Read Traducción Kadosh Israelita Mesiánica ფსალმუნები 44 Bible Online

ფსალმუნები 44 - Traducción Kadosh Israelita Mesiánica bible

ფსალმუნები 44

¹აღივსო ჩემი გული მშვენიერი სიტყვებით. ჩემი სიმღერა მეფეს ეკუთვნის, ენა ჩემი კალამია ხელოვანი მწერლისა.

²ადამის ძეთა შორის უმშვენესი ხარ, მადლი იღვრება შენს ბაგეთაგან, რადგან გაკურთხა ღმერთმა სამარადჟამოდ.

³წელზე შემოირტყი შენი მახვილი, გმირო, შენი დიდებით და მშვენებით.

⁴შენი მშვენებით დაბრძანდი ეტლზე - ჭეშმარიტების, თვინიერებისა და სიმართლისთვის; გვაჩვენოს საოცრებანი მარჯვენამ შენმა.

⁵ისრები შენი წამახულია, გულში ერჭობიან მეფის მტრებს; ხალხები ეცემიან შენს ფეხქვეშ.

⁶ტახტი შენი ღმერთო - უკუნითი უკუნისამდეა; სამართლის კვერთხია - კვერთხი შენი ხელმწიფებისა.

⁷შენ შეიყვარე სიმართლე და შეიძულე ბოროტება; ამიტომ გცხო ღმერთმა, შენმა ღმერთმა, სიხარულის ზეთით, შენს მეგობრებზე მეტად.

⁸მთელი შენი სამოსი, როგორც მური, ალოე და კასია; სპილოს ძვლის დარბაზებიდან ქნართა ხმა გაგამხიარულებს შენ;

⁹მეფეთა ასულები შენს დიდებულებს შორის არიან; შენს მარჯვნივ დადგა ოფირის ოქროთი შემკული დედოფალი.

¹⁰მისმინე, ასულო, მოიხედე და ყური მომაპყარ. დაივიწყე ხალხი შენი და სახლი მამაშენისა.

¹¹მაშინ ისურვებს ხელმწიფე შენს მშვენებას, რადგან ის არის შენი უფალი, თაყვანი ეცი მას.

¹²ტვიროსის ასული ძღვენით მოვა შენთან; ხალხთა შორის უმდიდრესნი, შენს წყალობას მოძებნიან.

¹³შიდა ოთახში - მეფის ასულია, მოოქროვილია მისი სამოსი.

¹⁴მოქარგული კაბით მოჰყავთ იგი მეფესთან; უკან მოჰყვებიან ქალწულნი, დობილნი მისნი.

¹⁵სიხარულით და ლხინით შედიან მეფის სასახლეში.

¹⁶შენს წინაპართა ადგილას იქნებიან შენი ძენი; მთავრებად დაადგენ მათ მთელ დედამიწაზე.

¹⁷თაობიდან თაობაში დავადგენ შენს სახელს გასახსენებლად, ამიტომ ხოტბას შეგასხამენ ხალხები უკუნითი უკუნისამდე.