Read Traducción Kadosh Israelita Mesiánica ფსალმუნები 49 Bible Online

ფსალმუნები 49 - Traducción Kadosh Israelita Mesiánica bible

ფსალმუნები 49

¹ძლიერმა ღმერთმა, უფალმა დაილაპარაკა და მოუწოდა ქვეყნიერებას მზის ამოსვლიდან მზის ჩასვლამდე.

²სიონიდან, მშვენიერების სრულქმნილებიდან, გამობრწყინდა უფალი.

³მოდის ჩვენი ღმერთი და არ დადუმდება; მჭამელი ცეცხლია მის წინაშე და ძლიერი ქარიშხალი - მის ირგვლივ.

⁴მოუხმობს ზეცას მაღლიდან და დედამიწას - თავისი ხალხის განსასჯელად:

⁵შემომიკრიბეთ ჩემი ერთგულნი, რომელთაც აღთქმა დამიდეს შესაწირით.

⁶ცანი აცხადებენ მის სიმართლეს; რადგან თვით ღმერთია მსაჯული.

⁷ისმინე ჩემო ხალხო და ვილაპარაკებ; მოწმედ გამოვალ შენს წინააღმდეგ, ისრაელ. მე ვარ ღმერთი, შენი ღმერთი.

⁸მსხვერპლისთვის კი არ გისაყვედურებ; შენი შესაწირები ყოველთვის ჩემს წინაშეა.

⁹არ შევიწირავ შენი სახლიდან ზვარაკს, არც ვაცებს - შენი ფარეხებიდან.

¹⁰რადგან ჩემია ტყის ყველა ცხოველი, პირუტყვი ათას მთაზე.

¹¹ჩემთვის ცნობილია მთის ყველა ფრინველი და მინდვრის ყველა ცხოველი მე მეკუთვნის.

¹²თუ მომშივდა, შენ არ გეტყვი, რადგან ჩემია მსოფლიო და სავსება მისი.

¹³განა ხარების ხორცსა ვჭამ და ვაცების სისხლს ვსვამ?

¹⁴მადლობის მსხვერპლი შესწირე ღმერთს და შეუსრულე უზენაესს შენი აღთქმები.

¹⁵მომიხმე გაჭირვების დღეს; გადაგარჩენ და შენ განმადიდებ.

¹⁶ბოროტს კი უთხრა ღმერთმა: რა უფლებით ქადაგებ ჩემს წესებს და პირთან მიგაქვს ჩემი აღთქმა?

¹⁷შენ ხომ გძულს დარიგება და უკუმოისროლე ჩემი სიტყვები.

¹⁸ქურდის დანახვა გსიამოვნებს, მრუშებთან გაქვს წილი.

¹⁹პირი მიშვებული გაქვს სიავეზე და სიყალბეს თხზავს შენი ენა.

²⁰დაჯდები, შენი ძმის წინააღმდეგ ლაპარაკობ და დედაშენის შვილის შერცხვენას ცდილობ.

²¹ამას სჩადიოდი და მე ვდუმდი; გეგონა, რომ მე შენი მსგავსი ვარ; ახლა კი გამხელ და შენს თვალწინ დაგიმტკიცებ.

²²ჩაუფიქრდით ამას, ღმერთის დამვიწყებლებო, თორემ მოგსრავთ და არ გექნებათ ხსნა.

²³მადლობის შემომწირავი განმადიდებს მე და ვინც სწორ გზას ადგას, მას ვუჩვენებ ხსნას ღმერთისას.