Read Traducción Kadosh Israelita Mesiánica ფსალმუნები 17 Bible Online

ფსალმუნები 17 - Traducción Kadosh Israelita Mesiánica bible

ფსალმუნები 17

¹შეგიყვარებ, უფალო, სიმტკიცევ ჩემო.

²უფალია ჩემი კლდე, სიმაგრე და მხსნელი ჩემი. ღმერთო ჩემო, კლდე ხარ ჩემი, ფარი, ხსნის რქა და სიმაგრე ხარ ჩემი.

³მოვუხმობ უფალს, დიდად საქებარს და დამიხსნის ჩემი მტრებისგან.

⁴გარს შემომრტყმია სიკვდილის საკვრელნი და უღმერთობის ნაკადებმა შემაძრწუნეს.

⁵ჯოჯოხეთის საკვრელნი გარს მაკრავს და წინ სიკვდილის მახეები გადამეღობა.

⁶გასაჭირში ვუხმობდი უფალს და შევღაღადებდი ჩემს ღმერთს. ისმინა ჩემი ხმა თავის ტაძარში და მის ყურს მისწვდა ჩემი ღაღადი.

⁷შეძრა და შეარყია დედამიწა, თრთოდნენ მთათა საძირკვლები; შეირყნენ, რადგან განრისხდა იგი.

⁸კვამლი გამოვიდა მისი ნესტოებიდან, მომსვრელი ცეცხლი - მისი პირიდან, ნაკვერჩხლები აღმოენთნენ მისგან.

⁹მოდრიკა ცანი და ჩამოვიდა. შავი ღრუბელი იყო მის ფეხქვეშ.

¹⁰ქერუბებზე ამხედრდა და გამოფრინდა. ქარის ფრთებით გამოეშურა.

¹¹წყვდიადი თავის საფარად აქცია, ქუფრ მძიმე ღრუბლებში გაეხვია.

¹²მისი პირის ბრწყინვალებამ გაფანტა ღრუბლები, სეტყვა და ნაკვერჩხლები.

¹³ზეცაში დაიგრგვინა უფალმა და თავისი ხმა გამოსცა უზენაესმა სეტყვით და ნაკვერჩხლებით.

¹⁴გაუშვა ისრები და მიმოფანტა, განაბნია ელვა მრავალი.

¹⁵წყლების ნაკადები გამოჩნდნენ და სამყაროს საძირკვლები გაშიშვლდნენ შენს მრისხანე დაძახილზე და შენი ნესტოების მონაბერის ქროლვაზე უფალო.

¹⁶გამომიწოდა სიმაღლიდან ხელი და ამომიყვანა; მრავალი წყლებისგან გამომიხსნა.

¹⁷ძლიერი მტრისგან დამიხსნა, ჩემთა მოძულეთაგან, ჩემზე ძლიერნი რომ იყვნენ.

¹⁸ჩემი გაჭირვების ჟამს გამოვიდნენ ჩემს წინააღმდეგ და უფალი იყო ჩემი საყრდენი.

¹⁹გაშლილ სივრცეზე გამომიყვანა, მიშველა, რადგან სასურველი ვიყავი მისთვის.

²⁰ჩემი სიმართლისამებრ მომაგო უფალმა, ჩემთა ხელთა სიწმიდის კვალობაზე დამაჯილდოვა.

²¹რადგან უფლის გზებს ვიცავდი და არ განვდგომილვარ ჩემს ღმერთს;

²²ვინაიდან თვალწინ მქონდა ყველა მისი მცნება და მისი წესებიდან არ გადამიხვევია.

²³უბიწო ვიყავი მის წინაშე და თავს ვიცავდი შეცოდებისგან.

²⁴და მომიზღო უფალმა ჩემი სიმართლით, ხელთა ჩემთა სიწმიდის კვალობაზე, მის თვალთა წინაშე.

²⁵ერთგულს ერთგულად ექცევი, უბიწოს - უბიწოებით.

²⁶წმიდას მისი სიწმიდისამებრ ექცევი და უკუღმართს - მისი უკუღმართობისამებრ.

²⁷რადგან ჩაგრულ ხალხს იხსნი და მედიდურ თვალებს ამდაბლებ.

²⁸ამიტომ ანთებს ჩემს ლამპარს უფალი; ჩემი ღმერთი სინათლედ მიქცევს სიბნელეს.

²⁹შენით დავამარცხებ ლაშქარს და ჩემი ღმერთის შეწევნით გადავევლები გალავანს.

³⁰უმწიკვლოა ღმერთის გზა, ხალასია სიტყვა უფლისა; ფარია იგი ყველასთვის, ვინც მას შეეფარება.

³¹რადგან ვინ არის ღმერთი, გარდა უფლისა? ანდა ვინ არის კლდე, გარდა ჩვენი ღმერთისა?

³²ღმერთი მმოსავს ძალით და მისწორებს გზას.

³³ჩემს ფეხებს ირმისას ამსგავსებს და ჩემს სიმაღლეებზე მაყენებს.

³⁴ბრძოლას ასწავლის ჩემს ხელებს და რვალის მშვილდს ადრეკინებს ჩემს მკლავებს.

³⁵შენ მომეცი ფარი შენი ხსნისა და შენი მარჯვენით შემეწიე! შენი წყალობა განმადიდებს!

³⁶შენ გამიფართოვე ნაბიჯები და ფეხები ჩემი აღარ წაბორძიკებულან.

³⁷დავედევნე ჩემს მტრებს, დავეწიე და არ დავბრუნდი, ვიდრე არ მოვსპე.

³⁸გავაცამტვერე და ვეღარ შეძლეს აღდგომა, ჩემს ფეხებთან დაეცნენ.

³⁹შენ შემმოსე ძალით საომრად, ჩემს ქვეშ მოდრიკე ჩემი მოწინააღმდეგენი.

⁴⁰შენ აქცევინე ზურგი ჩემს მტრებს, რათა მომესპო ჩემი მოძულენი.

⁴¹მოსთქვამდნენ და არავინ იყო მხსნელი, უფალს შესთხოვდნენ - და არ უპასუხა.

⁴²გავაცამტვერე, როგორც ქარმა მტვერი, ტალახივით გავთელე ქუჩებში.

⁴³შენ მიხსენი ხალხის დავისგან, ერთა უფროსად დამაყენე, ხალხი, რომელსაც არ ვიცნობდი, მემსახურება.

⁴⁴მოისმენენ თუ არა ჩემს ხმას - მემორჩილებიან, უცხოტომელნი მემსახურებიან.

⁴⁵უცხოელები შეშინდებიან და აკანკალებულნი გამოვლენ თავიანთი სიმაგრეებიდან.

⁴⁶ცოცხალია უფალი! დიდებულია სიმაგრე ჩემი! ამაღლდეს - ჩემი ხსნის ღმერთი.

⁴⁷ღმერთია ჩემთვის შურისმაძიებელი და ის მიმორჩილებს ერებს.

⁴⁸ის მიხსნის მტრებისგან! შენ ამამაღლე მათზე, ვინც აღსდგა ჩემს წინააღმდეგ და მიხსენი მრისხანე კაცთაგან.

⁴⁹ამიტომ გადიდებ ხალხთა შორის, უფალო და ქებით ვუმღერ შენს სახელს.

⁵⁰დიად ხსნას უვლენს თავის მეფეს და უჩვენებს წყალობას თავის ცხებულს - დავითს და მის მოდგმას უკუნითი უკუნისამდე.