Read Traducción Kadosh Israelita Mesiánica ფსალმუნები 50 Bible Online

ფსალმუნები 50 - Traducción Kadosh Israelita Mesiánica bible

ფსალმუნები 50

¹შემიწყალე ღმერთო, შენი წყალობისამებრ; შენი მრავალი წყალობისამებრ წაშალე ჩემი დანაშაული.

²სრულად განმბანე ჩემი ბრალისგან და გამასუფთავე ჩემი ცოდვისგან.

³ვინაიდან ვიცი ჩემი დანაშაული და მუდამ თვალწინ მიდგას ჩემი ცოდვა.

⁴შენ, მხოლოდ შენ შეგცოდე და ბოროტება ჩავიდინე შენს თვალში, ამიტომ მართალი ხარ შენს სიტყვებში და უმწიკვლო - შენს სამართალში.

⁵აჰა, ცოდვილად დავიბადე, დიახ ცოდვილად ჩავესახე დედაჩემს.

⁶აჰა, გულში დაფარული ჭეშმარიტება გსურს, დაფარულში მასწავლი სიბრძნეს.

⁷მასხურე უსუპი და განვიწმიდები; განმბანე და თოვლზე მეტად გავსპეტაკდები.

⁸ლხინისა და სიხარულის ხმა გამაგონე, გაახარე ჩემი ძვლები, შენ რომ შემუსრე.

⁹სახე აარიდე ჩემს შეცდომებს და ყველა ჩემი ბრალი წაშალე.

¹⁰სუფთა გული შექმენი ჩემში, ღმერთო და წრფელი სული განმიახლე.

¹¹ნუ უკუმაგდებ შენგან და შენს წმიდა სულს ნუ წამართმევ.

¹²შენი ხსნის სიხარული დამიბრუნე და შენი დიდებული სულით გამამაგრე.

¹³მაშინ ვასწავლი შენს გზებს დამნაშავეთ და ცოდვილნი დაბრუნდებიან შენთან.

¹⁴სისხლისგან მიხსენი ღმერთო, ჩემი ხსნის ღმერთო და ხოტბას შეასხამს ჩემი ენა შენს სიმართლეს.

¹⁵უფალო! გახსენი ჩემი ბაგეები და შენს ქებას იტყვის ჩემი პირი.

¹⁶რადგან მსხვერპლი არა გსურს, რომ შემოგწირო და სრულადდასაწველს არ ინებებ.

¹⁷შესაწირი ღმერთისა - სული მოდრეკილი; მოდრეკილისა და მორჩილის გულს არ დაამცირებ, ღმერთო.

¹⁸სიკეთე უყავ შენი კეთილგანწყობით სიონს, აღადგინე გალავნები იერუსალიმისა.

¹⁹მაშინ ისურვებ სიმართლის შესაწირებს და სრულადდასაწველებს; მაშინ აიტანენ შენს სამსხვერპლოზე ზვარაკებს.