Read Traducción Kadosh Israelita Mesiánica ფსალმუნები 36 Bible Online

ფსალმუნები 36 - Traducción Kadosh Israelita Mesiánica bible

ფსალმუნები 36

¹ნუ განრისხდები ბოროტმოქმედთა გამო, უკანონობის ჩამდენების ნუ შეგშურდება.

²რადგან ბალახივით მალე გახმებიან და მწვანილივით დაჭკნებიან.

³მიენდე უფალს და ჰქმენ კეთილი; დამკვიდრდი ქვეყანაზე და შეინარჩუნე ერთგულება.

⁴ისიამოვნე უფლის მიერ და ის აგისრულებს გულის საწადელს.

⁵ღმერთს მიანდე შენი გზასავალი, მიენდე მას და ის აღასრულებს.

⁶ნათელივით გამოიტანს სიმართლეს შენსას და შენს სამართალს - შუადღესავით.

⁷დაემორჩილე უფალს და მოთმინებით დაელოდე მას. ნუ განრისხდები თავის გზაზე წარმატებულ, ბოროტის განმზრახველ კაცზე.

⁸მოეშვი რისხვას და მიატოვე გულისწყრომა; ნუ განრისხდები, არ გაბოროტდე.

⁹რადგან მოიკვეთებიან ბოროტმოქმედნი, უფალზე მინდობილნი კი ქვეყანას დაიმკვიდრებენ.

¹⁰კიდევ ცოტა, და აღარ იქნება ბოროტი, დაუკვირდები მის ადგილს და აღარ იქნება იგი.

¹¹თავმდაბალნი კი ქვეყანას დაიმკვიდრებენ და დიდი მშვიდობით დაამდებიან.

¹²ავი განზრახვა აქვს ბოროტს მართლისადმი და კბილებს აღრჭენს მის წინააღმდეგ.

¹³მაგრამ უფალი დასცინებს მას, ვინაიდან, ხედავს რომ მოდის მისი დღე.

¹⁴მახვილი იშიშვლეს ბოროტებმა და მშვილდი მოზიდეს, რათა ძირს დასცენ ღარიბ-ღატაკნი და მოსპონ სწორი გზებით მოარულნი.

¹⁵მათი მახვილი მათსავე გულს განგმირავს და მათი მშვილდი გადატყდება.

¹⁶მართლის მცირედი სჯობია უკეთურთა დიდ სიმდიდრეს.

¹⁷რადგან შეიმუსრება უკეთურთა მკლავები, მართალთა შემწე კი ღმერთია.

¹⁸იცის უფალმა უმწიკვლოთა დღენი, უკუნისამდე იქნება მათი მემკვიდრეობა.

¹⁹არ შერცხვებიან სიავის ჟამს და შიმშილის დღეებში დაპურდებიან.

²⁰ბოროტნი კი დაიღუპებიან და მტერნი უფლისა, საძოვრების სიხასხასის მსგავსად გაქრებიან; კვამლივით გაუჩინარდებიან.

²¹ბოროტი სესხულობს და არ იხდის, მართალი კი მოწყალეა და გასცემს.

²²რადგან უფლის მიერ ნაკურთხნი დაიმკვიდრებენ ქვეყანას, მის მიერ დაწყევლილნი კი ამოწყდებიან.

²³უფლის მიერ წარიმართება კაცის ნაბიჯები და განამტკიცებს მას, ვისი გზებიც მოსწონს.

²⁴კიდეც რომ წაბორძიკდეს, არ დაეცემა, რადგან უფალს უჭირავს მისი ხელი.

²⁵ყმაწვილი ვიყავი, კიდეც მოვხუცდი და არ მინახავს მართალი კაცი მიტოვებული და მისი შთამომავლობა პურზე ხელგაწვდილი.

²⁶ის ყოველდღე მოწყალებას გაიღებს და გაასესხებს, კურთხეულია მისი შთამომავალი.

²⁷მოერიდე ბოროტს, სიკეთე აკეთე და სამუდამოდ დამკვიდრდები.

²⁸რადგან სამართლის მოყვარულია უფალი და არ მიატოვებს მის ერთგულებს - სამარადისოდ დაცულნი იქნებიან; ბოროტთა ნაშიერი კი ამოწყდება.

²⁹მართალნი დაიმკვიდრებენ ქვეყანას და საუკუნოდ დამკვიდრდებიან მასზე.

³⁰მართლის ბაგენი სიბრძნეს წარმოთქვამენ და მისი ენა სიმართლეს ლაპარაკობს.

³¹გულში აქვს თავისი ღმერთის რჯული, არ დაუსხლტება ნაბიჯები.

³²უთვალთვალებს მართალს ბოროტი და მის მოკვლას აპირებს.

³³მაგრამ უფალი არ მიატოვებს მას მის ხელში და განკითხვის ჟამს არ გაამტყუნებს.

³⁴მიენდე უფალს, დაიცავი მისი გზა და ის აგამაღლებს, რათა დაიმკვიდრო ქვეყანა და იხილო უკეთურთა განადგურება.

³⁵მინახავს უწმიდური ბოროტმოქმედი - ლიბანის კედარივით ფესვგადგმული.

³⁶მაგრამ ჩაიარა და, აჰა, აღარ არის, ვეძებ მას და ვეღარ ვპოულობ.

³⁷დაუკვირდი უმწიკვლოს და შეხედე მართალს, რადგან მშვიდობიან კაცს ეკუთვნის მომავალი.

³⁸ცოდვილნი კი ერთიანად მოისპობიან და ბოროტთა მომავალი გადაშენდება.

³⁹მართალთა შველა კი უფლისგანაა, ის არის მათი თავშესაფარი გაჭირვების ჟამს.

⁴⁰ეხმარება მათ უფალი და იხსნის; ბოროტთაგან იხსნის და გადაარჩენს, რადგან მასში ეძებენ თავშესაფარს.