Read Traducción Kadosh Israelita Mesiánica ფსალმუნები 24 Bible Online

ფსალმუნები 24 - Traducción Kadosh Israelita Mesiánica bible

ფსალმუნები 24

¹შენკენ აღვაპყარ სული ჩემი უფალო.

²ღმერთო ჩემო! შენზე ვარ მონდობილი; ნუ შევრცხვები და ნუ იზეიმებს მტერი ჩემზე.

³ნურც შერცხვება ნურავინ, ვინც შენ გენდობა; ამაოდ შემცოდველნი კი შერცხვნენ.

⁴შენი გზები შემაცნობინე უფალო და მასწავლე შენი ბილიკები.

⁵გამიძეხ შენი ჭეშმარიტებით და მასწავლე, რადგან შენ ხარ ჩემი ხსნის ღმერთი; გამუდმებით შენ გენდობი.

⁶გაიხსენე, უფალო, შენი სიყვარული და წყალობა, რადგან საუკუნოა ისინი.

⁷ჩემი სიჭაბუკის ცოდვებსა და ბრალს ნუ გაიხსენებ; შენი გულმოწყალებით, შენი სიკეთით გამიხსენე უფალო.

⁸კეთილი და მართალია უფალი, ამიტომ აყენებს გზაზე ცოდვილებს.

⁹თავმდაბალთ სამართალში მიუძღვის და თავის გზას ასწავლის მორჩილთ.

¹⁰უფლის ყველა გზა წყალობა და ჭეშმარიტებაა მისი აღთქმებისა და მცნებების შემნახველთათვის.

¹¹შენი სახელისთვის შემინდე დანაშაული, უფალო, რადგან დიდია იგი.

¹²ვინ არის კაცი მოშიში უფლისა? მას უჩვენებს გზას, რომელიც უნდა აირჩიოს.

¹³სიკეთეში იცხოვრებს იგი და მისი შთამომავლობა დაიმკვიდრებს ქვეყანას.

¹⁴საიდუმლო უფლისა მისი მოშიშებისთვისაა და თავის აღთქმას აუწყებს მათ.

¹⁵მუდამ უფლისკენაა მიმართული ჩემი თვალები, ის იხსნის ჩემს ფეხებს მახისგან.

¹⁶გადმომხედე და შემიწყალე, ვინაიდან მარტოდმარტო ვარ და ჩაგრული.

¹⁷მწუხარება გამიმრავლდა გულში, მიხსენი ჩემი გაჭირვებიდან.

¹⁸შეხედე ჩემს უბედურებას და ტანჯვას და მაპატიე ჩემი ყველა შეცოდება.

¹⁹შეხედე, როგორ მომრავლდნენ ჩემი მტრები და საშინელი სიძულვილით შემიძულეს მე.

²⁰დაიფარე ჩემი სიცოცხლე და გამომიხსენი, ნუმც შევრცხვები, რადგან შენში ვპოვე თავშესაფარი.

²¹უბიწოებამ და სიწრფელემ დამიფაროს მე, ვინაიდან შენ მოგელი.

²²უფალო, გამოისყიდე ისრაელი მისი ყოველი გასაჭირიდან.