Read Traducción Kadosh Israelita Mesiánica ფსალმუნები 18 Bible Online

ფსალმუნები 18 - Traducción Kadosh Israelita Mesiánica bible

ფსალმუნები 18

¹ცანი ღაღადებენ ღმერთის დიდებას და მის ხელთა ნამოქმედარს გვამცნობს სამყარო.

²დღე დღეს გადასცემს სიტყვას, ღამე კი ღამეს უმხელს ცოდნას.

³თუმცა არც მთქმელია და არც ნათქვამი, არც მათი ხმა არ ისმის არსად.

⁴მთელ დედამიწას გასდევს მათი ხაზი და სამყაროს კიდეებამდე აღწევს მათი სიტყვები; მათში დაუდგა მზეს კარავი

⁵და ნეფესავით გამოდის საქორწინო პალატიდან; გმირივით ხარობს გზის გარბენას.

⁶ცათა ერთი კიდიდანაა მისი აღმოსავალი და ბრუნვა მისი - მეორე კიდემდე; ვერაფერი ემალება მის მხურვალებას.

⁷რჯული უფლისა სრულყოფილია, სულს ანახლებს; მცნება უფლისა სარწმუნოა, გულუბრყვილოებს აბრძენებს.

⁸მართებულია უფლის ბრძანებანი, გულს ახარებენ; მცნება უფლისა სპეტაკია, შუქს აძლევს თვალებს.

⁹შიში უფლისა წმიდაა, მარადიული. უფლის განსჯანი ჭეშმარიტია, ყველა სამართლიანია.

¹⁰ოქროზე და ბაჯაღლოზე მეტად სასურველნი არიან და უტკბილესნი თაფლისა და გოლეულისა.

¹¹მათით არის გაფრთხილებული შენი მსახური; დიდია საზღაური მათი დაცვისთვის.

¹²ვინ გააცნობიერებს თავის შეცდომებს? განმწმიდე მე დაფარულთაგან.

¹³განზრახ ცოდვებისგან დაიფარე შენი მსახური, რათა არ გაბატონდნენ ჩემზე; მაშინ უმწიკვლო შევიქნები და თავს დავაღწევ დიდ დანაშაულს.

¹⁴დაე, სასურველი იყოს შენთვის, სიტყვანი ჩემი პირისა და ფიქრები ჩემი გულისა, უფალო, ბურჯო და გამომსყიდველო ჩემო.