Read Traducción Kadosh Israelita Mesiánica ფსალმუნები 30 Bible Online

ფსალმუნები 30 - Traducción Kadosh Israelita Mesiánica bible

ფსალმუნები 30

¹უფალო, შენში ვეძებ თავშესაფარს, ნურც შევრცხვენილვარ ნურასოდეს; შენი სიმართლით გამომიხსენი.

²ყური მომაპყარ, იჩქარე ჩემი გადარჩენა, თავშესაფარი კლდე იყავ ჩემთვის, სიმაგრე ჩემს დასახსნელად.

³რადგან ჩემი კლდე და სიმაგრე ხარ; შენი სახელის გულისთვის მიჩვენე გზა და გამიძეხი.

⁴გამომიყვანე მახიდან, რომელიც ჩუმად დამიგეს, რადგან შენ ხარ სიმაგრე ჩემი.

⁵შენს ხელს ვანდობ ჩემს სულს. შენ დამიხსენი, ო, უფალო, ღმერთო ჭეშმარიტო.

⁶შევიძულე ამაო კერპთა თაყვანისმცემელნი და უფალს მივენდე.

⁷ვილხენ და ვიმხიარულებ შენი წყალობით, რადგან იხილე ჩემი გაჭირვება და იცი ჩემი ტანჯვა.

⁸მტრის ხელთ არ ჩამაგდე, ფართოდ დაამკვიდრე ფერხნი ჩემნი.

⁹შემიწყალე, უფალო, რადგან მიჭირს, წუხილით დამისუსტდა თვალი, სამშვინველი და სხეული.

¹⁰რადგან ნაღველში გაილია ჩემი სიცოცხლე და გლოვაში - წლები. ჩემი ცოდვების გამო შეირყა ჩემი ძალა და ძვლები ჩემი - გამოშრა.

¹¹შერცხვენილი შევიქენი, ყველა ჩემი მტრის გამო ჩემი მეზობლების წინაშე და საფრთხობელად - ნაცნობთათვის; ამიტომ გამირბის, ვინც მხედავს ქუჩაში.

¹²მკვდარივით ამომიგდეს გულიდან; დამსხვრეულ ჭურჭელს დავემსგავსე.

¹³რადგან მესმოდა ცილისწამება მრავალთა, შიში ყოველი მხრიდან, ისინი შეითქვნენ ჩემს წინააღმდეგ, ჩემი სულის ამოხდა განიზრახეს.

¹⁴მე კი, უფალო, შენზე ვარ მონდობილი, ვთქვი: შენა ხარ ჩემი ღმერთი.

¹⁵შენს ხელთაა ჩემი დრო. მიხსენი ჩემი მდევნელებისა და მტრების ხელთაგან.

¹⁶გამოუბრწყინე შენი სახე შენს მსახურს, გადაარჩინე შენი წყალობით.

¹⁷უფალო, ნუმც შევრცხვენილვარ, რადგან შენ მოგიხმობ; ბოროტნი კი შერცხვნენ და დადუმდნენ საფლავში.

¹⁸დაე, დამუნჯდნენ ცრუ ბაგენი, რომლებიც ამპარტავნულად ლაპარაკობენ მართალზე - ქედმაღლობით და სიძულვილით.

¹⁹რაოდენ დიდია სიკეთე შენი, რომელსაც შენს მოშიშთათვის ინახავ, შენში თავშესაფრის მძებნელთ რომ განუმზადე, ადამის ძეთა წინაშე.

²⁰შენ იფარავ მათ შენი პირის საფარველქვეშ ადამიანთა ხრიკებისგან, იცავ მათი ენით მომხდარი დავიდარაბისგან.

²¹კურთხეულ იყოს უფალი, რადგან ალყაშემორტყმულ ქალაქში მომივლინა თავისი სიკეთე.

²²ვფიქრობდი ჩემი ძრწოლისას: "მოკვეთილი ვარ შენს თვალთაგან”, მაგრამ შენ ისმინე ჩემი მუდარის ხმა, როცა შემოგღაღადებდი.

²³შეიყვარეთ უფალი, ღვთისნიერნო მისნო; ერთგულს იცავს უფალი და მრავალგზის მიუზღავს ამაყებს.

²⁴გამხნევდით და გული გაიმაგრეთ ყველამ, ვისაც უფლის მოლოდინი გაქვთ.