Read Traducción Kadosh Israelita Mesiánica ფსალმუნები 26 Bible Online

ფსალმუნები 26 - Traducción Kadosh Israelita Mesiánica bible

ფსალმუნები 26

¹უფალი ღმერთი შუქია ჩემი და გადარჩენა - ვის შევუშინდე? ჩემი სიცოცხლის ბურჯია უფალი - ვინ შემაძრწუნებს?

²როცა ბოროტნი თავს დამესხმიან ჩემი სხეულის შესასანსლად - თვითონვე წაბორძიკდებიან და დაეცემიან ჩემი მჩაგვრელნი და მტერნი.

³ლაშქარმაც რომ დაიბანაკოს ჩემს წინააღმდეგ, არ შეშინდება ჩემი გული; ომიც რომ ატყდეს ჩემს წინააღმდეგ, მაინც იმედი მაქვს.

⁴ერთსა ვთხოვ უფალს, ამას ვევედრები, რომ დავემკვიდრო უფლის სახლში მთელი ჩემი სიცოცხლე, ვუმზერდე უფლის სიმშვენიერეს და მის ტაძარში ფიქრს ვეძლეოდე.

⁵რადგან თავის კარავში შემიფარებს გაჭირვების ჟამს და თავისი კარვის სამალავში დამმალავს, კლდეზე მომამაღლებს.

⁶ახლა კი გარსშემოხვეულ მტრებზე მაღლა ავწევ თავს და ქების მსხვერპლს შევწირავ მის კარავში, ვუმღერებ და ვუგალობებ უფალს.

⁷უფალო, ისმინე ჩემი ხმა, როცა მოგიხმობ; შემიწყალე და მიპასუხე.

⁸შენ უთხარი ჩემს გულს: ეძიეთ ჩემი სახე! შენს სახეს მოვძებნი უფალო.

⁹ნუ დამიმალავ შენს სახეს და რისხვით ნუ უკუაგდებ შენს მორჩილს, ჩემი შემწე იყავი უწინ, ახლა ხელს ნუ მკრავ და ნუ მიმატოვებ, ჩემი ხსნის ღმერთო.

¹⁰თუნდაც მიმატოვოს ჩემმა დედ-მამამ, უფალი მიმიღებს მე.

¹¹მიწინამძღვრე, უფალო, შენს გზაზე დამაყენე და სწორ კვალზე გამიძეხი, ჩემი მტრების გამო.

¹²ნუ გადამცემ ჩემი შემავიწროებლების ხელთ, რადგან აღდგნენ ცრუმოწმენი ჩემს წინააღმდეგ და ძალადობით სუნთქავენ,

¹³თუმცა მწამს, რომ ვიხილავ უფლის სიკეთეს ცოცხალთა ქვეყანაში!

¹⁴მიენდე უფალს, გამხნევდი და გაიმაგრე გული! მიენდე უფალს!