე.

¹⁶გაშლი ხელს და აკმაყოფილებ ყოველი სულდგმულის საჭიროებას.

¹⁷მართალია უფალი ყველა თავის გზაზე და მოწყალეა ყველა თავის საქმეში.

¹⁸ახლოსაა უფალი ყველასთან, ვინც მას მოუხმობს, ყოველთან, ვინც ჭეშმარიტებით მოუხმობს მას.

¹⁹მის მოშიშთა სურვილს ასრულებს, მათ ღაღადისს ისმენს და იხსნის მათ.

²⁰ყველა მის მოყვარულს იცავს უფალი და სპობს ყველა ბოროტს.

²¹ჩემი პირით განვადიდებ უფალს; აკურთხოს ყოველმა ხორციელმა მისი წმიდა სახელი უკუნითი უკუნისამდე!