Read Traducción Kadosh Israelita Mesiánica ფსალმუნები 21 Bible Online

ფსალმუნები 21 - Traducción Kadosh Israelita Mesiánica bible

ფსალმუნები 21

¹ღმერთო ჩემო! ღმერთო ჩემო! რად მიმატოვე? რატომ ხარ შორს, როცა საშველად შემოგღაღადებ?

²ღმერთო ჩემო! მოგიხმობ დღისით - არ მპასუხობ, ღამით - და არა მაქვს მოსვენება.

³შენ კი წმიდაო, ისრაელის ხოტბათა შორის მკვიდრობ.

⁴შენ გენდობოდნენ ჩვენი მამები, გენდობოდნენ და იხსენი კიდეც.

⁵შენ შემოგღაღადეს და გადარჩნენ; მოგენდნენ და არ გაწბილებულან.

⁶მე კი მატლი ვარ და არა კაცი, საძრახისი ადამიანთა და საძულველი ერის მიერ.

⁷ყველა, ვინც მხედავს, დამცინის; მქირდავენ და თავს აქნევენ.

⁸უფალს მიენდო და უფალმა იხსნას; მან გადაარჩინოს, რაკი ისურვა იგი.

⁹რადგან შენ გამომიყვანე დედის მუცლიდან და დამამშვიდე მის მკერდზე.

¹⁰დაბადებიდანვე შენ მოგანდეს ჩემი თავი; დედის მუცლიდანვე ჩემი ღმერთი ხარ შენ.

¹¹ნუ განმშორდები, რადგან ახლოა უბედურება, შემწე კი არავინაა.

¹²უამრავი ხარი შემომერტყა გარს, ალყაში მომიქციეს ბაშანის ძლიერმა ხარებმა.

¹³პირი დააღეს ჩემს წინააღმდეგ, მსხვერპლს დადევნებული და მბრდღვინავი ლომივით.

¹⁴წყალივით დავიღვარე და დაიშალნენ ჩემი ძვლები; ცვილს დაემსგავსა ჩემი გული, დადნა ჩემს შინაგანში.

¹⁵თიხასავით გამოიფიტა ჩემი ძალა; ენა სასაზე მიმეკრა, ჩამიყვანე სიკვდილის მტვერში.

¹⁶რადგან გარს შემომეხვივნენ ძაღლები, ბოროტმოქმედთა ხროვა წრედ შემომერტყა, ხელ-ფეხი განმიგმირეს.

¹⁷მთელი ჩემი ძვლები დაითვლება; ნიშნის მოგებით მიყურებენ.

¹⁸ჩემს სამოსელს ინაწილებენ და წილს ყრიან ჩემს მოსასხამზე.

¹⁹შენ კი, უფალო, ნუ დამშორდები; სიმძლავრევ ჩემო, ჩემდა შემწედ გამოეშურე.

²⁰იხსენი ჩემი სული მახვილისგან და ძაღლებისგან სიცოცხლე ჩემი.

²¹ლომის ხახისგან მიხსენი და გარეული ხარების რქისგან.

²²ვუამბობ ჩემს ძმებს შენს სახელზე, კრებულთა შორის შეგასხამ ხოტბას.

²³უფლის მოშიშნო, აქეთ იგი; ადიდეთ იგი, იაკობის შთამომავალნო და გეშინოდეს მისი, ისრაელის მთელო მოდგმავ.

²⁴რადგან არ მოიძულა და არ უგულებელყო მან ჩაგრულის ტანჯვა და არ დაუფარავს სახე მისგან, არამედ უსმინა მას, როცა საშველად მოუხმობდა.

²⁵ხოტბას შეგასხამ დიდ კრებულში, შენთა მოშიშთა წინაშე აღგისრულებ აღთქმულს.

²⁶შეჭამენ ღარიბები და დანაყრდებიან, ადიდონ უფალი მისმა მაძიებლებმა; უკუნისამდე იცოცხლონ თქვენმა გულებმა.

²⁷გაიხსენებენ და დედამიწის ყოველი კიდიდან დაბრუნდებიან უფალთან და თაყვანს გცემს ყველა ერი.

²⁸რადგან უფალს ეკუთვნის მეფობა და ის არის მბრძანებელი ერებისა.

²⁹შეჭამს და თაყვანს გცემს ქვეყნის ყველა ამაყი; მის წინაშე ქედს მოიხრის ყველა, ვინც მტვრად უნდა იქცეს, ვისაც არ ძალუძს საკუთარი სიცოცხლის გადარჩენა.

³⁰შთამომავლობა მოემსახურებიან მას და თაობებს მოუთხრობენ უფლის შესახებ.

³¹მოვლენ და განუცხადებენ მის სიმართლეს ხალხს, ჯერ არ შობილს და მოუთხრობენ იმაზე, რაც უფალმა მოიმოქმედა.