Read Traducción Kadosh Israelita Mesiánica ფსალმუნები 65 Bible Online

ფსალმუნები 65 - Traducción Kadosh Israelita Mesiánica bible

ფსალმუნები 65

¹სიხარულით შესძახე ღმერთს, მთელო ქვეყნიერებავ.

²უგალობეთ მისი სახელის დიდებას, ხოტბა შეასხით მის დიდებას.

³უთხარით ღმერთს: "რა საოცარია შენი საქმენი, დაგემორჩილებიან შენი მტრები, შენი ძალის სიდიადის გამო.

⁴მთელი ქვეყნიერება გცემს თაყვანს შენ და ქებას უმღერს შენს სახელს”.

⁵მოდით და ნახეთ ღვთის ნამოქმედარი, საოცარია მისი საქმენი ადამიანის შვილების მიმართ.

⁶ზღვა ხმელეთად გადააქცია, მდინარე ფეხით გადალახეს; იქ გავიხარეთ მის გამო.

⁷უკუნისამდე მეფობს თავისი ძლიერებით, მისი თვალები ერებს აკვირდება, რომ არ აღსდგნენ ურჩნი.

⁸ადიდეთ ერებო ჩვენი ღმერთი და აღავლინეთ ხმა მისი ქებისა.

⁹მან შეუნარჩუნა სიცოცხლე ჩვენს სულს და ფეხი ჩვენი დაიცვა წაბორძიკებისგან.

¹⁰რადგან, გამოგვცადე ჩვენ ღმერთო, გადაგვადნე, როგორც ვერცხლს ადნობენ.

¹¹ბადეში მოგვაქციე, ჩაგვრის ტვირთი აგვკიდე ზურგზე.

¹²კაცი აამხედრე ჩვენზე; ცეცხლსა და წყალში გამოგვატარე და სიუხვის ადგილზე მოგვიყვანე.

¹³სრულადდასაწველით მოვალ შენს სახლში და აგისრულებ ჩემს აღთქმებს,

¹⁴რომლებიც წარმოთქვეს ჩემმა ბაგეებმა და ჩემმა პირმა აღგითქვა გაჭირვების ჟამს.

¹⁵მსუყე სრულადდასაწველს ამოგიტან საკმევითა და ერკემლით. მოზვრებს და ვაცებს შემოგწირავ.

¹⁶მოდით, მოისმინეთ ყველამ, ვისაც ღმერთის შიში გაქვთ და გიამბობთ, რა გააკეთა მან ჩემი სულისთვის.

¹⁷ჩემი ბაგეებით შევღაღადე და ჩემი ენით აღვამაღლე იგი.

¹⁸სიმრუდე რომ შეემჩნია ჩემს გულში, არ შეისმენდა უფალი.

¹⁹მაგრამ ნამდვილად მისმინა ღმერთმა, ყური მოაპყრო ჩემი ლოცვის ხმას.

²⁰კურთხეულ იყოს ღმერთი, რომელმაც არ უარყო ჩემი ლოცვა და არ მომაკლო თავისი წყალობა.