Read Traducción Kadosh Israelita Mesiánica ფსალმუნები 32 Bible Online

ფსალმუნები 32 - Traducción Kadosh Israelita Mesiánica bible

ფსალმუნები 32

¹იხარეთ უფალში მართალნო; გულწრფელებს შეშვენით შექება.

²ადიდეთ უფალი ქნარით, ათსიმიანი ებნით უგალობეთ მას.

³უმღერეთ მას ახალი სიმღერა, ოსტატურად ააწყვეთ ჰანგი, მხიარულად შემოსძახეთ.

⁴რადგან სწორია უფლის სიტყვა და ჭეშმარიტია ყოველი საქმე მისი.

⁵უყვარს სიმართლე და სამართალი; უფლის წყალობითაა სავსე ქვეყანა;

⁶უფლის სიტყვით შეიქმნა ზეცა და მის ბაგეთა მონაბერით - მთელი მისი ლაშქარი.

⁷შეკრიბა ზღვის წყლები, ვითარცა ტიკში, საცავებში მოათავსა უფსკრულები.

⁸ეშინოდეს უფლისა მთელ დედამიწას, სამყაროს ყველა მკვიდრი თრთოდეს მისგან.

⁹რადგან მან თქვა და - შეიქმნა, მან ბრძანა და - არსებობს.

¹⁰უფალი ჩაშლის ერების ზრახვებს, გააცამტვერებს ერთა ჩანაფიქრს.

¹¹რჩევა უფლისა იდგება მარადიულად და თაობიდან თაობამდე - ზრახვანი მისი გულისა.

¹²ნეტარია ხალხი, ვისი ღმერთიც არის უფალი, ხალხი - მისდა მემკვიდრედ ამორჩეული.

¹³ზეციდან იმზირება უფალი, ხედავს ადამიანის ყველა ძეს.

¹⁴თავისი სამკვიდრებლიდან უთვალთვალებს ქვეყნის ყველა მკვიდრს.

¹⁵მან შექმნა გული ყოველისა და სწვდება ყველა მათ საქმეს.

¹⁶ვერ უშველის მეფეს ჯარის სიმრავლე და დიდი ძალა ვერ იხსნის მებრძოლს.

¹⁷უიმედოა ცხენი შველისთვის, მთელი მისი ძალა ვერ იხსნის მას.

¹⁸აჰა, თვალი უფლისა მის მოშიშებზეა - ვისაც მისი წყალობის იმედი აქვს;

¹⁹რათა იხსნას ისინი სიკვდილისგან და ასაზრდოოს შიმშილის ჟამს.

²⁰სული ჩვენი უფალს მოელის, ის არის დამხმარე და ფარი ჩვენი.

²¹რადგან მისით ხარობს ჩვენი გული და მის წმიდა სახელს ვენდობით.

²²უფალო, იყოს ჩვენზე შენი წყალობა, რადგან შენზე ვამყარებთ იმედს.