Read Traducción Kadosh Israelita Mesiánica ფსალმუნები 58 Bible Online

ფსალმუნები 58 - Traducción Kadosh Israelita Mesiánica bible

ფსალმუნები 58

¹მიხსენი ჩემი მტრებისგან, ღმერთო ჩემო; დამიცავი მათგან, ვინც ჩემს წინააღმდეგ აღდგა.

²მიხსენი სიავის მქმნელთაგან და სისხლისმღვრელთაგან გადამარჩინე.

³აჰა, ჩაუსაფრდნენ ჩემს სიცოცხლეს; აღდგნენ ჩემზე ძლიერნი, თუმცა არც დანაშაული მიმიძღვის და არც შეცოდება, უფალო.

⁴უდანაშაულო ვარ, და მაინც ჩემს წინააღმდეგ გამოდიან, აღსდექ ჩემს შესახვედრად და მომხედე.

⁵შენ კი უფალო, ცაბაოთ ღმერთო, ღმერთო ისრაელისა, აღსდექ, რომ განიკითხო ერები; არ დაინდო სიავის მქმნელნი, მოღალატენი.

⁶საღამოობით ბრუნდებიან, ძაღლებივით ყმუიან და გარს უვლიან ქალაქს.

⁷აგერ, გმობას ანთხევენ თავიანთი პირებიდან, მახვილი აქვთ ბაგეებში, აქაოდა ვინ ისმენსო.

⁸შენ კი გაიცინებ მათზე უფალო, დასცინებ ყველა ხალხს.

⁹ძალავ ჩემო, შენ მოგენდობი, რადგან ღმერთია ჩემი სიმაგრე.

¹⁰ღმერთი ჩემი მწყალობელი წინ წამიძღვება; გამარჯვებით შემახედებს იგი ჩემს მტრებზე.

¹¹ნუ დახოცავ მათ, თორემ დაივიწყებს ჩემი ერი, გაფანტე შენი ძალით და დაამდაბლე, ფარო ჩვენო, უფალო.

¹²რადგან მათი პირის ცოდვა არის მათი სიტყვა, დაე, გაებან მახეში თავიანთი ქედმაღლობით, ტყუილი ფიცისა და პირფერობისთვის,

¹³მოსპე რისხვით, მოსპე რომ აღარ იყვნენ და შეიტყონ, რომ ღმერთი ბატონობს იაკობზე, ქვეყნიერების კიდით-კიდემდე.

¹⁴დაე, დაბრუნდნენ საღამოობით, იყმუვლონ ძაღლივით და გარს შემოუარონ ქალაქს.

¹⁵დაე, იწოწიალონ საჭმლისათვის და მშივრებმა გაათიონ ღამე.

¹⁶მე კი შენს სიძლიერეს ვუმღერებ და დილდილობით ვიღაღადებ შენს წყალობაზე, რადგან შენ იყავი ჩემი ბურჯი და თავშესაფარი ჩემი გაჭირვების დღეს.

¹⁷ძალავ ჩემო, შენ გიგალობებ, რადგან ღმერთია ჩემი ბურჯი, ღმერთი - ჩემი მწყალობელი.