Read Traducción Kadosh Israelita Mesiánica ფსალმუნები 34 Bible Online

ფსალმუნები 34 - Traducción Kadosh Israelita Mesiánica bible

ფსალმუნები 34

¹უფალო, ედავე ჩემთან მოდავეებს და ებრძოლე ჩემს წინააღმდეგ მებრძოლთ.

²აიღე ფარი და საჭურველი და აღსდექ ჩემდა შესაწევნად.

³მახვილი აღმართე და გზა გადაუკეტე ჩემს მდევნელებს. უთხარი ჩემს სულს: "შენი მხსნელი ვარ”.

⁴შერცხვნენ და გაწბილდნენ ჩემი სიცოცხლის მაძიებელნი, უკუიქცნენ სირცხვილნაჭამნი, ჩემთვის სიავის მსურველნი.

⁵ბზესავით შეიქნენ ქარის წინაშე და უფლის ანგელოზმა უკუაგდოს ისინი.

⁶იყოს მათი გზა ბნელი და მოლიპული, უფლის ანგელოზი სდევნიდეს მათ.

⁷რადგან უმიზეზოდ დამიგეს მახე, უსაბაბოდ გაუთხარეს ორმო ჩემს სულს.

⁸უბედურება დაატყდეს მათ უცაბედად! თავიანთ მომზადებულ მახეში გაებნენ და დასაღუპად ჩავარდნენ მასში;

⁹მაშინ გაიხარებს უფლით ჩემი სული, მისი შემწეობით ილხენს.

¹⁰იტყვის ყოველი ძვალი ჩემი: "უფალო, ვინ არის შენი მსგავსი? შენ იხსნი სუსტს მძლავრისგან, ღარიბს და ღატაკს - მისი მძარცველისგან”.

¹¹აღსდგნენ ჩემს წინააღმდეგ ავი ცრუმოწმენი; რაც არ ვიცი - იმას მეკითხებიან.

¹²სიკეთის წილ ბოროტებით მიხდიან, ჩემი სულის დაობლება სურთ.

¹³მე კი ძაძებს ვიცვამდი მათი სნეულების ჟამს, ჩემს სულს მარხვით ვიძაბუნებდი, მაგრამ ჩემი ლოცვა უკან მიბრუნდებოდა.

¹⁴ისე ვწუხდი, როგორც მეგობრისთვის ან ძმისთვის, დედაზე მგლოვიარესავით დავიარებოდი დანაღვლიანებული და თავდახრილი.

¹⁵ისინი კი ხარობდნენ ჩემი წაბორძიკებისას და ჩემს წინააღმდეგ იკრიბებოდნენ. სულმდაბალნი, რომელთაც არ ვიცნობდი მგლეჯდნენ და არ მეშვებოდნენ.

¹⁶პირფერული დაცინვით აღრჭენდნენ კბილებს ჩემს წინააღმდეგ.

¹⁷უფალო, რამდენ ხანს უყურებ? იხსენი ჩემი სული მათი გაპარტახებისგან, ლომებისგან - ჩემი ერთადერთი.

¹⁸მადლობას შემოგწირავ დიდ კრებულში, უამრავ ხალხში შეგასხამ ხოტბას.

¹⁹რათა არ გაიხარონ ჩემზე უსამართლოდ გადამტერებულებმა და ნუ ანიშნებენ ერთიმეორეს, უმიზეზოდ ჩემი მოძულენი.

²⁰რადგან მშვიდობაზე არ ლაპარაკობენ და ქვეყნის მშვიდობის მოყვარულთა მიმართ მზაკვრობას იზრახავენ.

²¹ფართოდ მოაღეს ჩემზე პირი, ამბობენ: "ოჰო! ოჰო! იხილა თვალმა ჩვენმა”.

²²შენ ხომ იხილე, უფალო, ნუ დადუმდები, ღმერთო, ნუ გამშორდები;

²³აღსდექ, გამოიღვიძე ჩემს დასაცავად, უფალო, ღმერთო ჩემო, ჩემი დავის დასაცავად.

²⁴განმიკითხე შენი სამართლით, ნუმც გაიხარებენ ჩემზე.

²⁵ნუ იტყვიან თავის გულში: ოჰო! სწორედ ასე გვენება! ნუ იტყვიან! ჩავყლაპეთ იგი!

²⁶შერცხვეს და გაწბილდეს ყველა, ვისაც ჩემი ცუდი უხარია, სირცხვილით შეიმოსოს, ვინც მედიდურად მექცევა.

²⁷იგალობოს და იმხიარულოს, ვისაც გამართლება სურს ჩემი, დაე, თქვან მარადჟამს: "დიდია უფალი, მისი მსახურისთვის მშვიდობის მსურველი!”

²⁸ჩემი ენა კი შენს სიმართლეზე ილაპარაკებს და გაქებს მთელს დღეს.