Read Traducción Kadosh Israelita Mesiánica ფსალმუნები 43 Bible Online

ფსალმუნები 43 - Traducción Kadosh Israelita Mesiánica bible

ფსალმუნები 43

¹ღმერთო, ჩვენი ყურით გვაქვს მოსმენილი, ჩვენმა მამებმა გვიამბეს, საქმე, რომელიც მათ დღეებში, უძველეს დროში მოიმოქმედე.

²შენი ხელით განდევნე ერები, მათ ნაცვლად კი ისინი დარგე; შენ გაანადგურე ხალხები და გაფანტე.

³რადგან ხმლით კი არ დაუპყრიათ ქვეყანა და არც მათ მკლავებს არ მოუტანიათ მათთვის გამარჯვება, არამედ შენმა მარჯვენამ, შენმა მკლავმა და შენი სახის სინათლემ, რადგან შეიყვარე ისინი.

⁴შენ ხარ მეფე ჩემი, ღმერთო; უბოძე იაკობს გამარჯვება.

⁵შენით ვდევნით ჩვენს მტრებს; შენი სახელით ვთრგუნავთ ჩვენს მოდავეებს.

⁶რადგან არ ვარ დანდობილი ჩემს მშვილდზე და ვერც ჩემი მახვილი მიხსნის.

⁷არამედ შენ გვიხსნი ჩვენი მტრებისგან და ჩვენს მოძულეებს შენ არცხვენ.

⁸ღმერთით ვიკვეხნით ყოველდღე და შენს სახელს ვაქებთ უკუნისამდე.

⁹ახლა კი მიგვატოვე და შეგვარცხვინე და არ გამოდიხარ ჩვენს ლაშქართან.

¹⁰უკუგვაქციე ჩვენი მტრისგან და მოძულეებმა გაგვძარცვეს ჩვენ.

¹¹მიგვეცი, როგორც ცხვარი, შესაჭმელად და დაგვფანტე ხალხებს შორის.

¹²სარგებლის გარეშე გაჰყიდე შენი ერი და არ იდავე მათ ფასზე.

¹³შესარცხვენად მიგვეცი მეზობლებს, დასაცინად და საგინებლად - ჩვენ ირგვლივ მყოფთ.

¹⁴იგავად გვაქციე ხალხთა შორის, თავის საქნევად ერებს შორის.

¹⁵ყოველდღე ჩემს წინაშეა ჩემი აუგი და სირცხვილი მიფარავს სახეს

¹⁶დამცინავისა და მგმობელის ხმისგან, მტრისა და შურისმაძიებლისაგან.

¹⁷ყოველივე ეს გვეწია ჩვენ და მაინც არ დაგივიწყეთ, არ გაგვიმრუდებია შენი აღთქმა.

¹⁸არ უკუქცეულან ჩვენი გულები და არც ჩვენს ნაბიჯებს გადაუხვევიათ შენი გზიდან.

¹⁹და მაინც შეგვმუსრე, ტურების სადგომს დაგვამსგავსე და სიკვდილის აჩრდილი გადაგვაფარე.

²⁰ჩვენი ღმერთის სახელი რომ დაგვევიწყებინა და ხელი უცხო ღმერთებისკენ გაგვეშვირა,

²¹განა არ გვაზღვევინებდა ამას ღმერთი? რადგან იცის მან საიდუმლონი გულისა.

²²შენ გამო გვხოცავენ ყოველდღე, დასაკლავ ცხვრებად ვართ მიჩნეულნი.

²³გამოიღვიძე, რატომ გძინავს, უფალო? გამოფხიზლდი, ნუ უკუგვაგდებ სამარადისოდ.

²⁴შენ სახეს რად გვიმალავ? ივიწყებ ჩვენს ტანჯვასა და გაჭირვებას?

²⁵რადგან მტვრამდე დამდაბლდა ჩვენი სული, მიწას მიეწება ჩვენი მუცელი.

²⁶აღსდექ ჩვენს დასახმარებლად და გვიხსენი შენი წყალობისამებრ!