Read Traducción Kadosh Israelita Mesiánica ფსალმუნები 54 Bible Online

ფსალმუნები 54 - Traducción Kadosh Israelita Mesiánica bible

ფსალმუნები 54

¹ისმინე ღმერთო ჩემი ლოცვა და ნუ დაემალები ჩემს ვედრებას

²ყური მომაპყარ და მიპასუხე; მოსვენებას არ მაძლევს ჩემი საფიქრალი, წუხილში ვარ

³მტრის ხმისგან, ბოროტთა შევიწროებისგან; რადგან სიმრუდეს მაბრალებენ და სიძულვილით მირისხდებიან.

⁴თრთის ჩემ შიგნით ჩემი გული და სიკვდილის ძრწოლა დამატყდა თავს.

⁵შიში და თრთოლა დამეუფლა და შიშის ზარი მიპყრობს.

⁶ვთქვი, რომ მქონდეს-მეთქი მტრედის ფრთები, გავფრინდებოდი და მოვისვენებდი!

⁷აჰა, შორს გადავიხვეწებოდი, უდაბნოში დავიდებდი ბინას.

⁸ვისწრაფებდი, რომ მეპოვა თავშესაფარი ძლიერი ქარისგან და ქარიშხლისგან.

⁹გაანადგურე ისინი უფალო და გაყავი მათი ენები; რადგან ძალადობას და შუღლს ვხედავ ქალაქში.

¹⁰დღედაღამ გარს უვლიან მის კედლებს, სიმრუდე და უბედურებაა მასში,

¹¹ნგრევაა მის შუაგულში და არ სცილდება მის ქუჩებს სიცრუე და უბედურება.

¹²ვინაიდან მტერი კი არ მლანძღავს, თორემ ავიტანდი; ჩემი მოძულე კი არ განდიდებულა ჩემზე - მას დავემალებოდი;

¹³არამედ შენ, ჩემი სწორი, მეგობარი და ახლობელი ჩემი,

¹⁴ერთად რომ ვსაუბრობდით ტკბილად და ღვთის სახლში დავდიოდით ხალხთან ერთად.

¹⁵დაატყდეს მათ სიკვდილი, ცოცხლად ჩავიდნენ ქვესკნელში, რადგან ბოროტებაა მათ სახლებში, მათ გულებში.

¹⁶მე კი ღმერთს მოვუხმობ და მიშველის უფალი.

¹⁷საღამოთი, დილით და შუადღით შევევედრები, შევტირებ და მოისმენს ჩემს ხმას.

¹⁸მშვიდობით დაიხსნის ჩემს სულს ბრძოლისგან, რადგან ბევრნი აღდგნენ ჩემზე.

¹⁹მოისმენს ღმერთი დასაბამიდან ტახტზე მჯდომი, და პასუხს გასცემს მათ, რადგან არ იცვლებიან და არ ეშინიათ ღვთისა.

²⁰ხელი გაიწოდეს მათზე, ვისთანაც მშვიდობა ჰქონდათ, აღთქმა დაარღვიეს.

²¹კარაქზე რბილია მათი ბაგეები, გულში კი ომი აქვთ; ზეთზეც რბილია მათი სიტყვები, მაგრამ მოშიშვლებული ხმლები არიან ისინი.

²²მიანდე უფალს შენი საზრუნავი და ის განგამტკიცებს, არასოდეს დაუშვებს მართლის წაბორძიკებას.

²³ღმერთო, შენ ჩაყრი მათ უძირო ქვესკნელში; სისხლისმღვრელნი და ვერაგნი ვერ მიაღწევენ თავიანთ დღეთა ნახევარს; მე კი შენზე ვარ დაიმედებული.