Read Traducción Kadosh Israelita Mesiánica ფსალმუნები 61 Bible Online

ფსალმუნები 61 - Traducción Kadosh Israelita Mesiánica bible

ფსალმუნები 61

¹მხოლოდ ღმერთს ელის მდუმარედ ჩემი სული; მისგანაა ჩემი ხსნა.

²მხოლოდ ის არის ჩემი კლდე და ჩემი ხსნა, ჩემი სიმაგრე - დიდად არ წავბორძიკდები.

³როდემდე დაესხმით თავს ადამიანს, შეეცდებით მის წაქცევას, როგორც გადახრილ კედელს, ყორეს მორყეულს.

⁴განიზრახეს სიმაღლიდან მისი გადმოგდება; სიცრუეს მიმართავენ, პირით აკურთხებენ, გულით კი სწყევლიან.

⁵მხოლოდ ღმერთს ელოდება სული ჩემი მდუმარედ, რადგან მისგან არის ჩემი იმედი.

⁶მხოლოდ ის არის ჩემი კლდე და ხსნა ჩემი, ჩემი სიმაგრე - არ შევირყევი.

⁷ღმერთისგან არის ჩემი ხსნა და ჩემი ღირსება; ღმერთია ჩემი სიმაგრე და თავშესაფარი.

⁸მას მიენდეთ ყოველჟამს, ხალხნო, თქვენი გულები გადმოღვარეთ მის წინაშე; ღმერთია ჩვენი თავშესაფარი.

⁹არარაობა არიან მოკვდავნი, ცრუობენ კაცთა შვილები; სასწორზე რომ დადო, ყველა ერთ ამოსუნთქვაზე მსუბუქია.

¹⁰ნუ დაამყარებთ იმედს მძარცველობაზე და მტაცებლობას ნუ გამოედევნებით; თუ გაგიმრავლდა სიმდიდრე, გულს ნუ მიიდრეკ მისკენ.

¹¹ერთხელ თქვა ღმერთმა და ორჯერ მოვისმინე, რომ ღმერთისაა ძალა.

¹²შენია უფალო წყალობა, რადგან შენ მიუზღავ თითოეულს მისი საქმისამებრ.