Read Traducción Kadosh Israelita Mesiánica ფსალმუნები 48 Bible Online

ფსალმუნები 48 - Traducción Kadosh Israelita Mesiánica bible

ფსალმუნები 48

¹ისმინეთ ეს, ყოველნო ერნო, ყური მოაპყარით, დედამიწის ყველა მცხოვრებო,

²უბრალოებმაც, დიდგვაროვნებმაც, მდიდარმა და ღარიბმა ერთად.

³ჩემი პირი სიბრძნეს წარმოთქვამს და ჩემი გულის განსჯა - გონიერებას.

⁴ყურს მივუგდებ იგავს, ქნარზე გავაცხადებ ჩემს საიდუმლოს,

⁵რატომ შევშინდე უბედურების ჟამს, როცა გარს შემომეხვევა ჩემი მოდავეების ბოროტება?

⁶თავიანთ ქონებაზე, რომ არიან დაიმედებულნი და სიმდიდრით რომ ტრაბახობენ.

⁷ვერ გამოიხსნის კაცს თავისი ძმა, ვერ მისცემს ღმერთს მის გამოსასყიდს;

⁸რადგან ძვირია მისი სიცოცხლის გამოსახსნელი, ვერ გადაიხდის უკუნისამდე,

⁹რომ სამარადისოდ იცოცხლოს და არ იხილოს საფლავი.

¹⁰ის ხედავს: ბრძენებიც იხოცებიან, ბრიყვიცა და უგუნურიც ერთად იღუპება, თავიანთ ქონებას კი სხვას უტოვებენ.

¹¹გულში ფიქრობენ, რომ სახლები მათი მუდმივია და საცხოვრებლები - თაობიდან თაობამდე; მამულებს თავიანთ სახელებს არქმევენ.

¹²მაგრამ ვერ დამკვიდრდებიან პატივში, რადგან პირუტყვივით არიან, რომელიც იღუპება.

¹³ასეთია უგუნურთა გზა, თუმცა შემდგომნი მათი იწონებენ მას.

¹⁴ცხვრებივით ჩაყრიან შავეთში; სიკვდილი დამწყემსავს მათ, დილით კი მართალნი გაბატონდებიან მათზე; მათი კვალიც კი აღარ დარჩება, შავეთია მათი სადგომი;

¹⁵მე კი, ღმერთი გამომისყიდის საფლავის ხელიდან, რადგან მიმიღებს მე.

¹⁶ნუ შეშინდები თუ გამდიდრდეს კაცი, თუ გამრავლდეს მისი სახლის დიდება.

¹⁷რადგან, როცა მოკვდება, ვერაფერს წაიღებს, თან არ გაჰყვება დიდება.

¹⁸თუმცა სიცოცხლეში თავს ბედნიერად თვლის: ‘რადგან წარმატებულს ყოველთვის აქებენ ადამიანები.’

¹⁹თავისი მამების თაობასთან მივა - ვერასოდეს იხილავს სინათლეს.

²⁰ადამიანი, თუნდაც პატივდებული, რომელსაც გაგების უნარი არა აქვს, პირუტყვივით იღუპება.